Misambu 135:1-21
135 Tumbishayi Yah!*
Tumbishayi dîna dia Yehowa;Mutumbishayi, nuenu bena mudimu ba Yehowa,+
2 Nuenu badi bimane mu nzubu wa Yehowa,Mu mbanza ya nzubu wa Nzambi wetu.+
3 Tumbishayi Yah, bualu Yehowa udi muimpe.+
Imbayi misambu ya kutumbisha nayi* dîna diende, bualu bidi bisankisha.
4 Bualu Yah mmudisunguile Yakoba,Isalele bua ikale tshisamba tshiende tshia pa buatshi.*+
5 Bualu ndi mumanye bimpe ne: Yehowa mmunene;Mukalenge wetu mmunene kupita nzambi mikuabu yonso.+
6 Yehowa udi wenza tshintu tshionso tshidiye musue kuenza+Mu diulu ne pa buloba, mu mbuu ne mu ndondo yonso.
7 Udi ubandisha matutu* afumina ku ntengu ya buloba;Udi wenzela mvula mipenyi;*Udi upatula lupepele mu miaba yende ya dilamina bintu.+
8 Wakashipa banabute ba Ejipitu,Ba bantu ne ba nyama.+
9 Yeye wakatuma bimanyinu ne bishima munkatshi muebe wewe, Ejipitu,+Kudi Palô ne bena mudimu bende bonso.+
10 Wakabutula bisamba bia bungi+Ne kushipaye bakalenge ba bukole:+
11 Sihona mukalenge wa bena Amole,+Oga mukalenge wa Bashana,+Ne makalenge onso a mu Kanâna.
12 Wakafila buloba buabu bu bumpianyi,Bumpianyi kudi Isalele tshisamba tshiende.+
13 Yehowa wanyi, dîna diebe didi dishalaku kashidi.
Yehowa, lumu* luebe ludi lushalaku bua bipungu bionso bia bantu.+
14 Bualu Yehowa neakuile* bantu bende,+Ne neumvue muoyo wa luse* bua bena mudimu bende.+
15 Mpingu ya bisamba nya tshiamu tshia arjan ne tshia or,Mudimu wa bianza bia bantu.+
16 Idi ne mukana, kadi kayena mua kuakula;+Idi ne mêsu, kadi kayena mua kumona;
17 Idi ne matshi, kadi kayena mua kumvua.
Mupuya kawena mukana muayi.+
18 Bantu badi bayenza nebalue anu bu yoyi,+Ke muikala kabidi bonso badi bayeyemena.+
19 Wewe nzubu wa Isalele, tumbisha Yehowa.
Wewe nzubu wa Alona, tumbisha Yehowa.
20 Wewe nzubu wa Lewi, tumbisha Yehowa.+
Nuenu badi batshina Yehowa, tumbishayi Yehowa.
21 Yehowa atumbishibue kumbukila mu Siona,+Yeye udi musombele mu Yelushalema.+
Tumbishayi Yah!+
Note
^ Anyi “Aleluya!” “Yah” ntshikepeshilu tshia dîna dia Yehowa.
^ Anyi “mijiki bua.”
^ Anyi “tshintu tshiende tshia mushinga mukole.”
^ Anyi pamuapa: “Udi wenzela mvula njila.”
^ Anyi “tshibungibungi.”
^ Anyi “dîna.” Ku mua.: “tshivulukilu.”
^ Anyi “nealumbuluile.”
^ Anyi “neanyingalale.”
