Yeshaya 64:1-12
64 Bu wewe nansha mupande diulu, mupueke panshi,Nunku mikuna ivua mua kukanka bua bualu buebe,
2 Bu padi kapia kosha tshisalasala,Ne kapia kasabisha mâyi,Nunku dîna diebe divua mua kumanyika kudi baluishi bebe,Ne bisamba bivua mua kuzakala kumpala kuebe!
3 Pauvua muenze malu adi akuatshisha buôwa atuvua katuyi mua kutekemena,+Wakapueka, mikuna kukanka kumpala kuebe.+
4 Katshia ku kale kakuena muntu udi mumvue anyi mufile ditshi,Kakuena nansha dîsu dikadi dimone Nzambi mukuabu pa kumbusha weweUdi wenza mudimu bua bantu badi batungunuka ne kumuindila.*+
5 Wewe udi mutuilangane ne bantu badi benza malu makane ne disanka,+Aba badi bakuvuluka ne balonda njila yebe.
Mona! Wewe uvua mufiike munda, patuvua batungunuke ne kuenza mpekatu,+Tuakenza nunku tshikondo tshile.
Mpindieu, tudi ne bua kupandishibua anyi?
6 Ne tuetu bonso tudi balue bu muntu mukoya,Ne bienzedi bietu bionso bia buakane bidi bu tshilamba tshia ku mashi.+
Netufubidile bu dibeji dia mutshi,Ne bilema bietu nebiye netu bu lupepele.
7 Kakuena muntu udi ubila dîna diebe,Muntu nansha umue udiudisonsola bua kukulamata,Bualu udi mutusokoke mpala webe,+Ne udi mutunyanyishe* bua* tshilema tshietu.
8 Kadi mpindieu, Yehowa wetu, wewe udi Tatu wetu.+
Tuetu tudi diima, ne wewe udi Mufumbi wetu;*+Tuetu bonso tudi mudimu wa tshianza tshiebe.
9 Kutambi kufiika munda, Yehowa wetu,+Ne kuvuluki tshilema tshietu bua kashidi.
Tutangila koku, bualu tuetu bonso tudi bantu bebe.
10 Bimenga biebe bia tshijila mbilue tshipela.
Siona mmulue tshipela,Yelushalema muaba udi munda mutupu.+
11 Nzubu* wetu wa bunsantu ne butumbi,*Muaba uvua bankambua betu bakutumbishila,Mbamoshe ne kapia,+Ne bintu bionso bituvua banange bikole mbishale bikulu.
12 Bua bualu ebu, Yehowa wetu, neutungunuke ne kudikanda anyi?
Neushale mupuwe, utulekela tukengeshibua bikole nunku anyi?+
Note
^ Anyi “bamuindila ne lutulu luonso.”
^ Ku mua.: “ku tshianza tshia.”
^ Ku mua.: “mutuengulule.”
^ Anyi “Yeye uvua mutuenze.”
^ Anyi “Ntempelo.”
^ Anyi “bulengele.”
