Yehezekele 8:1-18
8 Mu tshidimu tshisambombo, mu ngondo muisambombo, mu dituku ditanu dia ngondo, pamvua musombe mu nzubu muanyi ne bakulu ba mu Yuda basombe kumpala kuanyi, tshianza tshia Mukalenge Mutambe Bunene Yehowa tshiakankuatshila muaba au.
2 Pamvua ntangila, ngakamona tshintu tshienze bu tshimuenekelu tshia kapia; kuvua kapia kuinshi kua tshivua tshimueneka bu tshimono tshiende,+ ne kumbukila mu tshimono tshiende kubanda, tshimuenekelu tshiende tshivua tshikenka bu nsese ya or musambakaja ne arjan.+
3 Pashishe wakolola tshivua tshimueneka bu tshianza, kunkuatshilaye ku tshisuba tshia nsuki ya ku mutu kuanyi, ne nyuma wakangambula muulu pankatshi pa diulu ne buloba, kuyaye nanyi ku Yelushalema ku diambuluisha dia bikena kumona bia kudi Nzambi, ku tshibuelelu tshia tshiibi tshia munda+ tshidi tshitangile ku nord, muaba uvua tshimfuanyi tshia lupingu lua mukawu tshivua tshijula mukawu tshimane.+
4 Monayi! butumbi bua Nzambi wa Isalele buvua muaba au,+ bu tshimuenekelu tshimvua mumone mu tshibandabanda.+
5 Pashishe wakangambila ne: “Muana wa muntu, bandisha koku mêsu ebe ku luseke lua ku nord.” Nunku ngakabandisha mêsu anyi ku luseke lua ku nord, ne kuoku aku, ku nord kua tshiibi tshia tshioshelu, kuvua tshimfuanyi tshia mukawu atshi ku tshibuelelu.
6 Yeye wakangambila ne: “Muana wa muntu, udi mumone malu a dikema ne mabi adi nzubu wa Isalele wenza muaba eu,+ malu adi ansemeja kule ne muaba wanyi munsantu anyi?+ Kadi wewe neumone malu mabi adi mene mabi bikole menemene.”
7 Pashishe wakaya nanyi ku tshibuelelu tshia mu lubanza, ne pangakatangila, ngakamona disoso mu tshimanu.
8 Yeye kungambila ne: “Muana wa muntu, tubula koku disoso mu tshimanu.” Nunku ngakatubula mu tshimanu, meme kumona tshibuelelu.
9 Wakangambila ne: “Buela, umone malu mabi, malu matambe bubi adibu benza muaba eu.”
10 Nunku ngakabuela, kutangila, ne meme kumona mishindu yonso ya bimfuanyi bia bintu bidi bidikoka panshi ne ya nyama mibipe+ ne mpingu yonso ya muendi* ya mu nzubu wa Isalele;+ ivua mizola mu nseke yonso ya tshimanu.
11 Bakulu 70 ba mu nzubu wa Isalele bavua bimane kumpala kuayi, ne Yâzanya muana wa Shafana+ muimane munkatshi muabu. Yonso wa kudibu uvua ne tshintu tshia kuoshila musenga wa manananshi mu tshianza tshiende, ne ditutu dia dipembu dimpe dia musenga wa manananshi divua dibanda muulu.+
12 Yeye wakangambila ne: “Muana wa muntu, udi mumone bidi bakulu ba mu nzubu wa Isalele benza mu mîdima, muntu ne muntu mu bibambalu bia munda muaba udi mpingu yende milonga* anyi? Bualu bobu badi bamba ne: ‘Yehowa kena utumona to. Yehowa mmulekele buloba ebu.’”+
13 Yeye kutungunuka ne kungambila ne: “Wewe neumone malu mabi adi mene mabi bikole menemene adibu benza.”
14 Nunku wakaya nanyi ku tshibuelelu tshia tshiibi tshia ku nord tshia nzubu wa Yehowa, ne kuoku aku meme kumona bakaji basombe badila nzambi Tamuza.
15 Wakangambila kabidi ne: “Udi mumone bualu ebu anyi, wewe muana wa muntu? Neumone malu mabi adi mene mabi bikole menemene kupita aa.”+
16 Nunku wakaya nanyi mu lubanza lua munda lua nzubu wa Yehowa.+ Ku tshibuelelu tshia ntempelo wa Yehowa, pankatshi pa lutanda ne tshioshelu, kuvua bantu balume batue ku 25 bele nyima ku ntempelo wa Yehowa, batangije mpala yabu ku est; bavua binamina dîba ku est.+
17 Yeye wakangambila ne: “Muana wa muntu, udi mumone bualu ebu anyi? Mbualu bukese bua nzubu wa Yuda kuenza malu mabi aa, kuwuja buloba ne tshikisu+ ne kutungunuka ne kumfiikisha munda anyi? Mbobu aba bantua ditamba dia mutshi* ku diulu.
18 Nunku nengenze malu ne tshiji tshikole. Dîsu dianyi kadiakumvua luse; tshiakubumvuila nansha muoyo wa luse+ to. Nansha bobu badidile mu matshi anyi ne dîyi dikole, tshiakubateleja to.”+
Note
^ Tshiambilu tshia mu tshiena Ebelu etshi tshidi mua kuikala tshipetangana ne muaku “tumvi tua nyama” ne mbenze natshi mudimu bua kuleja kapeja.
^ Anyi “mu nzubu ya munda ya muaba wende wa kuadijila.”
^ Bimueneka ne: nditamba dia mutshi divuabu batendelela nadi mpingu.
