Nshapita wa 84

Bujitu budiomekela bu muyidi

MUMANE kumuka ku nzubu kua Mufarizeyi munene, udi imue misangu muena mu Sanhedrin, Yezu udi utungunuka ne luendu mutangile ku Yeruzaleme. Misumba minene idi imulonda. Kadi, ntshinyi tshidi tshibasaka ku dimulonda? Kuikala mulondi mulelela wa Yezu, kudi kumvuija tshinyi?

Mu njila, Yezu udi ukudimuka kudi misumba, ne ubambila mêyi adi pamu’apa abatua ku muoyo ne: “Bialua muntu kundi ne kayi ukina tatuende ne mamuende ne mukajende ne bana bende ne bana babo ba balume ne ba bakaji, too ne anyima wende yeye muine, kêna mua kuikala muyidi wanyi.”

Yezu udi usua kumvuija tshinyi? Apa, kêna wamba se: bamulondi badi ne bua kukina balela babo mu ngumvuilu wa ku dîna nansha. Kadi, badi ne bua kubakina mu ngumvuilu wa se: badi ne bua kubananga bishadile kunanga kudibo bamunanga yeye. Badi bakula bua Yakobo, nkambua wa Yezu muvuaye ‘mukine’ Lea ne munange Rashele. Ebi bidi biumvuija se: Lea uvua munangibue bishadile kudi muanabo wa bakaji Rashele.

Tabalela kabidi se: Yezu udi wamba ne: muyidi udi ne bua kukina “too ne anyima wende yeye muine,” anyi muoyo. Apa kabidi, Yezu udi umvuija ne: muyidi mulelela udi ne bua kumunanga Yeye kupita kunanga kudiye munange muoyo wende yeye muine. Nunku, Yezu udi wela kashonyi pa muanda wa se: kulua muyidi wende nkudiomekela bujitu butambe bunene. Ki ndipangadika dia kuangata kabiyi kuanji kuela meji ne lubatshi nansha.

Kuikala muyidi wa Yezu, nkuanyisha ku budisuile bua kuakama ntatu ne makengeshibua, anu mudiye utungunuka ne kumvuija ne: “Eu yonso udi kayi utuala mutshi wende wa tshinyongopelu ne kayi undonda kêna mua kuikala muyidi wanyi.” Nunku, muyidi mulelela udi ne bua kuanyisha ku budisuile bua kutuala bujitu bua bipendu bumue bumue buakakama Yezu, buine budi mua kukongoloja too ne lufu, pikalabi bikengedibua, ku bianza bia baluishi ba Nzambi, luine ludi Yezu pa kupetangana nalu.

Pa nanku, kuikala muyidi wa Kristo mmuanda udi misumba idi imulonda ne bua kukonkonona ne lubatshi luonso. Yezu udi uzangika muanda eu pa kutumika ne mufuanu. “Tshilejilu,” ke mudiye wamba, “nnganyi wa kunudi, biasuaye kuibaka tshibumba, kêna wanji kusomba bua kupima mushinga ne kumona bikalaye ne bia kutshijikija nabi? Tshianana, neikale mua kuasa tshishimikidi tshiatshi, kadi kudimona kayi mukumbane mua kutshijikija, ne babandidi buonso nebatuadije kumuseka, bamba ne: ‘Muntu eu uvua mubange kuibaka, kadi kavua mukumbane mua kujikija.’”

Nunku, ku mufuanu eu Yezu udi umvuija misumba idi imulonda ne: kumpala kua kulua bayidi bende, badi ne bua kuangata dipangadika dikole dia kukumbaja bionso bidi bikengedibua, anu mudi muntu udi ujinga kuibaka tshibumba wanji kukeba mua kushindika kumpala kua kutuadija bikalaye ne lupetu ne bia luibaku bua kutshijikija. Ufila mukuabu mufuanu, Yezu udi utungunuka ne:

“Peshi mmukalenge kayi, biajingaye kuya kutuilangana ne mukalenge mukuabu mu mvita, kayi wanji kusomba bua kuelangana meji né mmukumbane, ne basalayi binunu dikumi, bua kuakamangana ne eu udi ulua kumubunda ne binunu makumi abidi? Pikalaye kayi mukumbane bushuwa, patshidi mukuabu au kule, udi umutumina kasumbu ka milopo ne ulomba ditalala.”

Yezu udi uzangika pashishe dilongesha dia mifuanu yende, wamba ne: “Nenku, numanye bimpe, yonso wa kunudi udi kayi wela nyima ku bintu biende bionso, kena mua kuikala muyidi wanyi.” Ke tshidi misumba idi imulonda, bushuwa, ne yonso udi ufika ku dimanya Kristo, ne bua kuanyisha bua kuenza. Badi ne bua kuikala badiakaje bua kulambula tshintu tshionso tshidibo natshi​—bintu biabu bionso, pamue ne muoyo muine—​bikalabo basue kuikala bayidi bende. Udiku pebe muanyishe bua kuenza nunku anyi?

“Bushuwa, luepu ntshintu tshilenga,” ke mudi Yezu utungunuka. Mu Muyuki wende wa pa Mukuna, uvua muambe ne: bayidi bende badi “luepu lua buloba,” mu ngumvuilu wa se: badi ne buenzeji bua dikuba bantu anu mudi luepu luena-dîna lukuba bintu. “Kadi biatuka luepu luine, nebalususumishe kabidi ne tshinyi? Kalutshiena luimpe nansha bua buloba nansha bua bifukishi,” ke mudi Yezu ukomesha. “Bantu badi baluimansha pambelu. Udi ne matshi bua kumvua, umvue.”

Nunku, Yezu udi uleja ne: nansha aba bakadi bayidi bende kukadi matuku mulongolongo kabena ne bua kuteketa pa bidi bitangila dipangadika diabu dia kutungunuka. Biobi mua kubenzekela nunku, nebalue bantu ba patupu, bakumbanyine kusekibua kudi bena mu bukua-bantu ne kupanga mushinga ku mesu kua Nzambi, ee, bushuwa, nebavue tshipendu bua Nzambi. Nunku, anu bu luepu luatuke ne luoneke nebedibue pambelu, eyo, nebabutudibue. Luka 14:25-35; Genese 29:30-33; Matayo 5:13, NW.

▪ “Kukina” balela betu ne kudikina kudi kumvuija tshinyi?

▪ Mmifuanu kayi ibidi idi Yezu ulonda, ne idi yumvuija tshinyi?

▪ Ndilongesha kayi didi Yezu ufila mu mumvuija ende a nkomenu pa bidi bitangila luepu?