ELABI meji, mulunda webe wa pa muoyo udi wenza bualu kampanda buudi kuyi umvua bua tshinyi mmubuenze. Kadi bantu bakuabu badi batuadija kuakula bibi bua tshidiye muenze, bamba ne: mulunda webe mmuena tshikisu. Newitabuje ne lukasa luonso tshidibu bamba anyi, peshi newanji kujinga bua kuteleja tshidi mulunda webe wamba? Kadi biobi bienzeke ne: mulunda webe kenaku bua kukumvuija nkayende tshidiye muenze, newikale ne lutulu lua kumuindila too ne pikalaye mua kulua anyi?

Kumpala kua kuandamuna nkonko eyi, bidi bikengela kumanya malu a bungi. Tshilejilu, udi mua kudiebeja ne: ‘Ndiku mumanye mulunda wanyi eu bimpe anyi? Bua tshinyi ndi mumunange bikole?’ Kumanya malu a buena aa kudi ne mushinga. Kadi katuenaku mua kukuata mudimu ne lungenyi lua mushindu eu bua kumanya bikala Nzambi mmuena tshikisu anyi?

Bidi mua kukukolela bua kumvua amue malu adi Nzambi wenza, anyi bidi mua kukukemesha bua kumona amue malu adiye mulekele enzeka. Bantu ba bungi nebakuambile ne: Nzambi mmuena tshikisu, ne badi mua kukusaka bua kumona ne: Nzambi udi wenza malu aa ne meji mabi. Newindile too ne pawamanya malu a bungi, kuyi wanji kumuelela meji mabi anyi? Kumpala kua kuelela Nzambi meji mabi, mbimpe kuanji kumanya malu a bungi pa bidi bimutangila. Udi mua kudiebeja ne: ‘Nzambi mmulunda wa mushindu kayi kundi?’

Biwikala mutuilangane ne ntatu ya bungi mu nsombelu webe, bidi mua kukufikila bua kuela meji ne: Nzambi kena mua kuikala mulunda wa muntu nansha umue to. Kadi anji elabi meji ndambu. Nzambi udiku ujinga bua wikale ne ntatu mu nsombelu webe anyi? Peshi mmusue bua wikale ne masanka? Anu bu mutukadi bamone, Satana ke udi “mukokeshi wa buloba ebu.” (Yone 12:31) Nunku Satana ke mukebeshi wa ntatu ya bungi ne makenga bidi bantu nabi lelu eu. Pakumbusha Satana, dipanga dietu dia bupuangane ne dishintuluka dia malu bidi bikebela bantu ntatu ya bungi.

Ku lukuabu luseke, tshinyi tshivua Nzambi muenze? Mona tshidi Bible wamba: Nzambi ke ‘wakafuka diulu ne buloba’; mu midimu yende mudi kabidi mubidi wetu udi ‘mufukibue’ mu mushindu ‘udi ukemesha’; Yehowa udi ‘Nzambi udi ne mupuya webe mu tshianza tshiende.’ (Musambu 124:8; 139:14; Danyele 5:23) Bionso ebi bidi biumvuija tshinyi?

Bidi biumvuija ne: mupuwa wetu ne muoyo wetu bidi mu bianza bia Mufuki wetu. (Bienzedi 17:28) Nunku muoyo utudi nawu, bulengele bua bintu bidi bitunyunguluke, dinanga, bulunda, disanka dia kulabula bintu, kulenga, kuteleja ne kumvua mupuya, bionso ebi mmapa a kudi Nzambi. (Yakobo 1:17) Kuenaku umona ne: masanka onso aa adi enza bua Nzambi ikale Mulunda wetu utudi ne bua kuangata ne mushinga ne kueyemena anyi?

Bidi mua kukukolela bua kueyemena Nzambi. Imue misangu udi mua kuikala wamba ne: bu mundi tshiyi mumumanye bimpe tshiena mua kumueyemena to. Muntu udi mua kuela meji mushindu eu. Mu biena bualu bîpi ebi, katuena mua kukuleja malu onso adi asaka bantu bua kuela meji ne: Nzambi mmuena tshikisu to. Kadi kuenaku umona ne: bidi ne mushinga bua wewe kumanya Nzambi bimpe anyi? * Tudi batuishibue ne: wewe muenze nunku, neufike ku dimanya bulelela pa bidi bitangila Nzambi. Mmuena tshikisu anyi? Kabiena nanku to, bualu “Nzambi udi dinanga.”​—1 Yone 4:8.