1, 2. Bantu badi balonda ‘njila udibu badisunguile’ batu ne lungenyi kayi? Bua tshinyi tudi ne bua kushilangana nabu?

 LELU bantu ba bungi kabatu basue kutumikila to. Batu bangata mapangadika mudibu basue. Mu tshikoso, lungenyi luabu ndua ne: ‘Enza tshionso tshidi muoyo webe musue’ anyi ‘Enza tshiudi musue, kadi kabakukuatshi to.’ Malu aa atu amueneka padi bakanyemesha babenga kulonda bimanyinu bidibu bateka mu njila, padi bangenda kabayi banemeka bipungidi bia malu a makuta ne padi bamfumu ba mbulamatadi bashipa mikenji ivuabu bobu bine bele. Kuditua mu ‘njila udi muntu mudisunguile’ nansha mudibi bibi ne mudibi mua kukebesha njiwu, kuvua kabidi kutangalake bikole mu matuku a Yelemiya.​—Yel. 8:6.

² Udi mumanye ne: bantu badi basue bua Nzambi wa Bukole Buonso abanyishe kabena ne bua kulonda ‘njila udibu badisunguile’ to. Yelemiya wakaleja dishilangana divua pankatshi pa bantu bavua ‘kabayi batumikila dîyi dia Yehowa’ ne aba bavua basue kumutumikila. (Yel. 3:25; 7:28; 26:13; 38:20; 43:4, 7) Yonso wa kutudi udi ne bua kudikonkonona bua kumanya luseke ludiye mu bualu ebu. Bua tshinyi? Bualu Satana udi utamba kuluisha muoyo mutoke wa batendeledi ba Nzambi lelu kupita kumpala. Udi anu bu nyoka udi mubutame, muindile tshia kukuataye ne kutshisuma diakamue bua kutshishipa. Didisuika dietu bua kutumikila dîyi dia Yehowa didi dituambuluisha bua kusemena kule ne mênu a nyoka eu. Kadi ntshinyi tshidi mua kukolesha dipangadika dietu dia kutumikila Yehowa? Malu avua Yelemiya mufunde adi mua kutuambuluisha.

3. Bua tshinyi Yehowa mmukumbanyine ditumikila dietu?

³ Bua tshinyi Yehowa mmukumbanyine ditumikila dietu mu malu onso? Yelemiya udi utuleja bumue bua ku malu atudi ne bua kutumikila Yehowa padiye wamba ne: ‘Nyeye wakafuka buloba ku bukole buende, wakajadika bia pa buloba ku lungenyi luende.’ (Yel. 10:12) Yehowa udi Mfumu wa diulu ne buloba. Tudi ne bua kumutshina kupita bamfumu bakuabu bonso. Yeye udi ne bukenji bua kutuambila bua tutumikile mikenji yende mimpe, idiye mutuelele bua diakalenga dietu.​—Yel. 10:6, 7.

4, 5. (a) Mbualu kayi buvua bena Yuda balonge mu bikondo bia minanga? (b) Mmushindu kayi uvua bena Yuda babenge ‘mâyi a muoyo’ a kudi Yehowa? (c) Mmunyi muudi mua kunua ‘mâyi a muoyo’ a kudi Nzambi?

⁴ Kadi Yehowa kena anu Mfumu wa diulu ne buloba to, udi kabidi utuambuluisha bua kuikala ne muoyo. Bualu ebu buakamuenekela patoke kudi bena Yuda ba mu tshikondo tshia Yelemiya. Bena Ejipitu bavua bapetela mâyi ku musulu wa Nile, kadi kabivua nanku mu buloba bulaya to. Tshisamba tshia Nzambi tshivua tshitamba kupeta mâyi ku diambuluisha dia mvula ne bavua baalamina mu bina bivuabu bumbule. (Dut. 11:13-17) Anu Yehowa nkayende ke uvua mua kutuma mvula bua kubolesha buloba ne kumenesha biakudia. Uvua kabidi mua kubenga kulokesha mvula uvuabu bindila ne muoyo mujima. Nunku mu matuku a Yelemiya, bena Yuda bavua batombokele Nzambi bavua bapeta bikondo bia minanga mikole ivua yumisha bia pa madimi, mionji ya mvinyo, bina bia mâyi ne bina bivuabu balamina mâyi.​—Yel. 3:3; 5:24; 12:4; 14:1-4, 22; 23:10.

⁵ Nansha muvua bena Yuda abu bangata mâyi etu aa ne mushinga, bakabenga ‘mâyi a muoyo’ avua Yehowa ubapesha tshianana. Bakenza nanku pakabengabu kutumikila mikenji ya Nzambi ne kudia bipungidi ne bisamba bikuabu. Bakakenga bua bualu abu anu bu bantu badi bela mâyi mu bina bidi ne mitanta, bidi kabiyi mua kualama tshikondo  tshia dikenga dia mâyi. (Bala Yelemiya 2:13; 17:13.) Katuitabi bua kuenza bu bobu ne kudikebela dikenga dinene to. Yehowa udi utungunuka ne kutupesha mibelu mivule ku diambuluisha dia Dîyi diende didiye mufundishe ku nyuma wende. Nunku, bidi bimueneka patoke ne: bua ‘mâyi a muoyo’ a mu Dîyi dia Nzambi kutuambuluishawu, tudi ne bua kudilonga ne kudienzeja bua kutumikila malu adimu.

6. (a) Leja muvua mukalenge Sedekiya umona kutumikila Yehowa. (b) Buebe wewe, bua tshinyi Sedekiya uvua mupote?

⁶ Bu muvua dituku divua bena Yuda ne bua kubadila Nzambi malu disemene, ditumikila diakalua ne mushinga wa bungi. Muena Yuda yonso uvua ne bua kulekela njila wende mubi ne kutuadija kutumikila Yehowa bua amuanyishe ne amulame. Ke tshivua mukalenge Sedekiya ne bua kuenza. Kavua mudisuike bua kuenza malu mimpe to. Pavua bantu bende bamuambile ne: bavua basue kushipa Yelemiya, kakapeta dikima dia kubakandika to. Anu mutuvua bamone mu nshapita mushale, Ebede-meleke wakasungila Yelemiya ne Yelemiya kulua kusengelela Sedekiya wamba ne: ‘Ndi nkusengelela ne: Utumikile dîyi dia Yehowa.’ (Bala Yelemiya 38:4-6, 20.) Nunku, mukalenge uvua ne bua kuangata dipangadika dia kutumikila Nzambi bua kupetaye diakalenga.

7. Tela malu kampanda adi mua kuteta ditumikila diebe.

⁷ Kutumikila Nzambi kudi ne mushinga lelu anu muvuaku nawu mu matuku a Yelemiya. Dipangadika diebe dia kutumikila Yehowa nditekete anyi ndikole? Wewe mufike muaba udibu baleja bindindimbi bia bantu butaka ku Enternete mu mpukapuka, neutungunuke ne kubitangila anyi neuluishe diteta edi ne kukanga tshiamu tshiebe? Newenze tshinyi bikala muntu udi kayi muena Kristo ku mudimu anyi mu kalasa mukulombe bua nunangangane nende? Newikale ne bukole bua kubenga anyi? Mikanda ya batontolodi anyi malu adibu bafunde ku Enternete atuku akulobesha anyi utu muakine? Mu malu aa anyi makuabu, kupu muoyo mêyi adi mu Yelemiya 38:20 to.

8, 9. (a) Bua tshinyi mbimpe kuteleja bakulu padibu badienzeja bua kukuambuluisha? (b) Mmunyi muudi ne bua kumona mibelu idi bakulu bakupesha njila ne njila?

⁸ Misangu ya bungi Yehowa uvua utuma Yelemiya kudi bantu bende bua kubambila mukenji bu mudi wa ne: ‘Buonso buenu nulekele kuenda mu njila mibi, nulengeje bienzedi bienu ne malu anudi nuenza.’ (Yel. 7:3; 18:11; 25:5; bala Yelemiya 35:15.) Bia muomumue, lelu bakulu bena Kristo badi benza muabu muonso bua kuambuluisha bena Kristo nabu bua kabapambuki.  Bakulu bobu bakubele bua ulekele dikasa dibi diudi mulonde, ubateleje. Badi ne tshipatshila tshimue ne tshivua natshi Yelemiya.

⁹ Bakulu badi mua kukuvuluija mibelu ya mu Bible ikavuabu bakupeshe. Umanye ne: kupesha muntu mibelu njila ne njila kakutu kutekete to, kadi kudi kutamba kukola padi muntu udibu babela wenza malu bu bena Yuda ba bungi ba mu matuku a Yelemiya. Udienzeje bua kumona ne: bionso bidi bakulu benza bua kukubela bidi bileja mudi Yehowa mukunange. Umanye kabidi ne: Yelemiya kavua mua kuambulula malu akavuaye muambe bu bantu bashintuluke to. Nunku, wewe kuyi musue bua bakubele njila ne njila, tumukila diakamue bidibu bakuambila.

10. Bua tshinyi Yehowa katu ufuila bantu luse tshianana tshianana?

¹⁰ Nansha tuetu benze bishi, katuena mua kutumikila Yehowa mu matuku etu aa katuyi tuenza kalema nansha kamue to. Ke bualu kayi tudi tumuela tuasakidila bualu udi witaba bua kutubuikidila bilema bietu. Kadi katu ufuila bantu luse tshianana tshianana to. Bua tshinyi? Bualu Yehowa mmukine bubi ne muaba udibu buendela. (Yesh. 59:2) Ke bualu kayi mmusue kutuishibua ne: tudi bakumbanyine luse luende.

11. Bua tshinyi muntu kena mua kusokoka bubi?

¹¹ Anu mutukadi bamone, bena Yuda ba bungi ba mu matuku a Yelemiya bavua ne tshibidilu tshia kubenga kutumikila Nzambi ne nunku bavua banaya ne lutulu luende ne luse luende. Lelu muena Kristo udiku mua kupeta tshibidilu tshia mushindu eu anyi? Eyowa, yeye mulengulule mikenji ya Yehowa ne muditue mu kuenza kua malu mabi. Imue misangu bualu ebu butu buenzeka patoke, bu mudi padi muntu udi mu dibaka utuadija kunangangana ne bantu bakuabu. Kadi nansha bubi bobu kabuyi bumanyike kudi bantu, muntu udi ubenga kutumikila Yehowa udi udikebela ntatu. Muntu udi wenza malu mabi mu musokoko udi mua kuela meji ne: ‘Muntu nansha umue kakumanya to.’ Kadi bulelela budi ne: Nzambi utu umona malu  adi mu mitu ya bantu ne mu mioyo yabu ne utu umona too ne malu adi enzeka mu musokoko. (Bala Yelemiya 32:19.) Kadi ntshinyi tshidibu ne bua kuenza ne muntu udi mushipe mikenji ya Nzambi?

12. Ntshinyi tshidi bakulu ne bua kuenza imue misangu bua kulama tshisumbu?

¹² Bena Yuda ba bungi bakabenga diambuluisha divua Yehowa ubapesha misangu ne misangu ku butuangaji bua Yelemiya. Bia muomumue, muntu udi muenze bubi bunene lelu udi mua kubenga diambuluisha dia bakulu ne kubenga kunyingalala. Dîba adi, bakulu badi ne bua kulonda tshidi Bible wamba ne kumuipata mu tshisumbu bua kutshilama. (1 Kol. 5:11-13; tangila kazubu kadi kamba ne: “ Pavuabu kabayi ne mikenji,” kadi mu dibeji dia 73.) Kadi tudiku mua kuamba ne: kakutshiena ditekemena bua muntu eu, Yehowa kakumuanyisha kabidi anyi? Tòo. Bena Isalele bavua batombokele Nzambi matuku a bungi, kadi uvua ubambila ne: ‘Nuenu bana banyi bandekedi, pinganayi kundi, nennuondape ku bupidia buenu.’ (Yel. 3:22) a Yehowa udi ulomba benji ba malu mabi bua bapingane kudiye. Eyowa, udi ubasaka bua kuenza nunku.

13. Bikala muntu musue kupingana kudi Yehowa, udi ne bua kuitaba tshinyi?

¹³ Anu muvua Yelemiya muleje, bua kupingana kudi Nzambi muntu udi ne bua kudiebeja ne: ‘Mbubi kayi bundi  muenze?’ Pashishe, ku diambulusha dia Dîyi dia Nzambi, udi ne bua kubuitaba. Bena Yuda ba mu tshikondo tshia Yelemiya bavua batungunuka ne kuenza malu mabi kabavua badiela lukonko elu to. Bavua babenga kuitaba ne: bavua benze bubi bunene, ne nunku Yehowa kakabafuila luse bualu kavua ne mushindu wa kubafuilalu to. (Bala Yelemiya 8:6.) Kadi muntu udi unyingalala ne muoyo umue udi witaba ne: padiye mubenge kutumikila Yehowa, mmupendeshishe dîna diende ne munyange lumu lua tshisumbu. Udi kabidi umvua bibi bua ntatu idiye mua kuikala mukebele bantu bavua kabayi ne bualu. Udi ne bua kumanya ne: anu padiye witaba malu mabi onso adi bubi buende bukebeshe ke pikala dilomba diende dia luse mua kuikala ne bujitu ku mêsu kua Yehowa. Kadi bua Nzambi kuanyishaye kabidi muntu, bidi bilomba malu makuabu.

14. Mmushindu kayi udi muntu ‘upingana kudi Yehowa’ ne muoyo mutoke? (Sakidila malu adi mu kazubu kadi kamba ne: “ Kunyingalala kudi kumvuija tshinyi?”)

¹⁴ Muntu udi unyingalala ne muoyo umue udi ukonkonona tshivua tshimufikishe ku bubi, majinga ende ne bibidilu biende. (Bala Muadi 3:40, 41.) Neakonkonone malu a mu nsombelu  wende adi aleja butekete buende bu mudi malanda ende ne bantu badi kabayi balume nende anyi bakaji nende, tshilele tshiende tshia dinua maluvu anyi makanya, malu atuye wenza ku Enternete anyi mu midimu yende ya bianza. Anu mutu mamu usukula nzubu wende wa tshikuku too ne mu matumba bua ikale ne mankenda, ke mudi muntu udi unyingalala ne bua kuenza muende muonso bua kutokesha lungenyi luende ne malu adiye wenza pa nkayende. Udi ne bua ‘kupingana kudi Yehowa’ ne mutshima mutoke pa kukumbaja mikenji yende ne kuyitumikila mu nsombelu wende. Kuvua bena Yuda bakuabu mu matuku a Yelemiya bavua bapingane kudi Yehowa “ne lubombo.” Bakadingidija muvuabu banyingalale, kadi kabavua bashintulule mioyo yabu ne bienzedi biabu to. (Yel. 3:10) Muntu udi ulomba luse ne muoyo umue mmushilangane nabu bualu yeye kena ukeba kudingakaja Yehowa ne tshisumbu tshiende to. Mmusue kulekela malu mabi onso avuaye muenze bua Nzambi amufuile luse pamutu pa kujinga bua kulama lumu luende anyi kupetulula malanda ne balela bende anyi bantu bakuabu mu tshisumbu.

15. Mmasambila a mushindu kayi adi muntu udi unyingalala ne muoyo mujima wenza?

¹⁵ Kusambila kudi ne mushinga wa bungi padi muntu  unyingalala. Ku kale, bantu bavua ne tshibidilu tshia kuela bianza mulu pavuabu basambila. Lelu, padi muntu unyingalala ne muoyo umue mu disambila, udi ‘ubandisha mutshima wende ne bianza diatshimue kudi Nzambi’ anu muvua Yelemiya muleje. (Muad. 3:41, 42) Kumvua bibi kudi kusaka muntu udi unyingalala bua kuenza malu bilondeshile luse ludiye ulomba. Udi wenza masambila ne muoyo wende mujima.

16. Bua tshinyi mbimpe kupingana kudi Nzambi?

¹⁶ Kakuyi mpata udi mufike ku dimona ne: muntu udi witaba bilema biende udi mua kuluisha lutambishi. Kadi tshia kumanya ntshia ne: Yehowa mmusue bua bantu badi benze bubi bapingane kudiye. Nzambi udi umvuila muntu padiye umona ne: mmunyingalale ne muoyo mujima. ‘Mutshima wende udi umujinga’ bualu mmusue kubuikidila bantu bonso badi banyingalala bua mibi yabu anu muvuaye muenzele bena Isalele bavua bapatuke mu bupika ne balukile kuabu. (Yel. 31:20) Bidi bitukolesha ku muoyo patudi tumanya ne: Nzambi mmulamine bantu badi bamutumikila ditalala ne ditekemena. (Yel. 29:11-14) Badi mua kupeta kabidi muaba munkatshi mua batendeledi bende ba lulamatu.

17, 18. (a) Bena Lekaba bavua banganyi? (b) Anu mudibi bileja mu dibeji dia 77, bavua bamanyike ku tshinyi?

¹⁷ Kutumikila Yehowa mu malu onso kudi kulama muntu. Bualu ebu budi bumuenekela ku tshilejilu tshia bena Lekaba ba mu tshikondo tshia Yelemiya. Nkambua wabu Yonadaba muena Kena uvua muditeke ku luseke lua Yehu, wakabapesha mikenji kampanda kukavua bidimu bipite pa 200. Umue wa kudiyi uvua ubakandika bua kunua mvinyo. Yonadaba ukavua mufue kale, kadi bena Lekaba batshivua anu batumikila dîyi diende. Bua kubateta, Yelemiya wakaya nabu mu nzubu wa tshidilu wa ku ntempelo, kubatekela mvinyo ku mesa ne kubambila bua kunua. Bakamuambila ne: ‘Katuena tunua mvinyo nansha.’​—Yel. 35:1-10.

¹⁸ Bua bena Lekaba, kutumikila dîyi dia nkambua wabu ukavua mufue ku kale kuvua ne mushinga wa bungi. Batendeledi  balelela badi pabu ne bua kutumikila mikenji ya Nzambi wa muoyo ne mitalu kupita too ne bena Lekaba. Dipangadika dia bena Lekaba bua kutumikila dîyi dia nkambua wabu divua dilenge Yehowa bikole ne diakabavuija bashilangane bikole ne bena Yuda bavua balekele Nzambi. Ke bualu kayi wakabalaya bua kubalama ku dikenga divua dilua. Bualu ebu kabuenaku butuleja ne: bantu badi batumikila Yehowa mu malu onso badi ne bua kuikala bashindike ne: neabalame ku dikenga dinene anyi?​—Bala Yelemiya 35:19.

19. Nzambi udi mua kukulama ku tshinyi wewe mumutumikile?

¹⁹ Katuena ne bua kumona ne: Nzambi uvua ulama anu batendeledi bende ba kale to. Nansha lelu Yehowa udi ulama  bantu badi bamutumikila bua malanda abu nende kaanyanguki. Anu muvua bimanu bile bilama misoko kudi baluishi ku kale, mikenji ya Nzambi idi ilama bantu badi bayilonga ne bayitumikila. Neulamate mikenji ya Nzambi bua ikulame bu tshimanu anyi? Ikala mutuishibue ne: wewe muenze nanku, newikale ne diakalenga. (Yel. 7:23) Kudi malu a bungi adi aleja mudi bualu  ebu bulelela.​—Tangila kazubu kadi kamba ne: “ Kutumikila Yehowa kudi kutulama.”

20, 21. (a) Ntshinyi tshiudi ne bua kuikala mushindike paudi wenzela Yehowa mudimu? (b) Ntshinyi tshivua mukalenge Yehoyakima muenze pakamubadilabu malu a kudi Nzambi avua Yelemiya mufunde?

²⁰ Baluishi badi mua kukupangisha bua kuenzela Nzambi mudimu bimpe nansha bobu bikale ba mu dîku dienu, ba ku mudimu, ba mu kalasa anyi bamfumu ba mbulamatadi ba muaba uudi. Kadi ikala mushindike ne: wewe utumikila Yehowa mu malu onso nansha paudi mu ntatu, neakuambuluishe bua kutantamena ntatu ya mishindu yonso. Kupu muoyo ne: Nzambi uvua mulaye bua kulama Yelemiya mu buluishi buonso buvuaye mua kupeta ne ke tshiakenzaye. (Bala Yelemiya 1:17-19.) Mu matuku a mukalenge Yehoyakima ke muakaleja Nzambi muvuaye muambuluishe Yelemiya menemene.

²¹ Mu bakalenge bonso ba Isalele, kakuena mukalenge uvua muluishe baleji-mpala ba Nzambi bu Yehoyakima to. Tudi mua kumona bualu ebu mu tshiakenzekela muprofete Uliya, wakenza pende mudimu mu matuku a Yelemiya. Pavuaye munyeme muye mu Ejipitu, mukalenge mubi Yehoyakima wakatuma dîyi bua bamulonde ne bamukuate. Pakaluabu ne Uliya muprofete wa Nzambi, wakamushipa. (Yel. 26:20-23) Mu tshidimu tshinayi tshia bukokeshi bua Yehoyakima, Yehowa wakambila Yelemiya bua kufunda mêyi onso akavuaye mumuambile ne kuabala ne dîyi dikole ku ntempelo. Yehoyakima wakapeta muvungu wa Yelemiya ne kulombaye muena mudimu wende bua amubadile. Pavuaye wenda ubala, mukalenge uvua wenda upanda dibeji ku dimue ku dimue ne udiela mu kapia nansha muvua bamue banene ba mu bukalenge buende bamubele bua kenji nanku. Pashishe kutumaye dîyi bua bakuate Yelemiya ne Baluka. Ntshinyi tshiakenzeka? “Yehowa wakabasokoka.” (Yel. 36:1-6; bala Yelemiya 36:21-26.) Yehowa kakitaba bua Yehoyakima enzele bantu bende babidi abu bibi to.

22, 23. Tshilejilu tshia Ntemu kampanda wa mu Asia wa pankatshi tshidi tshikuleja tshinyi bua diambuluisha dia Nzambi?

²² Yehowa yeye mumone ne: mbikumbane bua kusokoka  basadidi bende ba lelu ku njiwu kampanda, udi mua kuenza nanku. Kadi misangu ya bungi, utu ubapesha dikima ne meji bua kumutumikila ne kutungunuka ne kuyisha lumu luimpe. Tuangate tshilejilu tshia Gulistan, muanetu mukuabu wa bakaji udi udikoleshila bana banayi. Yehowa mmumuambuluishe bikole. Mu tshikondo kampanda, anu yeye nkayende ke uvua Ntemu mu tshitupa tshinene tshia mu Asia wa pankatshi muvua bamfumu ba mbulamatadi baluisha mudimu wa kuyisha Bukalenge bua Nzambi. Tshisumbu tshidi tshienze bu tshidi pabuipi tshidi mutantshi wa kilometre 400. Nunku Gulistan utu umonangana ne bena Kristo bashindame anu ku mpukapuka. Nansha mudiku buluishi ne ntatu mikuabu, udi uyisha ku nzubu ne ku nzubu ne upeta bantu ba bungi badi banyisha bulelela. Bilondeshile luapolo kampanda lua matuku adi panshi aa, uvua mulongeshe bantu bapite pa 20 Bible ne udi utabalela kabidi tshisumbu tshia bantu bonso abu.

²³ Anu muvua Nzambi muambuluishe Yelemiya ne Bantemu bu mudi Gulistan, udi mua kukuambuluisha pebe pamue ne batendeledi bende bakuabu badi bamutumikila. Ikala mudisuike bua kumutumikila yeye kumpala kua kutumikila bantu. Dîba adi, buluishi ne ntatu mikuabu kabiakukupangisha bua kutumbisha Nzambi umuepele mulelela kumpala kua bantu ba muaba uudi musombele to.​—Yel. 15:20, 21.

24. Mmasanka kayi adi ditumikila dikupetesha?

²⁴ Muntu kena mua kupeta disanka ne nsombelu muimpe padiye kayi ulonda mêyi a Mufuki wetu to. (Yel. 10:23) Wewe mumane kulonga malu avua Yelemiya mufunde bua ditumikila, udiku umona mishindu mikuabu iudi mua kulekela Yehowa ulombola biendedi biebe mu malu onso anyi? Anu mikenji yende ke idi mua kukulombola bua upete disanka ne diakalenga. Yehowa udi ukusengelela wamba ne: ‘Umvua dîyi dianyi, bua upete diakalengele.’​—Yel. 7:23.