TATU kampanda udi wambila muanende padibu bakeba kusambuka njila udi ne mashinyi a bungi ne: “Nkuata ku tshianza.” Muana eu udi udiumvua mu bukubi ne kena ne buôwa bualu tatuende mmumukuate bikole ku tshianza. Kutuku muanji kujinga pebe bua muntu kampanda akukuate ku tshianza bua kukulombola bimpe mu nsombelu uudi kuyi mumanye tshidi mua kukufikila anyi? Bikalabi nanku, mêyi a mu Yeshaya adi mua kukukolesha.​—Bala Yeshaya 41:10, 13.

Yeshaya uvua muambile Isalele mêyi ende aa. Nansha muvua Nzambi wangata bena mu tshisamba etshi bu ‘bantu bende,’ bavua babanyunguluke kudi baluishi. (Ekesode 19:5) Isalele uvua ne bua kumvua buôwa anyi? Yehowa wakatuma Yeshaya bua kubambila mêyi a kubakankamija nawu. Patudi tukonkonona mêyi aa, tuikale bamanye ne: adi atangila kabidi batendeledi ba Nzambi ba lelu.​—Lomo 15:4.

Yehowa udi wamba ne: “Kutshinyi.” (Mvese wa 10) Yehowa kena wamba mêyi aa patupu to. Udi umvuija bua tshinyi tshisamba tshiende katshiena ne bua kutshina. Udi wamba ne: ‘Bualu bua ndi nebe.’ Yehowa katu unenga bua kuambuluisha bantu bende, utu ubambuluisha anu mu tshikondo tshidibu dijinga ne diambuluisha. Mmusue bua bantu bende bamanye ne: udi nabu ne udi pabuipi bua kubambuluisha. Mêyi aa kaenaku akukolesha anyi?

Yehowa udi ujadikila batendeledi bende wamba ne: ‘kukenzakanyi bua buôwa nansha.’ (Mvese 10) Muaku wa tshiena Ebelu udibu bakudimune muaba eu, udi uleja aba badi “bakenzakana ku nseke yonso bua kumona ni kudi tshitu kampanda tshidi mua kubenzela bibi.” Yehowa udi umvuija bua tshinyi bantu bende kabena mua kumvua buôwa, bualu udi ubajadikila ne: ‘Ndi Nzambi webe.’ Tshinyi tshikuabu tshidi mua kukolesha kupita mêyi aa? Yehowa udi “Nzambi Mutambe Bunene,” ne “wa Bukole Buonso.” (Musambu 91:1) Bu mudi Yehowa Nzambi wabu muikale ne bukole buonso, ntshinyi tshivuabu mua kutshina?

Kadi ntshinyi tshidi batendeledi ba Yehowa batekemene kudiye? Mmubalaye ne: “Bulelela, nenkujadike ne tshianza tshianyi tshia balume tshia buakane buanyi.” (Mvese wa 10) Udi ubalaya kabidi ne: “Meme, Yehowa Nzambi webe, nenkukuate ku tshianza tshiebe tshia balume.” (Mvese wa 13) Udi wela meji kayi paudi umvua mêyi aa? Mukanda kampanda udi umvuija ne: “Patudi tubala mvese ibidi eyi tudi tumona tshimfuanyi tshinene tshia muledi ne muanende. Tatu kena anu ujinga bua kukuba muana, kadi udi kabidi umukuata ku tshianza, kena wanyisha bua tshintu kampanda tshibapandulule to.” Anji elabi meji, Yehowa kakuitaba bua tshintu kampanda tshimupandulule ne bantu bende nansha mu tshikondo tshidi tshimueneka bu tshikondo tshia mîdima mu nsombelu wabu.​—Ebelu 13:5, 6.

Lelu, mêyi a mu Yeshaya aa adi mua kukolesha bantendeledi ba Yehowa. Mu tshikondo etshi tshia “malu makole,” tudi mua kudiumvua imue misangu bu ne: ntatu ya mu nsombelu mmitupite mutu. (2 Timote 3:1) Kadi katuena mua kutantamena ntatu eyi tuetu nkayetu to. Yehowa mmusue kutukuata ku tshianza bua kutuambuluisha. Anu bu bana badi beyemena baledi babu, tudi mua kukuata ku tshianza tshiende tshia bukole batuishibue ne: neatulombole mu njila muakane ne neatuambuluishe mu tshikondo tshitudi dijinga ne diambuluisha.​—Musambu 63:7, 8.