Nshapita wa 49

Dinyunguluka dikuabu dia buambi mu Ngalileya

PANYIMA pa bidimu bu bibidi bia didifila bikole mu buambi, Yezu kakutekesha mpindieu nkuatshilu wende wa mudimu bua kuikisha kakese anyi? Tòo, bishilangane, udi walabaja mudimu wende wa buambi pa kuakaja dinyunguluka dikuabu, disatu mu Ngalileya. Udi ukumbula bimenga ne misoko yonso bia mu teritware eu, ulongesha mu nsunagoga ne umanyisha lumu luimpe lua Bukalenge. Malu adiye umona mu dinyunguluka edi adi amutuishisha bipitshidile kumpala pa dikengedibua dia kualabaja mudimu wa buambi.

Kuonso kudi Yezu upitshila, udi umona misumba ya bantu bakengela luondapu ne dikankamija bia mu nyuma. Badi bu mikoko mibule mulami, mishikile ne mimuangalake, ne udi ubumvuila luse. Udi wambila bayidi bende ne: “Eyowa, bia kunowa mbivule, kadi banowi mbakese. Nunku, lombayi Mfumu wa dinowa bua atume bena mudimu mu kunowa kuende.”

Yezu udi upangadija tshia kuenza. Udi usangisha bapostolo 12, bavuaye musungule kukadi bu tshidimu tshijima. Udi ubatapulula mu tusumbu tusambombo tua bamanyishi babidi pa kamue ne ubapesha ngenyi-miludiki. Udi ubumvuija ne: “Kanulondi njila udi uya ku matunga, ne kanubuedi mu tshimenga kampanda tshia Samariya; kadi, tungunukayi ne kuya kudi mikoko mijimine ya nzubu wa Izalele. Panudi nuya, nuende numanyisha, nuamba ne: ‘Bukalenge bua mu diulu bukadi pabuipi.’”

Bukalenge ebu budibo ne bua kumanyisha ng’ebu buvua Yezu mubalongeshe bua kulomba mu disambila dia tshitembelu. Bukalenge bukadi pabuipi mu ngumvuilu wa se: Mukalenge musungula kudi Nzambi, Yezu Kristo, udi kuoku. Bua kufila tshijadiki tshia se: bayidi bende badi baleji-mpala ba bukalenge ebu butambe wonso a bantu, Yezu udi ubapuijila bukole bua kuondopa babedi ne kubiisha too ne bafue. Udi ubatumina dîyi bua kuenza midimu eyi patupu, kabiyi kufutshisha mfranga.

Pashishe, udi wambila bayidi bende bua kabalongolodi mabuki a bintu bia ku mubidi bua dinyunguluka diabu dia bumanyishi. “Kanudipetedi ngolo, peshi tshiamu tshitoke, anyi tshiamu tshia tshiombo bua kabombi ka ku mikaba yenu ya mu tshimonu, nansha tshibombi tshia biakudia bia mu luendu, nansha bilamba bibidi bia muinshi, nansha sandala anyi dikombo; bualu muena mudimu mmuakanyine tshiakudia tshiende.” Aba badi banyisha mukenji wabu nebasakibue ku dibakidila ne nebabapeteshe biakudia ne muaba wa kulala. Ke tshidi Yezu umvuija ne: “Mu tshimenga tshionso anyi mu musoko wonso unudi nubuela, nukebemu yonso udi mukumbanyine, ne nushale kuende too ne ku diumuka dienu.”

Pashishe, Yezu udi ufila ngenyi-miludiki pa mushindu wa kumanyisha mukenji wa Bukalenge kudi bena nzubu kampanda. “Panudi nubuela mu nzubu,” ke mudiye ubambila, “nuele benamu muoyo; bikala nzubu au mukumbanyine, ditalala dinudi numujingila dimuvuile; kadi pikalaye kayi mukumbanyine, ditalala dienu dinupinganyine. Biabengabo kunuakidila kudi muntu nansha umue anyi kuteleja miaku yenu, panudi nupatuka mu nzubu au peshi mu tshimenga atshi, nututule lupuishi lua ku makasa enu.”

Bua tshimenga tshionso tshiabenga mukenji wabu, Yezu udi usokolola ne: dilumbuluishibua diatshi nedikale dipite bukole. Udi umvuija ne: “Bushuwa ndi nnuambila ne: nebatambe kuleja dilekelela mu Dituku dia Dilumbuluisha bua Sodome ne Gomore kupita bua tshimenga atshi.” Matayo 9:35–10:15; Mâko 6:6-12; Luka 9:1-5, NW.

▪ Ndîba kayi didi Yezu utuadija dinyunguluka disatu mu Ngalileya, ne ndituishibua kayi didiye upetamu?

▪ Padiye utuma bapostolo bende 12 mu buambi, nngenyi-miludiki kayi idiye ubapesha?

▪ Bua tshinyi mbikumbanyine bua bayidi kulongeshabo ne: Bukalenge bukadi pabuipi?