Nansha mudi bena Kristo kabayi muinshi mua Mikenji ya Mose, mikenji ibidi mitambe bunene eyi: kunanga Nzambi ne kunanga mukuebe, idi ileja mu tshikoso tshidi Yehowa utulomba bua kuenza. (Mat 22:37-39) Katuena tupeta dinanga dia nunku ku tshilelelu to. Bidi bikengela kudienzeja bua kudipeta. Mushindu kayi? Umue mushindu munene nkubala Bible dituku dionso. Patudi tukonkonona bibadi bishilashilangane bia bumuntu bua Nzambi bidi mu Bible, tudi tufika ku ‘dibandila bulengele bua Yehowa.’ (Mis 27:4) Nunku dinanga ditudi bamunange nadi nedikole ne netuikale ne mmuenenu wa malu bu wende. Ebi nebitusake bua kutumikila mikenji ya Nzambi, too ne wa kudifila tuetu bine bua bakuabu. (Yne 13:34, 35; 1Yn 5:3) Mona malu asatu audi mua kuenza bua dibala dia Bible kukusankishadi bikole:

• Difuanyikijila biudi ubala, ukuate mudimu ne biumvuilu biebe. Paudi ubala, enza anu bu ne: udi muaba au. Ntshinyi tshiudi umona? Ntshinyi tshiudi umvua anyi ndipembu kayi diudi umvua? Bena bualu buudi ubala abu badi badiumvua bishi?

• Shintulula mishindu iudi ulonga Bible. Udi mua: kubala ne dîyi dikole, anyi kulondesha mu Bible webe paudi wenda uteleja mêyi makuata a tshitupa tshiudi ubala. Bala malu adi atangila muntu kampanda anyi tshiena-bualu kampanda pamutu pa kubala nshapita anu mudiyi milondangane mu Bible. Tshilejilu, udi mua kubala Tshisakidila tshia A7 anyi B12 mu Bible—Nkudimuinu wa bulongolodi bupiabupia bua kumanya malu adi atangila Yezu. Bala nshapita mujima udibu bangatshile mvese wa dituku. Udi kabidi mua kubala mikanda ya mu Bible anu mudiyi milondandangane amu.

• Bala ne tshipatshila tshia kumvua. Kubala nansha nshapita umue dituku dionso ne tshipatshila tshia kumvua ne kuelangana meji nkuimpe kupita kubala nshapita ya bungi anu bua kujikija Bible. Konkonona malu adi atangila tshitupa tshiudi ubala. Enza mudimu ne tuarte ne mvese miledila idi mu mulongo wa munkatshinkatshi. Kebulula bualu nansha bumue buudi kuyi mumvue bimpe. Biobi bikumbana, paudi welangana meji a biudi mubale, enza minite bungi bua muomumue ne pauvua ubala.