Misambu 10:1-18
ל [Lamede]
10 Yehowa wanyi, bua tshinyi udi wimanyina kule?
Bua tshinyi udi usokoma mu bikondo bia dikenga?+
2 Ne diambu dionso, muntu mubi udi wipatangana ne muntu udi kayi mua kudisungila,+Kadi yeye neakuatshibue mu ngenyi idiye uluka.+
3 Bualu muntu mubi udi uditambisha bua majinga ende a budisunkaya*+Ne udi ubenesha muena lukuka;*נ [Nune]Yeye udi upotela Yehowa.
4 Mu didibandisha diende, muntu mubi kena ukonkonona malu to;Meji ende onso adi anu ne: “Nzambi kenaku to.”+
5 Njila yende idi yenda anu ilubuluka,+Kadi mêyi ebe a dilumbuluisha mmapite dijingulula diende dia malu;+Udi useka* baluishi bende bonso.
6 Udi udiambila mu muoyo wende ne: “Kabakunnyukula nansha;*Bualu mu bipungu ne bipungu bia bantu,Tshiakumona dikenga nansha.”+
פ [Pe]
7 Mukana muende mmuwule tente ne milawu, ne mashimi, ne difunyinangana;+Muinshi mua ludimi luende mudi tshimvundu ne malu mabi.+
8 Udi walaminangana pabuipi ne misoko;Udi ushipela muntu udi kayi ne bualu muaba udiye musokomene.+
ע [Ayine]
Mêsu ende adi atangila bua kumona muena diakabi wa kuenzela bibi.+
9 Udi walaminangana mu muaba udiye musokome anu bu ntambue mu buina buende.*+
Udi walamina bua kukuata muntu udi kayi mua kudisungila.
Udi ukuata muntu udi kayimua kudisungila padiye ukoka bukondo buende ukanga.+
10 Udi mukuatshibue au badi bamuzaza, bamuela panshi;Bena diakabi badi bapona mu nzadi yende.*
11 Udi udiambila mu muoyo wende ne: “Nzambi mmupue muoyo.+
Mmutangije mpala wende kua tshianana.
Kena umona nansha kakese.”+
ק [Kofe]
12 Juka, Yehowa wanyi.+ Nzambi wanyi, ela tshianza tshiebe muulu.+
Kupu bantu badi kabayi mua kudisungila muoyo.+
13 Bua tshinyi muntu mubi udi upotela Nzambi?
Udi wamba mu muoyo wende ne: “Kuakundumbuluisha to.”
ר [Leshe]
14 Kadi wewe udi mumone ntatu ne dikenga.
Udi utangila ne wangata malu mu bianza.+
Kuudi wewe nkudi muena diakabi udibu benzele bibi unyemena;+Udi muambuluishi wa muana udi kayi ne tatuende.*+
ש [Shine]
15 Tshibula diboko dia muntu mubi ne muenji wa malu mabi,+Bua pawakeba bubi buende,Kuakubupeta kabidi nansha.
16 Yehowa udi Mukalenge bua kashidi ne tshiendelele.+
Bisamba mbijimine pa buloba.+
ת [Taw]
17 Kadi, Yehowa wanyi, wewe neuteleje kulomba kua bena bupuekele.+
Neukoleshe mioyo yabu+ ne neuteye ntema yonso kudibu.+
18 Neukose biakane tshilumbu tshia bana badi bafuishe batatuabu ne bantu badibu bazaze,+Bua muntu ufuafua wa pa buloba kamonyi mua kubatshinyisha kabidi nansha.+
Note
^ Anyi “dijinga dia anyima wende.”
^ Anyi pamuapa: “Muena lukuka udi udibenesha.”
^ Anyi “uditumbisha kumpala kua.”
^ Anyi “tshiakutetuka (tshiakulenduka) nansha.”
^ Anyi “tshipuka.”
^ Anyi “nzadi yende mikole.”
^ Anyi “muana wa nshiya.”
