Yelemiya 39:1-18
39 Mu tshidimu tshia tshitema tshia Sedekiya mukalenge wa Yuda, mu ngondo wa dikumi, Nebukadenesâ* mukalenge wa Babilona wakalua ne tshiluilu tshiende tshionso ku Yelushalema, ne bakamutshintshimika.+
2 Mu tshidimu tshia 11 tshia Sedekiya, mu ngondo muinayi, mu dituku dia tshitema dia ngondo au, bakapanda tshimanu tshia tshimenga.+
3 Bakokeshi bonso ba mukalenge wa Babilona bakabuela, mmumue ne: Samagâ* Nêgala-shalesê, Labasalisa* Nebo-sâsekima, Labamaga* Nêgala-shalesê, ne bakokeshi bakuabu bonso ba mukalenge wa Babilona, kusombabu mu Tshiibi tshia Pankatshinkatshi.+
4 Pakabamona Sedekiya mukalenge wa Yuda ne basalayi bonso, bakanyema,+ bakapatuka tshimenga butuku butuku, kuyilabu mu njila wa ku lupangu lua mukalenge, kupitshilabu mu tshiibi tshidi pankatshi pa bimanu bibidi, ne bakatungunuka ne njila wa ku Alabâ.+
5 Kadi tshiluilu tshia bena Kasada tshiakabalonda, kupetelabu Sedekiya mu mpata ya bipela ya Yeliko.+ Kumukuatabu, kuyabu nende kudi Nebukadenesâ* mukalenge wa Babilona ku Libela+ mu buloba bua Hamate,+ kuakamukoselaye tshibawu.
6 Mukalenge wa Babilona wakashipa bana ba balume ba Sedekiya mu mêsu muende ku Libela, ne mukalenge wa Babilona wakashipa kabidi bantu banene bonso ba mu Yuda.+
7 Pashishe wakashipa mêsu a Sedekiya, panyima wakamusuika ne nkanu ya tshiamu tshia mitaku bua kuya nende mu Babilona.+
8 Pashishe bena Kasada bakosha nzubu* wa mukalenge ne nzubu ya bantu,+ kupulabu ne bimanu bia Yelushalema.+
9 Nebuzaladana+ mfumu wa balami wakakuata bantu bavua bashale bavuabu bashiye mu tshimenga, bavua banyeme badifile kudiye, ne muntu yonso uvua mushale, kuya nabu mu Babilona.
10 Kadi Nebuzaladana mfumu wa balami wakashiya mu buloba bua Yuda bamue bantu ba mu buloba bavua bapele menemene, bavua kabayi ne kantu. Dituku adi wakabapesha kabidi madimi a tumuma tua mvinyo ne madimi makuabu bua kudimabu.*+
11 Nunku Nebukadenesâ* mukalenge wa Babilona wakatumina Nebuzaladana mfumu wa balami mêyi aa bua bualu bua Yelemiya ne:
12 “Muangata, umulame; kumuenzedi bualu bubi to, umuenzele tshionso tshidiye ukulomba.”+
13 Ke Nebuzaladana mfumu wa balami, Labasalisa* Nebushazabana, Labamaga* Nêgala-shalesê, ne bantu banene bonso ba mukalenge wa Babilona kutuma bantu
14 ne kupatuisha Yelemiya mu Lubanza lua balami,+ kumufilabu kudi Gedaliya+ muana wa Ahikama+ muana wa Shafana+ bua kuya nende ku nzubu kuende. Nunku yeye wakasombela munkatshi mua bantu.
15 Pavua Yelemiya mulama mu Lubanza lua balami,+ dîyi dia Yehowa diakalua kudiye, diamba ne:
16 “Ndaku, wambile Ebede-meleke+ muena Etshiopi ne: ‘Mona tshidi Yehowa wa biluilu, Nzambi wa Isalele, wamba: “Mona, ndi nkumbaja mêyi anyi bua tshimenga etshi bua kutshitumina dikenga kadi ki mmalu mimpe to, ne dituku adi wewe neumone mudi bualu ebu buenzeka.”’
17 “‘Kadi nenkusungile mu dituku adi,’ ke mudi Yehowa wamba, ‘ne kuakufidibua mu bianza bia bantu baudi utshina abu to.’
18 “‘Bushuwa, nenkupandishe, ne wewe kuakukuluka ku muele wa mvita to. Neupete muoyo* webe bu tshintu tshinyenga mu mvita,*+ bualu uvua mungeyemene,’+ ke mudi Yehowa wamba.”
Note
^ Ku mua.: “Nebukadelesâ,” mfundilu mukuabu wa dîna edi.
^ Bidi bimueneka ne: mmuanzu.
^ Anyi bilondeshile dikosolola dikuabu dia miaku ya tshiena Ebelu: “Nêgala-shalesê, Samagâ-nebo, Sâsekima, Labasalisa.”
^ Anyi “mfumu muena majimbu (muena lubuku lua mitoto).”
^ Ku mua.: “Nebukadelesâ,” mfundilu mukuabu wa dîna edi.
^ Anyi “dibalasa.”
^ Anyi pamuapa: “midimu mienzeja ku bukole.”
^ Ku mua.: “Nebukadelesâ,” mfundilu mukuabu wa dîna edi.
^ Anyi “mfumu wa bena mudimu ba mu lubanza lua mukalenge.”
^ Anyi “mfumu muena majimbu (muena lubuku lua mitoto).”
^ Anyi “anyima.”
^ Anyi “neupanduke ne muoyo webe.”
