BUEBE wewe, bituku bikole imue misangu bua kutumikila anyi?— * Kuena nkayebe to, bitu bikolela bantu bonso imue misangu bua kutumikila. Udi mumanye ne: nansha Yezu wakalonga pende bua kutumikila anyi?—

Bana bonso badi ne bua kutumikila nganyi?— Papa ne mama. Mukanda wa Nzambi udi wamba ne: ‘Bana, tumikilayi baledi benu mu Mukalenge; bua bualu ebu budi buakane.’ (Efeso 6:1) Papa wende wa Yezu nnganyi?— n’Nzambi; udi kabidi Papa wetu tuetu bonso. (Matayo 6:9, 10) Kadi muntu yeye muambe ne: papa wende wa Yezu n’Jozefe anyi ne: mama wende m’Mariya, kena muambe bibi to. Udi mumanye muakaluabu baledi ba Yezu anyi?—

Muanjelu Gabriele wakumvuija Mariya muvuaye mua kulela muana nansha muvuaye kayi mumanye balume. Yehowa wakenza tshishima tshinene bua Mariya kupeta difu dia Yezu. Gabriele wakambila Mariya ne: ‘Nyuma muimpe nealue kuudi, ne bukole bua udi Mutambe Bunene wa mu diulu nebukubuikile bu ditutu; nebinyike muana wa tshijila uwalela ne: Muana wa Nzambi.’​—Luka 1:30-35.

Nzambi wakumbusha Muanende mu diulu, kumuelaye mu difu dia Mariya. Wakakolela mu difu dia Mariya anu mutu bana bonso bakolela munda mua ba mamuabu. Mariya wakalela Yezu pakapita ngondo mitue ku 9. Jozefe wakalua kusela Mariya, ke bantu ba bungi kuela meji ne: Jozefe ke uvua papa wende wa Yezu mumuledi. Pabi Jozefe kavua tatuende menemene to. Ke muvua Yezu mupete ba papa babidi nanku.

Pavua Yezu ne bidimu 12, wakenza bualu buakaleja muvuaye munange Papa wende Yehowa bikole menemene. Tshidimu atshi, Jozefe ne Mariya bakenza luendu batangile ku Yelushalema bua kudia Pasaka bu muvuabu benza bidimu bionso. Bobu bamane kudia Pasaka, kutuadija kupingana kuabu ku Nazaleta, kabayi bamanye ne: Yezu uvua mushale mu Yelushalema to. Udi mumanye tshivua tshienze bua bamupue muoyo anyi?—

Umanye ne: Jozefe ne Mariya bakavua balele bana bakuabu tshikondo atshi. (Matayo 13:55, 56) Bavua mua kuikala kabidi benze luendu pamue ne balela babu bakuabu bu mudi: Yakobo ne Yone ne papa wabu Zebedayo ne mama wabu Salome. (Salome uvua mua kuikala muanabu ne Mariya.) Nunku Mariya uvua mua kuikala wela meji ne: Yezu uvua ne balela babu.​—Matayo 27:56; Mâko 15:40; Yone 19:25.

Pakamona Jozefe ne Mariya ne: Yezu uvua mushale, bakapingana lubilu mu Yelushalema. Bobu kukebangana ne Yezu ne muoyo kulukulu. Matuku asatu mamane kupita, bobu kumusangana mu ntempelo. Ke Mariya kumuambila ne: ‘Muananyi, wakatuenzela nunku tshinyi? Tatu webe ne meme kabidi tuakukukeba tunyingalala.’ Yezu kumuambila ne: ‘Nuakadi nunkebela tshinyi? Kanuena bamanye ne: Bundi nabu mbua kuikala mu malu a Tatu wanyi?’​—Luka 2:45-50.

Udi wela meji ne: Yezu uvua muandamune  mamuende bibi anyi?— Kadi Jozefe ne Mariya bavua bamanye ne: uvua musue bikole kutendelela mu nzubu wa Nzambi. (Musambu 122:1) Nunku Yezu uvua mua kuikala muele meji ne: muaba wa kumpala uvuabu mua kuya kumukeba uvua ne bua kuikala amu ku ntempelo wa Nzambi. Mariya wakashala anu wela meji bua mêyi a Yezu au.

Yezu wakafikila Jozefe ne Mariya munda anyi?— Mukanda wa Nzambi udi wamba ne: ‘Yezu wakapueka nabu, wakaya ku Nazaleta; wakadi utumikila mêyi abu.’ (Luka 2:51, 52) Tshilejilu tshia Yezu tshidi tshitulongesha tshinyi?— Tuikale petu tutumikila baledi betu.

Kabivua anu bitekete bua Yezu kutumikila Jozefe ne Mariya, nansha Papa wende wa mu diulu Yehowa to.

Tshilejilu, butuku bua muladilu wa lufu luende, Yezu wakalomba Yehowa ni uvuaku mua kushintulula meji ende bua tshivuaye musue bua Yezu kuenza. (Luka 22:42) Kadi Yezu wakatumikila Nzambi nansha muvua bualu abu bukole. Bible udi wamba ne: ‘Wakayila ditumikila ku malu akakengaye nawu.’ (Ebelu 5:8) Tudi petu mua kulongela ditumikila ku makenga anyi?—