Yelemiya 32:1-44
32 Dîyi diakalua kudi Yelemiya difuma kudi Yehowa mu tshidimu tshia dikumi tshia Sedekiya mukalenge wa Yuda, mmumue ne: tshidimu tshia 18 tshia Nebukadenesâ.*+
2 Tshikondo atshi biluilu bia mukalenge wa Babilona bivua bitshintshimike Yelushalema, ne muprofete Yelemiya uvua muela mu buloko mu Lubanza lua balami+ mu nzubu* wa mukalenge wa Yuda.
3 Bualu Sedekiya mukalenge wa Yuda uvua mumuele mu buloko,+ wamba ne: “Bua tshinyi udi wamba mêyi a buprofete a nunku? Udi wamba ne: ‘Mona tshidi Yehowa wamba: “Nemfile tshimenga etshi mu tshianza tshia mukalenge wa Babilona, ne yeye neatshikuate,+
4 ne Sedekiya mukalenge wa Yuda kakupanduka bena Kasada, bualu neafidibue bushuwa mu tshianza tshia mukalenge wa Babilona, ne neakule nende mpala ne mpala ne neamumone tshimona mêsu.”’+
5 ‘Yeye neaye ne Sedekiya mu Babilona, ne yeye neashale kuntu aku too ne pandi ntuma ntema yanyi kudiye,’ ke mudi Yehowa wamba. ‘Nansha munudi nutungunuka ne kuluangana ne bena Kasada, kanuakutshimuna to.’”+
6 Yelemiya wakamba ne: “Dîyi dia Yehowa ndilue kundi, diamba ne:
7 ‘Tangila, Hanamele muana wa tatuebe mukuabu Shaluma nealue kuudi, neambe ne: “Sumba budimi buanyi budi ku Anatota,+ bualu wewe ke muntu wa kumpala udi ne bukenji bua kubupikula.”’”+
8 Hanamele muana wa tatuanyi mukuabu wakalua kundi mu Lubanza lua balami, anu muvua Yehowa muambe, yeye kungambila ne: “Sumba koku budimi buanyi budi ku Anatota, mu buloba bua Benyamina, bualu udi ne bukenji bua kubuangata ne kubupikula. Ubusumbe.” Nunku ngakamanya ne: bualu ebu buvua bua ku dîyi dia Yehowa.
9 Nunku ngakasumba budimi mu Anatota kudi Hanamele muana wa tatuanyi mukuabu. Ngakamupimina makuta,+ nshekele* muanda mutekete ne bitupa dikumi bia arjan.
10 Pashishe ngakafunda bualu ebu mu mukanda,+ kutua tshitampi, kubikila bantemu+ ne kupima makuta pa tshipiminu tshia bujitu.
11 Ngakangata mukanda wa disumba dia budimi, uvua mutue tshitampi bilondeshile mêyi ne malu malomba, ne mukanda uvua mushale kawuyi mutua tshitampi,
12 ngakapesha Baluka+ muana wa Neliya+ muana wa Mâseya mukanda wa disumba dia budimi mu mêsu mua Hanamele muana wa tatuanyi mukuabu, mua bantemu bavua bafunde mu mukanda wa disumba dia budimi, ne mua bena Yuda bonso bavua basombe mu Lubanza lua balami.+
13 Ke meme kutumina Baluka dîyi mu mêsu muabu, ngamba ne:
14 “Mona tshidi Yehowa wa biluilu, Nzambi wa Isalele, wamba: ‘Angata mikanda eyi, mukanda wa disumba dia budimi eu, udi mutue tshitampi ne mukanda mukuabu udi mushale kawuyi mutua tshitampi, uyele mu mulondo wa diima bua ilamibue matuku a bungi.’
15 Bualu mona tshidi Yehowa wa biluilu, Nzambi wa Isalele, wamba: ‘Nzubu, madimi ne madimi a tumuma tua mvinyo nebisumbibue kabidi mu buloba ebu.’”+
16 Pashishe ngakasambila Yehowa meme mumane kupesha Baluka muana wa Neliya mukanda wa disumba dia budimi, ngamba ne:
17 “Aka! Wewe Mukalenge Mutambe Bunene Yehowa! Tangila! Wewe wakenza diulu ne buloba ku bukole buebe bunene+ ne ku diboko diebe diolola. Kakuena bualu budi mua kutamba kukukemesha wewe,
18 Yeye udi uleja binunu bia bantu dinanga dia lulamatu, kadi upingaja tshilema tshia batatu kudi* bana babu badi balonda panyima pabu,+ Nzambi mulelela, munene ne wa bukole, muena dîna dia Yehowa wa biluilu.
19 Wewe udi munene mu difila dia lungenyi* ne wa bukole mu tshienzedi,+ wewe muena mêsu adi atangila njila yonso ya bantu+ bua kufuta muntu yonso bilondeshile njila yende ne bilondeshile tshidiye wenza.+
20 Wewe udi muenze bimanyinu ne bishima mu buloba bua Ejipitu bidi bimanyike too ne lelu, nunku udi mudienzele dîna mu Isalele ne munkatshi mua bukua bantu,+ bu mudidi lelu eu.
21 Wewe wakapatula bantu bebe bena Isalele mu buloba bua Ejipitu ne bimanyinu, ne bishima, ne tshianza tshia bukole, ne diboko diolola ne bienzedi bidi bikuatshisha buôwa.+
22 “Panyima pa matuku, wewe wakabapesha buloba buuvua muditshipe bua kupesha bankambua babu,+ buloba budi ne mabele ne buitshi+ bia bungi.
23 Bakabuela, bobu kubuangata, kadi kabakatumikila dîyi diebe peshi kuendela mu mukenji webe nansha. Kabakenza tshintu nansha tshimue tshiuvua mubambile bua kuenza, ke wewe kuenza bua dikenga dionso edi dibakuate.+
24 Tangila! Bantu mbalue ne bibumba bikole bia kutshintshimika nabi bua kukuata tshimenga,+ ne bua muele wa mvita,+ tshiyole tshia nzala ne tshipupu,*+ tshimenga netshikuluke bushuwa mu bianza bia bena Kasada badi batshiluisha; malu auvua muambe mmakumbane onso anu muudi mumone mpindieu.
25 Kadi wewe Mukalenge Mutambe Bunene Yehowa udi mungambile ne: ‘Sumba budimi ku makuta ne bikila bantemu,’ nansha muikala tshimenga etshi mua kufidibua bushuwa mu bianza bia bena Kasada.”
26 Ke dîyi dia Yehowa kuluadi kudi Yelemiya, diamba ne:
27 “Mmeme eu, Yehowa, Nzambi wa bukua bantu buonso.* Kudiku bualu budi mua kutamba kunkemesha anyi?
28 Nunku, mona tshidi Yehowa wamba: ‘Tangila, ndi mfila tshimenga etshi kudi bena Kasada ne mu tshianza tshia Nebukadenesâ* mukalenge wa Babilona, ne yeye neatshikuate.+
29 Bena Kasada badi baluisha tshimenga etshi nebabuele, nebatue tshimenga etshi kapia ne nebatshioshe+ pamue ne nzubu miena misaka idi bantu bafidila milambu kudi Bâla ne bapongoluela nzambi mikuabu milambu ya bia kunua bua kumfiikisha munda.’+
30 “‘Bualu bantu ba mu Isalele ne ba mu Yuda mbenze anu malu avua mabi ku mêsu kuanyi katshia ku buana buabu;+ bantu ba mu Isalele badi batungunuka ne kumfiikisha munda ne mudimu wa bianza biabu,’ ke mudi Yehowa wamba.
31 ‘Bualu, tshimenga etshi, katshia ku dituku divuabu batshibake too ne lelu, tshidi anu tshijudiji tshia tshiji ne tshiji tshikole kundi,+ bua tshiumbushibue kumpala kuanyi,+
32 bua malu mabi onso adi bantu ba mu Isalele ne ba mu Yuda benze bua kumfiikisha munda, bobu, bakalenge babu,+ bakokeshi babu,+ bakuidi babu, baprofete babu,+ ne bantu ba mu Yuda ne bantu badi basombele mu Yelushalema.
33 Bakatungunuka ne kuntumina nyima yabu, ki mmpala yabu to;+ nansha mumvua mutete bua kubalongesha njila ne njila,* nansha umue wa kudibu kavua uteleja bua kupeta dilongesha to.+
34 Bakateka mpingu yabu ya muendi mu nzubu udi ne dîna dianyi bua kumunyanga.+
35 Kupita apu, bakibaka miaba mitumbuke ya Bâla mu Tshibandabanda tshia Muana wa Hinoma,*+ bua bobu kupitshisha bana babu ba balume ne bana babu ba bakaji mu kapia bua Moleke,+ bualu bumvua tshiyi mubatumine dîyi bua kuenza+ ne butu kabuyi nansha buanji kunduila ku muoyo* bua kuenza bualu butambe bubi bua nunku, kusaka Yuda ku dienza mpekatu.’
36 “Nunku, mona tshidi Yehowa Nzambi wa Isalele wamba bua tshimenga etshi tshinudi nuamba ne: netshifidibue mu tshianza tshia mukalenge wa Babilona ku muele wa mvita, ku tshiyole tshia nzala ne ku tshipupu:
37 ‘Mona meme nembasangishe pamue kumbukila mu matunga onso mumvua mubatangalaje mu tshiji tshianyi, mu tshiji tshianyi tshikole ne mu difiika dia munda dikole,+ ne nembapingaje muaba eu ne nebasombe mu bukubi.+
38 Bobu nebikale bantu banyi, ne meme nengikale Nzambi wabu.+
39 Meme nembapeshe muoyo umue+ ne njila umue bua bikale bantshina misangu yonso bua diakalenga diabu bobu ne bua diakalenga dia bana babu balonda panyima pabu.+
40 Meme nendie nabu tshipungidi tshia tshiendelele,+ nunku tshiakulekela kubenzela malu mimpe;+ ne nenteke ditshina dianyi mu mioyo yabu bua kabalu kumbuka kundi.+
41 Nensanke bikole bua bualu buabu bua kubenzela malu mimpe,+ ne nembajadike bikole mu buloba ebu+ ne muoyo wanyi wonso ne anyima wanyi yonso.’”*
42 “Bualu mona tshidi Yehowa wamba: ‘Anu bu mundi mutumine bantu aba dikenga dinene dionso edi, ke mungabatumina buimpe buonso bundi* mbalaya.+
43 Nebasumbe kabidi madimi mu buloba ebu,+ nansha muudi wamba ne: “Mbuloba buatuke budi kabuyi ne bantu ne nyama, ne mbabufile mu tshianza tshia bena Kasada.”’
44 “‘Nebasumbe madimi ku makuta, nebafunde mikanda ya disumba dia madimi ne nebayitue tshitampi, ne nebabikile bantemu mu buloba bua Benyamina,+ mu miaba idi minyunguluke Yelushalema, mu bimenga bia Yuda,+ mu bimenga bia ku maloba a mikuna, mu bimenga bia mu tshibatabata,+ ne mu bimenga bia ku sud, bualu nempingaje bantu babu badi bakuatshibue,’+ ke mudi Yehowa wamba.”
Note
^ Ku mua.: “Nebukadelesâ,” mfundilu mukuabu wa dîna edi.
^ Anyi “dibalasa.”
^ Nshekele uvua ne grame 11,4. Tang. Tshis. B14.
^ Ku mua.: “mu tshiadi tshia.”
^ Anyi “munene bua bidi bitangila malu ebe audi ujinga kuenza.”
^ Anyi “disama.”
^ Ku mua.: “musunyi wonso.”
^ Ku mua.: “Nebukadelesâ,” mfundilu mukuabu wa dîna edi.
^ Ku mua.: “njuka patshiatshia, mbalongesha.”
^ Anyi “butu kabuyi nansha buanji kunduila mu lungenyi.”
^ Anyi “malu mimpe onso andi.”
