Yehezekele 48:1-35
48 “Aa mmêna a bisa, kubangila ku muelelu wa ku nord: tshitupa tshia Dana+ tshidi tshilonda njila wa Hetelona tshiya too ne ku Lebo-hamate*+ too ne ku Hasâ-enana, kumpenga kua mukalu wa Damaseke luseke lua ku nord, ku luseke kua Hamate;+ ne tshidi tshiumbukila ku mukalu wa ku est too ne ku mukalu wa ku ouest.
2 Tshitupa tshia Ashê+ tshidi ku mukalu wa Dana, kumbukila ku mukalu wa ku est too ne ku mukalu wa ku ouest.
3 Tshitupa tshia Nafatale+ tshidi ku mukalu wa Ashê, kumbukila ku mukalu wa ku est too ne ku mukalu wa ku ouest.
4 Tshitupa tshia Manashe+ tshidi ku mukalu wa Nafatale, kumbukila ku mukalu wa ku est too ne ku mukalu wa ku ouest.
5 Tshitupa tshia Efelayima tshidi ku mukalu wa Manashe,+ kumbukila ku mukalu wa ku est too ne ku mukalu wa ku ouest.
6 Tshitupa tshia Lubena tshidi ku mukalu wa Efelayima,+ kumbukila ku mukalu wa ku est too ne ku mukalu wa ku ouest.
7 Tshitupa tshia Yuda tshidi ku mukalu wa Lubena,+ kumbukila ku mukalu wa ku est too ne ku mukalu wa ku ouest.
8 Ku mukalu wa Yuda, kumbukila ku mukalu wa ku est too ne ku mukalu wa ku ouest, dipa dinudi ne bua kuteka ku luseke didi ne bua kuikala dia bunene bua nkubita* binunu 25,+ dikumbanangane ne bule bua bitupa bikuabu bia bisa, kumbukila ku mukalu wa ku est too ne ku mukalu wa ku ouest. Muaba munsantu newikale munkatshi muadi.
9 “Dipa dinudi ne bua kuteka ku luseke bua Yehowa nedikale dia nkubita binunu 25 mu bule ne binunu 10 mu butshiama.
10 Diodi nedikale dipa dia tshijila dia bakuidi.+ Nedikale dia nkubita binunu 25 luseke lua ku nord, binunu 10 ku ouest, binunu 10 ku est, ne binunu 25 ku sud. Muaba munsantu wa Yehowa newikale munkatshi muadi.
11 Nedikale dia bakuidi bajidila ba mu bana ba balume ba Sadoka,+ bavua bakumbaja midimu yabu ivuabu bangenzela ne bavua kabayi bapambuke pavua bena Isalele ne bena Lewi bapambuke.+
12 Nebapete tshitupa tshia dipa dia buloba tshiteka ku luseke bu tshintu tshitambe tshijila ku mukalu wa bena Lewi.
13 “Bena Lewi nebapete tshitupa tshia nkubita binunu 25 mu bule ne binunu 10 mu butshiama, tshidi tshilondela diakamue tshitupa tshia buloba tshia bakuidi. (Bule buonso nebuikale bua binunu 25 mu bule ne binunu 10 mu butshiama.)
14 Kabena ne bua kupana, kushintakaja, anyi kusambulujilangana tshitupa tshitambe buimpe tshia buloba etshi to, bualu ntshintu tshia tshijila kudi Yehowa.
15 “Tshipapu tshidi tshishala tshidi ne bunene bua nkubita 5 000 ku muelelu kua mukalu wa nkubita binunu 25 netshikale tshia kuenzela malu makuabu a mu tshimenga,+ bua kuibaka nzubu, ne bua mpata wa kudishila nyama. Tshimenga netshikale munkatshi muatshi.+
16 Ebu mbunene bua tshimenga: mukalu wa ku nord udi nkubita 4 500, mukalu wa ku sud udi 4 500, mukalu wa ku est udi 4 500, ne mukalu wa ku ouest udi 4 500.
17 Mpata wa kudishila nyama wa tshimenga neikale ne nkubita 250 ku nord, 250 ku sud, 250 ku est, ne 250 ku ouest.
18 “Bule bua tshitupa tshidi tshishala nebukumbanangane ne dipa dia tshijila,+ nkubita binunu 10 ku est ne nkubita binunu 10 ku ouest. Netshikumbanangane ne dipa dia tshijila, ne bintu biditshi tshipatula nebikale biakudia bia badi benzela tshimenga mudimu.
19 Bantu badi benzela tshimenga mudimu ba mu bisa bionso bia Isalele nebadimamu.+
20 “Dipa dijima didi nkubita binunu 25, nseke inayi ya bule bumue. Nudi ne bua kutshiteka ku luseke bu dipa dia tshijila pamue ne bumpianyi bua tshimenga.
21 “Tshitupa tshidi tshishala ku nseke yonso ya dipa dia tshijila ne bumpianyi bua tshimenga netshikale tshia mfumu.+ Netshikale kumpenga kua mikalu ya nkubita binunu 25 idi ku est ne ku ouest kua dipa. Netshikale tshikumbanangane ne bitupa bidi bilamakanangane natshi abi, ne netshikale tshia mfumu. Dipa dia tshijila ne muaba munsantu wa ntempelo nebikale munkatshi muatshi.
22 “Bumpianyi bua bena Lewi ne bumpianyi bua tshimenga nebikale pankatshi pa bumpianyi bua mfumu. Tshitupa tshia buloba tshia mfumu netshikale pankatshi pa mukalu wa Yuda+ ne mukalu wa Benyamina.
23 “Kadi bua bisa bidi bishale, tshitupa tshia Benyamina tshidi tshiumbukila ku mukalu wa ku est too ne ku mukalu wa ku ouest.+
24 Tshitupa tshia Simeona tshidi kumpenga kua mukalu wa Benyamina,+ kumbukila ku mukalu wa ku est too ne ku mukalu wa ku ouest.
25 Tshitupa tshia Yisakâ+ netshikale kumpenga kua mukalu wa Simeona, kumbukila ku mukalu wa ku est too ne ku mukalu wa ku ouest.
26 Tshitupa tshia Zebulona tshidi kumpenga kua mukalu wa Yisakâ,+ kumbukila ku mukalu wa ku est too ne ku mukalu wa ku ouest.+
27 Tshitupa tshia Gada tshidi kumpenga kua mukalu wa Zebulona,+ kumbukila ku mukalu wa ku est too ne ku mukalu wa ku ouest.
28 Mukalu wa ku sud kumpenga kua mukalu wa Gada newumbukile ku Tamâ+ too ne ku mâyi a Melibota-kadeshe,+ too ne ku Kasulu ka tshilonda nkoka,*+ utungunuka too ne ku Mbuu Munene.*
29 “Ebu mbuloba bunudi ne bua kuabanyina bisa bia Isalele bu bumpianyi,+ ne biobi ebi nebikale bitupa biabi,”+ ke mudi Mukalenge Mutambe Bunene Yehowa wamba.
30 “Ebi nebikale bipatukidi bia tshimenga: luseke lua ku nord neluikale bule bua nkubita 4 500.+
31 “Nebinyike biibi bia tshimenga mêna bilondeshile bisa bia Isalele. Bua biibi bisatu bidi ku nord, kudi tshiibi tshimue tshia Lubena, tshiibi tshimue tshia Yuda, ne tshiibi tshimue tshia Lewi.
32 “Luseke lua ku est neluikale bule bua nkubita 4 500, ne kudi biibi bisatu: tshiibi tshimue tshia Jozefe, tshiibi tshimue tshia Benyamina, ne tshiibi tshimue tshia Dana.
33 “Luseke lua ku sud neluikale bule bua nkubita 4 500, luikale ne biibi bisatu: tshiibi tshimue tshia Simeona, tshiibi tshimue tshia Yisakâ, ne tshiibi tshimue tshia Zebulona.
34 “Luseke lua ku ouest neluikale bule bua nkubita 4 500, luikale ne biibi bisatu: tshiibi tshimue tshia Gada, tshiibi tshimue tshia Ashê, ne tshiibi tshimue tshia Nafatale.
35 “Nyunguluilu neikale wa nkubita binunu 18. Dîna dia tshimenga atshi kumbukila ku dituku adi nedikale ne: Yehowa Udimu.”+
Note
^ Anyi “tshibuelelu tshia Hamate.”
^ Badi bakula bua nkubita ya mile. Tang. Tshis. B14.
^ Mmumue ne: Mbuu wa Mediterane.
^ Mmumue ne: Kasulu ka tshilonda nkoka ka mu Ejipitu.
