Yelemiya 35:1-19
-
Bena Lekaba badi baleja ditumikila dia tshitembu (1-19)
35 Dîyi diakalua kudi Yelemiya difumina kudi Yehowa mu matuku a Yehoyakima+ muana wa Yoshiya, mukalenge wa Yuda, diamba ne:
2 “Ndaku kudi nzubu wa bena Lekaba,+ uyukile nabu ne uye nabu mu nzubu wa Yehowa, mu umue wa ku nzubu ya* kudiila; pashishe ubapeshe mvinyo bua kunuabu.”
3 Nunku ngakabuela ne Yâzanya muana wa Yelemiya muana wa Habasinya, bana babu ba balume, bana bende bonso, ne nzubu mujima wa bena Lekaba
4 mu nzubu wa Yehowa. Ngakaya nabu mu nzubu wa kudiila wa bana ba Hanana muana wa Yigedalaya, muntu wa Nzambi mulelela, nzubu uvua pabuipi ne nzubu wa kudiila wa bakokeshi uvua pa mutu pa nzubu wa kudiila wa Maaseya muana wa Shaluma mulami wa ku tshiibi.
5 Pashishe ngakateka mpanza ne makopo biuwule tente ne mvinyo kumpala kua balume ba mu nzubu wa bena Lekaba, meme kubambila ne: “Nuayi mvinyo.”
6 Kadi bakamba ne: “Katuakunua mvinyo to, bualu Yehonadaba*+ muana wa Lekaba, nkambua wetu, wakatuelela mukenji eu ne: ‘Nuenu nansha bana benu kanuena ne bua kunua mvinyo nansha.
7 Kanuena ne bua kuibaka nzubu, kukuna mamiinu, anyi kukuna anyi kupeta budimi bua tumuma tua mvinyo to. Kadi, nudi ne bua kusombela anu mu ntenta, bua nushale ne muoyo matuku a bungi mu buloba bunudi basombele bu bantu ba ku babende.’
8 Nunku tudi tutungunuka ne kutumikila dîyi dia Yehonadaba muana wa nkambua wetu Lekaba mu malu onso avuaye mutuambile bua kuenza pa kubenga kunua mvinyo nansha mukese, tuetu ne bakaji betu ne bana betu ba balume ne bana betu ba bakaji.
9 Kabidi, katuena tuibaka nzubu bua kusombelamu, ne katuena ne madimi a tumuma tua mvinyo anyi madimi makuabu anyi mamiinu nansha.
10 Tudi tutungunuka ne kusombela mu ntenta ne kutumikila malu onso avua Yehonadaba* nkambua wetu mutuambile bua kuenza.
11 Kadi pakalua Nebukadenesâ* mukalenge wa Babilona kuluisha buloba,+ tuakamba ne: ‘Luayi, tubuelayi mu Yelushalema bua kupanduka ku tshiluilu tshia bena Kasada ne tshia bena Sulia,’ mpindieu tudi basombele mu Yelushalema.”
12 Dîyi dia Yehowa diakalua kudi Yelemiya, diamba ne:
13 “Mona tshidi Yehowa wa biluilu, Nzambi wa Isalele, wamba: ‘Ndaku, wambile bantu ba mu Yuda ne bantu badi basombele mu Yelushalema ne: “Kabavua batungunuke ne kunulomba bua kutumikila mêyi anyi anyi?”+ ke mudi Yehowa ukonka.
14 “Yehonadaba muana wa Lekaba wakelela bana bende mukenji bua kabanu mvinyo, ne mbatumikile mêyi ende pa kubenga kunua mvinyo too ne lelu eu, nunku batumikila dîyi dia nkambua wabu.+ Kadi, meme ndi muakule nenu njila ne njila,* kadi kanuena bantumikile to.+
15 Mvua mutungunuke ne kunutumina bena mudimu banyi bonso baprofete, mbatuma njila ne njila,*+ ngamba ne: ‘Kudimukayi koku, yonso wa kunudi umbuke ku njila yenu mibi,+ ne enzayi malu makane! Kanulondi nzambi mikuabu ne kanuyenzedi mudimu. Nunku nenutungunuke ne kusombela mu buloba bumvua munupeshe nuenu ne bankambua benu.’+ Kadi kanuakinyika ditshi dienu anyi kunteleja to.
16 Bana ba Yehonadaba muana wa Lekaba mbatumikile dîyi divua nkambua wabu mubashile,+ kadi bantu aba ki mbanteleje to.”’”
17 “Nunku mona tshidi Yehowa, Nzambi wa biluilu, Nzambi wa Isalele, wamba: ‘Mona ndi ntumina Yuda ne bantu bonso badi basombele mu Yelushalema makenga onso andi mubadimuije bua bualu buawu,+ bualu ndi mubambile, kadi ki mbateleje, ne mvua mutungunuke ne kubabikila, kadi kabavua bitabe to.’”+
18 Yelemiya wakambila ba mu nzubu wa bena Lekaba ne: “Monayi tshidi Yehowa wa biluilu, Nzambi wa Isalele, wamba: ‘Bu munudi batumikile dîyi dia nkambua wenu Yehonadaba ne batungunuke ne kulama mêyi ende onso, nuenza anu tshivuaye munuambile bua kuenza,
19 monayi tshidi Yehowa wa biluilu, Nzambi wa Isalele, wamba: “Kakuakupangika muana wa mu ndelanganyi ya Yehonadaba* muana wa Lekaba bua kuenza mudimu kumpala kuanyi nansha.”’”
Note
^ Anyi “bibambalu bia.”
^ Ku mua.: “Yonadaba,” tshikepeshelu tshia dîna Yehonadaba.
^ Ku mua.: “Yonadaba,” tshikepeshelu tshia dîna Yehonadaba.
^ Ku mua.: “Nebukadelesâ,” mfundilu mukuabu wa dîna edi.
^ Ku mua.: “njuka patshiatshia, ngakula.”
^ Ku mua.: “njuka patshiatshia, mbatuma.”
^ Ku mua.: “Yonadaba,” tshikepeshelu tshia dîna Yehonadaba.
