Muambi 6:1-12
6 Kudi bukuabu bualu budi bunyingalaja* bundi mumone muinshi mua dîba, ne budi buenzeka bikole mu bantu:
2 Nzambi mulelela udi upesha muntu bubanji, bintu ne butumbi, bua muntu kapangidi tshintu nansha tshimue tshidiye ujinga;* kadi Nzambi mulelela kena umupesha bukole bua kubidia, nansha mudi muenyi mua kubidia. Bualu ebu budi tshianana ne budi lutatu lukole.
3 Bikala muntu mua kulela bana misangu lukama, kushala ne muoyo bidimu bia bungi ne kufika ku bununu, kadi kayi udia* bintu biende bimpe kumpala kua kubuelaye mu lukita,* ndi ne bua kuamba ne: muana mulela mufue udi bimpe kumupita.+
4 Bualu yeye eu uvua mulue mu tshianana ne muye mu mîdima, ne dîna diende ndibuikila kudi mîdima.
5 Nansha muvuaye kayi muanji kumona dîba anyi kumanya bualu nansha bumue, yeye udi anu mupite* wa kumpala au.+
6 Kushala ne muoyo bidimu tshinunu misangu ibidi kadi kakuyi disanka kudi ne mushinga kayi? Bonso kabena baya muaba umue anyi?+
7 Mudimu wonso mukole udi muntu wenza mbua kuwuja mukana muende;+ kadi nzala* yende kayena ijika nansha.
8 Bualu muena meji mmupite mutatakane ku tshinyi?+ Anyi kumanya tshia kuenza bua kushala ne muoyo* kudi naku mupele kudi ne mushinga kayi?
9 Mbimpe kuanyisha bidi mêsu amona pamutu pa kuipatshila majinga ebe.* Bualu ebu kabidi budi tshianana, kuipata kua lupepele.
10 Tshintu tshionso tshidiku bakadi bamane kutshinyika dîna, ne muntu mmumanyike tshidiye; yeye kena ne bukole bua kukokangana* ne muntu udi ne bukole kumupita.
11 Padiku mêyi a bungi,* malu a tshianana adi avula; bidi bipetesha muntu tshinyi?
12 Nnganyi udi mumanye tshidi tshitambe buimpe tshia muntu kuenza mu matuku ende makese a muoyo udi tshianana, adiye upitshisha anu bu mundidimbi?+ Bualu, nnganyi udi mua kuambila muntu tshikala mua kuenzeka muinshi mua dîba yeye mumane kuya?
Note
^ Anyi “dikenga dinene.”
^ Anyi “kapangidi tshintu nansha tshimue bua anyima wende.”
^ Anyi “anyima wende kayi udia.”
^ Anyi “nansha lukita ki nduanji kulua tshintu tshiende.”
^ Ku mua.: “udi ne dikisha dia bungi kupita.”
^ Anyi “anyima.”
^ Ku mua: “bua kuenda kumpala kua badi ne muoyo.”
^ Anyi “pamutu pa ditambakana dia anyima.”
^ Anyi “kulumbulula tshilumbu tshiende.”
^ Anyi pamuapa: “bintu bia bungi.”
