Yelemiya 41:1-18
41 Mu ngondo wa muanda mutekete, Yishemaele+ muana wa Netanya muana wa Elishama, uvua wa mu ndelanganyi ya bukalenge* ne muikale umue wa ku bantu banene ba mukalenge, wakalua ne bantu bakuabu dikumi kudi Gedaliya muana wa Ahikama ku Misepa.+ Pavuabu badia biakudia pamue ku Misepa,
2 Yishemaele muana wa Netanya ne bantu dikumi bavua nende bakajuka, kushipabu Gedaliya muana wa Ahikama muana wa Shafana ne muele wa mvita. Nunku wakashipa muntu uvua mukalenge wa Babilona muteke ku mutu kua ditunga.
3 Yishemaele wakashipa kabidi bena Yuda bonso bavua ne Gedaliya mu Misepa, kabidi ne basalayi ba bena Kasada bavua muaba au.
4 Dituku dibidi panyima pa bamane kushipa Gedaliya, kumpala kua muntu nansha umue kayi muanji kumanya bualu ebu,
5 bantu 80 bakalua bafumina ku Shekeme,+ ku Shilo,+ ne ku Samalea.+ Miedi yabu ivua mikungula, bilamba biabu bivua bipandike, bavua baditape mputa,+ ne bavua ne milambu ya ntete ne budimbu bua mupuya muimpe+ mu tshianza tshiabu bua kufila ku nzubu wa Yehowa.
6 Ke Yishemaele muana wa Netanya kupatuka ufuma ku Misepa bua kutuilangana nabu, uya wenda udila. Pakatuilanganaye nabu, wakabambila ne: “Luayi kudi Gedaliya muana wa Ahikama.”
7 Kadi pakabuelabu mu tshimenga, Yishemaele muana wa Netanya ne bantu bende bakabashipa, kubelabu mu tshina tshia kulamina mâyi.
8 Kadi kuvua bantu dikumi ba munkatshi muabu bavua bambile Yishemaele ne: “Kutushipi to, bualu tudi basokoke bibutshilu bia blé, orje, mafuta ne buitshi mu mpata.” Nunku yeye wakadikanda bua kubashipa pamue ne bana babu.
9 Yishemaele wakela bitalu bionso bia bantu bavuaye mushipe mu tshina tshinene tshia kulamina mâyi tshivua mukalenge Asa muenze bua bualu bua Bâsha mukalenge wa Isalele.+ Etshi tshivua tshina tshia kulamina mâyi tshivua Yishemaele muana wa Netanya muwuje ne bantu bavuaye mushipe.
10 Yishemaele wakakuata bantu bonso bavua bashale mu Misepa,+ kusangisha ne bana ba bakaji ba mukalenge ne bantu bonso bavua bashale mu Misepa, bavua Nebuzaladana mfumu wa balami mushile Gedaliya+ muana wa Ahikama bua kulama. Yishemaele muana wa Netanya wakabakuata ne wakaya nabu bua kusabuka dia muamua dia bena Amona.+
11 Pakumvua Yohanana+ muana wa Kalea ne bamfumu bonso ba tshiluilu bavua nende lumu lua malu onso mabi avua Yishemaele muana wa Netanya muenze,
12 bakangata bantu bonso, kuyabu bua kuluisha Yishemaele muana wa Netanya, kumusanganabu pabuipi ne mâyi manene a* mu Gibeona.
13 Bantu bonso bavua ne Yishemaele bakasanka pakamonabu Yohanana muana wa Kalea ne bamfumu bonso ba tshiluilu bavua nende.
14 Pashishe bantu bonso bavua Yishemaele mukuate ku Misepa+ bakakudimuka, kupinganabu ne Yohanana muana wa Kalea.
15 Kadi Yishemaele muana wa Netanya ne bantu bende muanda mukulu bakapanduka mu bianza bia Yohanana, kuyabu kudi bena Amona.
16 Yohanana muana wa Kalea ne bamfumu bonso ba tshiluilu bavua nende bakangata bantu bavua bashale mu Misepa, bavuabu basungile mu bianza bia Yishemaele muana wa Netanya yeye mumane kushipa Gedaliya+ muana wa Ahikama. Bakapingana ne bantu balume, basalayi, bantu bakaji, bana, ne bena mudimu ba mu lubanza lua mukalenge bafumina ku Gibeona.
17 Nunku bakaya, kusombelabu muaba wa tshilala benyi wa Kimehama pabuipi ne Beteleheme,+ bakeba kuya kubuela mu Ejipitu+
18 bua bualu bua bena Kasada. Bualu bavua babatshina, katshia Yishemaele muana wa Netanya washipa Gedaliya muana wa Ahikama, uvua mukalenge wa Babilona muteke ku mutu kua ditunga.+
