Yobo 41:1-34
-
Nzambi udi umvuija Leviyatana udi ukemesha (1-34)
41 “Udi mua kukuata Leviyatane*+ ne ndoboPeshi kukuata ludimi luende ne muonji anyi?
2 Udi mua kubueja muonji* mu mimpempe yendePeshi kutubula mbanga yende ne ndobo* anyi?
3 Neakusengelele ne misengelelu ya bungi anyi?Peshi neakule nebe ne dîyi dimpe anyi?
4 Neadie nebe tshipungidiBua wewe kumuvuija mupika webe bua kashidi anyi?
5 Neunaye nende bu udi unaya ne nyunyiPeshi kumusuikila bana bebe batekete ba bakaji ku nshinga anyi?
6 Bangenda mushinga nebenduluke nende mushinga anyi?
Nebamuabanye munkatshi mua benduluki ba mushinga anyi?
7 Neuwuje tshiseba tshiende ne misongolo idi ne mênu+Peshi mutu wende ne mafuma a kukuata nawu mishipa anyi?
8 Teka tshianza tshiebe pambidi pende,Neuvuluke mvita eyi ne kuakuenza nanku kabidi nansha!
9 Ditekemena dionso dia kumukokesha didi patupu.
Dimutangila tshianana didi mua kukutshimuna.*
10 Kakuena muntu udi ne dikima dia kumubundula to.
Nunku, nnganyi udi mua kuimana kumpala kuanyi?+
11 Nnganyi uvua mudianjile kumpesha tshintu bua meme mmupingajile?+
Tshionso tshidi muinshi mua diulu ntshianyi meme.+
12 Tshiakushala mupuwe bua bidimba biende,Bua bukole buende ne bua mubidi wende udi muenza bimpe to.
13 Nnganyi udi mumbushe tshilamba tshiende tshia pa mutu?
Nnganyi wabuela mu mbanga yende mikangula?
14 Nnganyi udi mua kukangula biibi bia mukana* muende ku bukole?
Mênu ende adi manyunguluke adi enza buôwa.
15 Pa nyima wende padi milongo ya mabamba*Makuatakanangane bikole.
16 Dibamba dionso ndibuelakane bimpe ne dikuabuBipangisha kapepele mua kubuelaku pankatshi pawu.
17 Mmalamakanangane ne makuabu;Mmakuatakane bikole ne kabena mua kuatulakaja nansha.
18 Kupemba kuende kudi kupatula bukenke,Mêsu ende adi bu nsese ya pa kabundubundu.
19 Mipenyi idi ipatuka mukana muende,Tupia tudi tutudika tudi tutangalaka.
20 Muishi udi ufukuka mu mimpempe yendeBu tshikutu tshia kapia tshitemesha ne bisonsa bia ndawu.
21 Mupuya wa mu diulu diende udi ukuatshisha makala kapia,Ne ludimi lua kapia ludi lupatukila mukana muende.
22 Bukole bua bungi budi mu nshingu muende,Buôwa bukole budi bunyema kumpala kuende.
23 Minyengu ya mubidi wende mmilamakane bikole pamue;Mmikole anu bu biamu biasa pambidi pende, kayena mua kunyunga.
24 Muoyo wende mmukole bu dibue,Eyowa, mukole bu dibue dia mpelu dia muinshi.
25 Padiye ujuka, nansha bantuba bukole badi bapeta buôwa;Kudikupa kuende kudi kuenza tshinyungunyungu.
26 Kakuena muele wa mvita udi umulenga wamutshimuna,Nansha difuma, anyi musongolo, anyi lusongo lua mukete.+
27 Udi umona tshiamu tshifiike bu kasonsa,Tshiamu tshia mitaku bu mutshi mubole.
28 Mukete kawena umunyemesha to;Mabue a kukupa ne ndunduadi alua bu lusona lumuasa.
29 Udi umona tshibonge bu lusona,Ne udi useka muadi wa difuma dikese.
30 Muinshi muende, udi bu biyoyi bitue;Udi udiadija mu bitotshi bu tshintu tshia kushipula natshi.+
31 Udi usabisha muinshi mua mâyi anu bu luesu;Udi uvuandulula mbuu buluesu lua mafuta a luondapu.
32 Udi ushiya mulanjilanji wa mâyi ubalakana mu njila wende.
Muntu udi mua kuela meji ne: muinshi mua mâyi mudi nsuki mitoke.
33 Kakuena tshintu tshidi tshifuanangane nende pa buloba to;Ntshifukibua tshienza bua katshikadi ne buôwa.
34 Tshintu tshionso tshidi tshidibandisha, udi utshitangila ne luonji.
Yeye udi mukalenge ku mutu kua nyama yonso minene ya tshisuku.”
Note
^ Pamuapa nngandu.
^ Ku mua.: “tshisonsa tshia kashiba.”
^ Ku mua.: “dieba.”
^ Anyi “kukuzaka panshi.”
^ Ku mua.: “mpala.”
^ Anyi pamuapa: “Kudisua kuende mmilongo yende ya mabamba.”
