Mmalu kayi adi bana ne bua kulonga?

‘Dîyi dionso dia mu Mukanda wa Nzambi didi difume munda mua Nzambi bu mupuya wende ne didi ne mudimu muimpe wa kuyisha bantu, ne wa kubabela, ne wa kubadimuija, ne wa kubalongesha mu buakane bua Nzambi.’​—2 TIMOTE 3:16.

MBIMPE kulongesha bana bulelela budi butangila Nzambi. Badi mua kubulongela kuepi? Mmu Bible, mukanda wa malu a Nzambi udi bantu banemeka pa buloba bujima.

Bible udi bu mukanda udi Nzambi mutufundile. Mu mukanda emu Nzambi udi utuleja mutuye ne mmufilamu mibelu ya mu nsombelu idi bana bende bonso, bakulumpe ne bana ne bua kulonda. Mona amue a ku malu adi Bible wamba ne malongesha adi too ne bana mua kupetelaku.

Mmalu kayi adi atangila Nzambi adiye musue bua tumanye?

◼ Tshidi Bible wamba: ‘Wewe nkayebe, ngudi muidike dîna dia Yehowa, udi Mutambe Bunene wa pa mutu pa buloba bujima.’​—Musambu 83:18.

Dilongesha: Nzambi ki mbukole kampanda to, kadi mmuntu wetu wa bushuwa eu muikale ne dîna diende nkayende.

◼ Tshidi Bible wamba: ‘Yehowa udi ukebakeba mitshima ya bantu bonso; udi ujingulula meji onso adibu bela munda muabu; biwamukeba, neumupete.’​—1 Kulondolola 28:9.

Dilongesha: Yehowa Nzambi udi uditatshisha buetu tuetu bonso, nansha bua bana batekete. (Musambu 10:14; 146:9) Mmusue bua tumanye malu adi amutangila.

◼ Tshidi Bible wamba: ‘Kanukengeshi bana ba nshiya. Biwabakengesha ne biadilabu kundi, meme nengumvuile muadi wabu.’​—Ekesode 22:22-24.

Dilongesha: Yehowa udi uteleja masambila nansha a bana batekete. Tudi mua kuyukila ne Nzambi misangu yonso ne kumuleja malu adi munda muetu ne mu meji etu.

◼ Tshidi Bible wamba: ‘Bakapingana kunyima, bakateta Nzambi, bakatatshisha wa Tshijila wa Bena Isalele.’​—Musambu 78:41.

Dilongesha: Ngakuilu wetu ne bienzedi bietu bidi mua kusankisha anyi kubungamija Yehowa; nanku mbimpe kuela meji kumpala kua kuakula ne kua kuenza bualu.

 Mmunyi mutudi mua kumona bantu badi bashilangane netu?

◼ Tshidi Bible wamba: ‘Nzambi kena ne kansungansunga, kadi yeye udi witabuja wa mu tshisamba tshionso udi umutshina, udi wenza malu makane.’​—Bienzedi 10:34, 35.

Dilongesha: Bu mudi Nzambi wanyisha bantu ba mishindu yonso, katuena ne bua kusunguluja bakuabu anu bualu dikoba diabu anyi kuisu kuabu nkushilangana ne kuetu to.

◼ Tshidi Bible wamba: ‘Nuikale badilongolola misangu yonso bua kukudimuna dîyi kudi muntu yonso udi unukonka bua muanda wa ditekemena didi munda muenu; kadi nuenze nunku ne kalolo ne ditshina.’​—1 Petelo 3:15.

Dilongesha: Patudi tuyukila ne bantu malu a Nzambi, tudi ne bua kubaleje mmuenenu wetu ne malu atudi bitabuje ne dishindika kadi bikale ne dîyi dimpe. Tudi kabidi ne bua kunemeka bantu badi ne malongesha mashilangane ne etu.

Mmunyi mutudi mua kuenzela bena mu dîku dietu malu?

◼ Tshidi Bible wamba: ‘Bana, nutumikile baledi benu mu malu onso, bua bualu ebu budi buanyishibua mu Mukalenge.’​—Kolosai 3:20.

Dilongesha: Padi bana batumikila baledi babu, badi baleja ne: mbabanange ne mbasue bua kusankisha Nzambi.

◼ Tshidi Bible wamba: ‘Nulejangane lutulu, nulekelelangane mibi yenu, bikala muntu ne mukuabu tshilumbu; bu muakanubuikidila Mukalenge mibi yenu; nuenu nuenze muomumue kabidi.’​—Kolosai 3:13.

Dilongesha: Imue misangu, bantu bakuabu nansha bena mu dîku dietu badi mua kutubungamija. Kadi tuetu basue bua Nzambi atufuile luse, tudi ne bua kufuila petu bakuabu luse.​—Matayo 6:14, 15.

 Bua tshinyi kuikala anu bantu bena malu mimpe ne badi bamba bulelela?

◼ Tshidi Bible wamba: ‘Nulekele mashimi, muntu ne muntu nuambilangane ne muena mutumba nenu mêyi malelela.’​—Efeso 4:25.

Dilongesha: Patudi tuamba bulelela, tudi tuidikija Yehowa ne tumusankisha. Kadi tuetu ne tshibidilu tshia kushima, tudi tufuana Diabolo, muluishi wa Nzambi udi ‘tatu wa mashimi.’​—Yone 8:44; Tito 1:2.

◼ Tshidi Bible wamba: “Nuenzele bantu malu onso anudi basue banuenzele.”​—Matayo 7:12.

Dilongesha: Tudi ne bua kuangata mushindu udi bena mu dîku dietu ne bantu bakuabu badiumvua, meji adibu bela ne malu adibu nawu dijinga ne mushinga. Patudi ‘tusambangane,’ bantu bakuabu nebajinge bua kutuenzela pabu malu mimpe.​—1 Petelo 3:8; Luka 6:38.

Anu mudi bilejilu ebi bileja, malongesha adi mu Bible adi mua kuambuluisha bana bua kuluabu bantu bakole badi baleja dianyisha, badi banemekangana ne baditeka pa muaba wa bakuabu. Kadi nnganyi udi ne bua kulongesha bana malu aa?