Bikala tshitendelelu kampanda tshikutekeshe mu mikole, bidi mua kukukolela bua kueyemena tshitendelelu nansha tshimue. Kadi ikala mutuishibue ne: tshitendelelu tshiudi mua kueyemena tshidiku. Pavua Yezu pa buloba wakasangisha bayidi bende ba lulamatu ne kubalongesha mua kutumikila mikenji ya Nzambi mu nsombelu wabu. Umanye ne: bayidi balelela ba Yezu, badi badienzeja ne muabu muonso bua kutumikila mikenji ya buena Kristo batshidi anuku. Udi mua kubapetela penyi?

Estelle utuvua batele mu tshiena-bualu tshia kumpala udi wamba ne: “Ndekelu wa bionso ngakatuadija kulonga Bible ne Bantemu ba Yehowa. Kabiakanenga bua kumvua mvese wa Yone 8:32 udi wamba ne: ‘Nenumanye bulelela, ne bulelela nebunupeshe budikadidi.’”

Ray, utuvua batele mu tshiena-bualu tshia kumpala udi wamba ne: “Kulonga Bible ne Bantemu ba Yehowa kuvua kungambuluishe bua kumanye ne: Nzambi ki ngudi ukebesha ntatu idi nayi bantu to. Mvua ne disanka dia kumanya ne: Nzambi udi ne kabingila kalelela kadiye mulekeele malu mabi lelu, udi kabidi ulaya bua kuwumbusha mu katupa kîpi emu.”

Mu bulelela, mbikole bua kuenza tshidi tshimpe mu buloba budi bantu ba bungi kabayi mua kutumikila mikenji ya Nzambi to. Kadi kudi anu mushindu. Bantu ba bungi badi dijinga ne diambuluisha bua kumvuabu ne kutumikila tshidi Bible wamba. Ke bua tshinyi Bantemu ba Yehowa batu balonga ne miliyo ya bantu Bible pa buloba bujima kabayi babalomba makuta to. Lumingu luonso, bantu ba bungi badi balonga tshidi Bible ulongesha menemene. Ke bualu kayi badi basemena pabuipi ne Mufuki wabu ne bavuija nsombelu wabu muimpe. *

Wewe mumonangane ne Bantemu ba Yehowa musangu walonda, kuenaku mua kubebeja bua tshinyi mbeyemene tshitendelelu tshiabu? Konkonona malongesha abu ne muvuabu babange. Pashishe udi mua kuangata dipangadika nkayebe bikalaku kudi tshitendelelu tshiudi mua kueyemena.