Tuetu bonso tudi tuela meji bua matuku atshilualua. Tudi tudiebeja muikala nsombelu wetu ne wa bantu batudi banange mu matuku atshilualua. Tudi mua kudiela nkonko eyi: ‘Bana banyi nebikale ne muoyo mu buloba buimpe anyi? Nebabutule buloba ebu dimue dituku anyi? Kudiku tshindi mua kushintula mpindieu bua kulengeja nsombelu wanyi wa matuku atshilualua anyi?’ Nkonko ya mushindu eyi idi ileja tshitudi basue kuikala, bualu tudi basue kuikala ne nsombelu muimpe ne mu bukubi. Wewe mumanye bimpe malu atshilualua, udi mua kudilongolola bua bualu buawu ku mubidi ne mu lungenyi.

Kadi nsombelu webe wa matuku atshilualua neikale mushindu kayi? Kudiku muntu udi mumanye anyi? Amue malu adi bamanyi bapiluke bamanyishe mmakumbane, kadi a bungi kaena akumbana to. Kadi Nzambi udi wamba ne: udi mua kumanyisha malu atshilualua ne bujalame buonso. Dîyi diende didi diamba ne: ‘Ndi ndianjila kuleja bantu nshikidilu wa bualu ku tshibangidilu tshiabu, ne mu bidimu bia kale mubaleje malu akadi kaayi manji kuenjibua.’ (Yeshaya 46:10) Mmushindu kayi?

Bua tshinyi udi ne bua kutabalela milayi ya Nzambi ya kale ikadi mikumbane? Wewe mupete muntu udi umanyisha dituku dionso bua mvula anyi munya ne bujalame buonso ne bienzeka anu mudiye wamba amu, neumueyemene. Pamuapa newitabe tshivuaye muambe bua makelela. Bia muomumue, wewe mumanye ne: malu avua Nzambi mulaye mu bikondo bia kale mmakumbane, kakuyi mpata neutabalele malu adiye muambe bua matuku atshilualua.

DIBUTUKA DIA TSHIMENGA TSHINENE:

Tshilejilu, buvua bualu bua dikema bua kumanyisha ne bujalame buonso ne: tshimenga tshinene tshivua ne bukole bidimu  bia bungi, tshivua ne bua kubutudibua. Ku diambuluisha dia muleji mpala wende, Nzambi wakamanyisha dibutuka dia Ninewe. (Sefanya 2:13-15) Ntshinyi tshivua bamanyi ba malu a kale bambe? Mu bidimu bia 600 kumpala kua bikondo bietu ebi, pamuapa bidimu 15 Nzambi mumane kumanyisha bualu ebu, bena Babilona ne bena Madai bakalua kuluisha Ninewe ne kumutshimuna. Nzambi uvua kabidi mudianjile kuleja ne: Ninewe ‘neashale munda mutupu, buloba buume bu mudi tshipela.’ Mêyi aa avuaku makumbane anyi? Eyowa. Nansha muvua tshimenga etshi ne misoko ya kumpenga kuatshi biangata tshipapu tshia kilometre 518, batshimunyi kabakashiya tshitupa nansha tshimue bua bantu kusombamu muvua bantu mua kuikala bela meji to. Bakatshibutula tshionso. Kudiku mukonkononyi wa malu a tshididi udi mua kumanyisha malu a buena aa ne bujalame buonso anyi?

NEBOSHE MIFUBA YA BANTU:

Nnganyi uvua mua kuteta kumanyisha bidimu 300 kumpala dîna dia muntu ne dia nkambua wa muntu uvua ne bua kuosha mifuba ya muntu kampanda pa tshioshelu, ne kumanyisha kabidi muaba uvuabu ne bua kuasa tshioshelu atshi? Bu muntu muenze bualu bua buena ebu, uvua mua kuenda lumu bikole. Muleji mpala wa Nzambi wakamanyisha ne: ‘Muana wa balume nealedibue mu nzubu wa Davidi, dîna diende Yoshiya wakasakidila kabidi ne: neoshe mifuba ya bantu’ mu tshioshelu mu tshimenga tshia Betele. (1 Bakelenge 13:1, 2) Bidimu bitue ku nkama isatu bimane kupita, mukalenge mukuabu diende Yoshiya, kadi ki Yoshiya utu mumanyike bikole mu Bible to, wakaledibua mu ndelanganyi ya Davidi. Anu muvuabi bileja, Yoshiya wakatangila nkita yakadi ku mikuna; wakatuma bantu, ‘bakangata mifuba yakadi mu nkita, bakayosha pa tshioshelu’ tshivuabu base ku Betele. (2 Bakelenge 23:14-16) Mmunyi mudi muntu mua kumanyisha malu adi kaayi manji kuenzeka ne bujalame buonso bikalaye kayi mulombodibue kudi muntu kampanda udi ne bukole bua bungi?

NSHIKIDILU WA BUKALENGE:

Bivua mua kukemesha bikole bu muntu yeye mua kumanyisha ne bujalame buonso dîna dia muntu kampanda bidimu bia bungi kumpala kua muntu au kuledibua, uvua ne bua kubutula bukalenge kampanda buvua ne bukole pa buloba bujima, ne tshivuaye ne bua kuenza bua kukumbaja bualu ebu. Nzambi wakamanyisha ne: muntu mulume mukuabu diende Kolesha uvua ne bua kulombola basalayi bua kukuata tshisamba kampanda. Kolesha eu  uvua kabidi ne bua kupikula bena Yuda bavua mu bupika ne kubambuluisha bua bobu kuibakulula ntempelo wabu wa tshijila. Nzambi uvua kabidi mumanyishe ne: Kolesha uvua ne bua kumisha mâyi a musulu ne kupeta biibi bia tshimenga bikangula bua bobu kumona mua kutshibutula bipepele. (Yeshaya 44:27–45:2) Malu a bungi a mu mulayi wa Nzambi eu avuaku makumbane ne bujalame buonso anyi? Bamanyi ba malu a kale badi bajadika ne: Kolesha uvua bushuwa mutshimune bena Babilona. Tshiluilu tshia Kolesha tshivua tshienze mudimu ne bamanyi bapiluke bua kutshingulula mâyi a Babilona, kumisha misulu. Bualu bukuabu bua dikema mbua ne: tshiluilu tshia basalayi etshi tshiakasangana biibi bikangula ne kubuelabu mu tshimenga. Pashishe, Kolesha wakapikula bena Yuda ne kubambila bua baye kuibakulula ntempelo wa mu Yelushalema. Buvua bualu buvua kabuyi bua pa tshibidilu bualu Kolesha kavua utendelela Nzambi wa bena Yuda to. (Ezela 1:1-3) Pakumbusha Nzambi, nnganyi mukuabu uvua mua kumanyisha malu onso too ne mu katoba mushindu eu?

Tudi bakonkonone bilejilu bisatu bidi bileja muvua Nzambi mumanyishe ne bujalame buonso malu atshilualua. Malu aa ki mmalu adi menzeke mu mpukampuka to. Yoshua mulombodi wa bena Yuda uvua muambe malu avua bena Yuda ba bungi bamanye bimpe, wamba ne: ‘Nudi bamanye mu mitshima yenu yonso ne mu mioyo yenu yonso ne: kanuakapanga tshintu tshimpe tshimue tshiakanulaya Yehowa, Nzambi wenu; nuakapeta bintu bionso, kanuakapanga tshintu tshimue.’ (Yoshua 23:1, 2, 14) Bantu ba Yoshua kabavua mua kuela mpata bua dikumbana dia milayi ya Nzambi to. Kadi mmushindu kayi udi Nzambi wenza bualu ebu? Kudi dishilangana pankatshi pa njila ya Nzambi ne ya bantu. Mbia mushinga bua wewe kumanya ne: Nzambi mmulaye malu a mushinga adi ne bua kuenzeka kumpala eku adi atangila nsombelu webe.

Misangu ya bungi milayi ya bantu itu yimanyina pa malu bu mudi: makebulula a bena sianse, dikonkonona malu, ditshinka anyi pa bena mbuku. Bantu bobu bamane kumanyisha bualu kampanda budi ne bua kuenzeka, misangu ya bungi badi basomba bua kumona tshikala mua kuenzeka.​—Nsumuinu 27:1.

Nzambi yeye mmushilangane ne bantu bualu udi udianjila kumanya tshionso tshienzeka. Mmumanye bimpe bitambe tshidi bantu ne meji abu; ke bualu kayi padiye ujinga kuenza nunku, udi mua kumanya bimpe muikala muntu yonso pa nkayende mua kuenza malu ne muikala tshisamba tshijima mua kuenza malu. Kadi Nzambi udi mua kuenza kupita apu. Udi mua kulombola amue malu mu mushindu kampanda anyi kuashintulula bua bienzeke anu mudiye muambe. Udi wamba ne: ‘Dîyi didi dipatuka mukana muanyi kadiena dipingana kundi patupu, ne nedijikije muanda ungakaditumina.’ (Yeshaya 55:11) Imue misangu, milayi ya Nzambi idi ituambila anu tshikalaye mua kuenza mu matuku atshilualua. Udi wenza muende muonso bua tshionso tshidiye mulaye tshikumbane.

Kudiku dimanyisha kampanda didi diakula bua nsombelu webe wa matuku atshilualua ne wa bantu baudi munange anyi? Wewe mudianjile kumanya ne: tshipepele tshikole tshidi pabuipi ne kuenzeka, imue misangu udi mua kukeba tshia kuenza bua kupandisha muoyo webe. Ke tshiudi kabidi mua kuenza bua milayi ya Nzambi. Nzambi mmumanyishe ne: mu katupa kîpi emu, malu neashintuluke bikole pa buloba. (Tangila kazubu ka ne: “ Malu adi Nzambi mumanyishe bua matuku atshilualua.”) Malu enzeka mu matuku atshilualua mmashilangane ne adi bantu ba bungi bamanyisha.

Udi mua kuela meji ne: malu adi enzeka pa buloba kaena ashintuluka. Kadi ku diambuluisha dia milayi ya mu Bible tudi mua kumanya tshikala mua kuenzeka. Nzambi udi wamba ne: ‘Ndi ndianjila kuleja bantu nshikidilu wa bualu ku tshibangidilu tshiabu, bualu bungakadipangidijila bua kuenza nebuenjibue, nengenze malu anakusua kuenza.’ (Yeshaya 46:10) Wewe ne bena mu dîku diebe nudi mua kupeta masanka a bungi mu matuku atshilualua. Ebeja Bantemu ba Yehowa bua bakuambile tshidi Bible wamba bua malu atshilualua. Bantemu ba Yehowa ki mbena mbuku anyi kabena badiamba mudibu bayukila ne nyuma kampanda, peshi ne bukole kansanga bua pa buabu bua kumanyisha malu atshilualua. Mbalongi ba Bible badi mua kukuleja malu mimpe adi Nzambi mulaye bua kuenzela bantu kumpala eku.