Hoshea 13:1-16
13 “Pavua Efelayima muakule, bantu bavua bazakale;Yeye uvua mutumbe mu Isalele.+
Kadi wakapia tshibawu bua bualu bua Bâla+ ne wakafua.
2 Mpindieu badi basakidila mpekatu ku mpekatu wabuNe benza mpingu ya tshiamu* ne tshiamu tshiabu tshia arjan;+Badi benza mpingu ne dimanya dionso, mudimu mujima wa bansenda.
Badi bayambila ne: ‘Muntu udi ulambula milambu atue bana ba ngombe mishiku.’+
3 Nunku nebalue bu matutu a mu dinda,Bu lumuma ludi lujimina lukasa,Bu bisote bipepula kudi tshipepele tshikole muaba wa dishipuila ntete,Ne bu muishi upatuka mudisoso dia musaka wa nzubu.
4 Kadi meme ndi Yehowa Nzambi webe katshia* ku buloba bua Ejipitu;+Kuvua mumanye Nzambi mukuabu pa kungumbusha meme,Ne pa kungumbusha meme kakuena mupandishi mukuabu to.+
5 Ngakakumanya mu tshipela,+ mu buloba bua minanga.
6 Bakukuta mpata yabu ya kudishila nyama,+Bakukuta, ne muoyo wabu wakalua ne lutambishi.
Nunku bakampua muoyo.+
7 Nengikale kudibu bu muana wa ntambue,+Bu nyama wa nkashama mubutame kumpenga kua njila.
8 Nentuilangane nabu bu nyama wa urse udi mujimije bana bende,Ne nempande tshiadi tshiabu.*
Nembadie kuoku aku bu ntambue;Nyama wa tshisuku wa mu mpata neabasunsule.
9 Neakubutule, wewe Isalele,Bualu udi munkudimukile, mukudimukile muambuluishi webe.
10 Nunku, mukalenge webe udi penyi bua akupandishe mu bimenga biebe bionso,+Ne bakokeshi* bebe, bauvua muambe bua bualu buabu ne:‘Mpesha mukalenge ne bakokeshi’?+
11 Ngakakupesha mukalenge mu tshiji tshianyi,+Ne nemmumbushe mu tshiji tshianyi tshikole.+
12 Tshilema tshia Efelayima ntshikuta;*Mpekatu wende mmulama mu tshibutshilu.
13 Didinyenga dia pa kulela nedimukuate.
Kadi yeye mmuana udi kayi ne meji;Kena ulua padi dîba dia kuledibua dikumbana.
14 Nembapikule ku bukole bua Lukita;*Nembumbushe ku lufu.+
Wewe Lufu, tulonda tuebe tudi penyi?+
Wewe Lukita, kubutula kuebe kudi penyi?+
Nebasokoke mêsu anyi luse.
15 Nansha yeye mua kukola munkatshi mua malenge,Lupepele lua ku est nelulue, lupepele lua Yehowa,Ludi lulua lufumina mu tshipela, bua kumisha tshina tshiende tshia mâyi ne kukamisha mushimi wende.
Yeye au neapawule tshibutshilu tshia bintu biende bionso bia mushinga.+
16 Samalea neapie tshibawu,+ bualu yeye mmutombokele Nzambi wende.+
Nebakuluke ku muele wa mvita,+Nebasunsule bana babu,Ne nebatayishe mafu a bakaji babu badi ne mafu.”
Note
^ Anyi “mpingu ya tshiamu tshiengulula.”
^ Anyi “kubangila.”
^ Ku mua.: “lupangu lua muoyo wabu.”
^ Ku mua.: “balumbuluishi.”
^ Anyi “ntshilama.”
