Matuku adi panshi aa, tshisumbu tshia bantu badi kabayi bitaba dikalaku dia Nzambi tshivua tshifundishe dimanyisha kampanda pa dibaya ne: “Miliyo ya bantu kayena dijinga ne Nzambi to, udiku pebe munkatshi mua bantu aba anyi?” Bidi bimueneka patoke ne: kabena dijinga ne Nzambi to.

Ku lukuabu luseke, bantu ba bungi badi bamba mudibu bitabuja Nzambi badi bangata mapangadika bienze bu ne: Nzambi kenaku to. Salvatore Fisichella Kardinale wa bena Katolike wakamba bua bena mu tshitanda tshiende ne: “Tuetu baditangile bimpe, kakuena muntu udi mua kutuangata bu bena Kristo lelu eu bualu bienzedi bietu bidi anu bu bia bantu badi kabayi batendelela.”

Bamue bantu bua malu a bungi adibu nawu kabena baditatshisha bua Nzambi to. Badi bamona Nzambi bu muntu udi kule nabu kayi mua kubambuluisha mu nsombelu wabu to. Kadi bantu ba mushindu eu batu bamanya Nzambi anu padibu batuilangana ne lutatu anyi padibu dijinga ne tshintu kampanda, bienze anu bu ne: Nzambi udiku anu bua kukumbaja majinga abu.

Bakuabu kabena bangata malongesha a mu bitendelelu ne mushinga anyi kabena batumikila tshidi bitendelelu biabu bibalongesha. Tshilejilu, bia pa lukama 76 bia bena Katolike ba mu ditunga dia Allemagne badi bitabuja ne: mulume ne mukaji badi mua kubanjijangana kumpala kua bobu kuselangana pabi mmuenenu eu kena upetangana ne malongesha a mu tshitendelelu tshiabu ne Bible to. (1 Kolinto 6:18; Ebelu 13:4) Bulelela, ki mbena Katolike nkayabu badi benza malu adi abengangana ne malongesha a tshitendelelu tshiabu to. Bamfumu ba bitendelelu bia bungi badi badiabakena bua mudi bantu babu benza malu anu bu bantu badi babenga dikalaku dia Nzambi.

Bilejilu ebi bidi bitufikisha ku lukonko elu: Tudiku bulelela dijinga ne Nzambi anyi? Lukonko elu ki ndupialupia to. Luvua lujuke bua musangu wa kumpala mu mukanda wa kumpala wa mu Bible. Bua tuetu kupeta diandamuna dia lukonko elu, tuteyayi ntema ku nkonko ivua mijula mu Bible mu mukanda wa Genese.