Nshapita wa 113

Budipuekeshi dia Pasaka wa ndekelu

PETELO ne Yone, pa kulonda ngenyi-miludiki ya Yezu, mbamane kufika mu Yeruzaleme bua kuenza malongolola bua Pasaka. Yezu udi ufika ku shoo mu mapingaja, anu mudibi bimueneka, pamue ne bapostolo bakuabu 10. Dîba didi dienda dibuela padi Yezu ne bena diende bapueka Mukuna wa Olive. Eu mmusangu wa ndekelu udi Yezu umona tshimenga etshi mu munya kumukila pa mukuna eu kumpala kua dibiishibua diende.

Mu katupa kîpi, Yezu ne bena diende badi bafika mu tshimenga ne baya ku nzubu wenzelabu difesto dia Pasaka. Badi babanda mu tshibambalu tshialabale tshia kuulu, mudibu basangana bionso bimana kuakaja bua kuenzabu pa nkayabu difesto dia Pasaka. Yezu uvua muindile muanda eu ne mutshima kulukulu, anu mudiye wamba ne: “Mvua mujinge bikole bua kudia nenu [pasaka eu, NW] bangabanga ne meme kumvua bisama.” (Mukenji Mulenga)

Bilondeshile tshilele tshia kabukulu, babanyanganyi ba Pasaka badi banua mpanza inayi ya mvinyo. Mumane kuanyisha lupanza luisatu, anu mudibi bimueneka, Yezu udi wela tuasakidila ne wamba ne: “Angatayi, nuabanyangane; ndi nuambila ne: Tshiena nua mai a mamuma a mvinyo kabidi tô ne [p]alua bukelenge bua Nzambi.”

Munkatshi mua didia Yezu udi ujuka, uteka bilamba biende bia pa mutu, wangata dituaya, ne uwuja mâyi mu dilongo. Pa tshibidilu, muakididianganyi ng’utu utabalela bua buoweshe muenyi wende makasa. Kadi mu nsombelu eu bu mudi muakididianganyi kayiku, Yezu nkayende ng’udi ukuata mudimu eu. Umue wa ku bapostolo uvua mua kubabidila muabi eu; kadi, anu mudibi bimueneka, bu mudiku difuilakana munkatshi muabu, nansha umue kêna wenza nunku. Mpindieu badi balubakana padi Yezu utuadija kubuowesha makasa.

Padi Yezu ufika kudiye, Petelo udi utontolola ne: “Kashidi, kuena mua kungowesha mayi ku makasa nansha!”

“Meme tshiyi mukuoweshe, kuena [luseke lumue nanyi, NW] to,” ke mudi Yezu wamba.

“Mukalenge,” ke mudi Petelo wandamuna, “ki ng’anu makasa anyi, apo kabidi bianza bianyi ne mutu wanyi.” (NW)

“Muntu mumane kuowa mayi, [udi ukengela kuowa anu, NW] ku makasa, bualu ukadi mukezuke yonso. Nuenu penu nudi bakezuke, kadi ki mbonso to.” Udi wamba mêyi aa bualu mmumanye ne: Yudase udi upangadija bua kumufila kudi baluishi.

Padi Yezu ujikija dibuowesha makasa buonso buabu 12, kusangisha ne makasa a mumufidi, Yudase, udi uvuala bilamba biende bia pa mutu ne udiadija tshiakabidi ku mesa. Pashishe, udi ukonka ne: “Nudi bumvue tshindi munuenzele etshi anyi? Nudi numbikila Mulongeshi, kabidi Mukalenge; nudi nuamba anu biakane, ke mundi. Pangikala meme Mukalenge, kabidi Mulongeshi, munuoweshe mayi ku makasa, nuenu penu nuikale nuoweshangana mayi ku makasa. Ndi munuleje tshilejilu etshi bua nuenze penu mundi munuenzele emu. Bulelela, bulelela, ndi nnuambila ne: [mupika, NW] kena mupite mfumuende to; mutumibue kena mupite udi mumutume nansha. Nuenu bamanye bionso ebi, nubienza, nenuikale ba diakalenga.”

Ndilongesha kayipu bulenga difila ku mudimu eu mupuekele! Bapostolo kabena ne bua kukebakeba muaba wa kumpala, bela meji se: buobu ke badi ne mushinga mupitshidile, nunku bakuabu bikale anu babasadila buobu dîba dionso. Badi bakengela kulonda tshilejilu tshifila kudi Yezu. Tshine atshi ki ndioweshangana makasa dia mukiya. Tòo, apo ng’etshi tshia kusadilangana ku budisuile kakuyi kansungasunga, nansha mudimu bawamba mupuekele anyi kawuyi wa disanka. Matewuse 26:20, 21; Markuse 14:17, 18; Lukase 22:14-18; 7:44; Yone 13:1-17, MMM.

▪ Bua tshinyi dimona dia Yeruzaleme kudi Yezu dîba didiye ubuela mu tshimenga bua kuenza difesto dia Pasaka divua dia pa buadi?

▪ Munkatshi mua difesto dia Pasaka, anu mudibi bimueneka, ndupanza kayi ludi Yezu upesha bapostolo 12 panyima pa diamba dibenesha?

▪ Mmudimu kayi uvua muakididianganyi ukumbajila babikidibue patshivua Yezu pa buloba, ne bua tshinyi kawakenjibua dîba dia dienza difesto dia Pasaka kudi Yezu ne bapostolo bende?

▪ Pa kuenza mudimu mupuekele wa diowesha bapostolo bende makasa, kipatshila ka Yezu kavua tshinyi?