Mbulelela anyi ndishima: Yezu uvua nganyi?
Mbulelela anyi ndishima: Yezu uvua nganyi?
UDI WELA MEJI KAYI? MALU ADI ALONDA AA MMALELELA ANYI NGA DISHIMA?
Bakalela Yezu mu dia 25 ngondo wa 12.
Bena meji basatu bavua balue kumona Yezu dituku divuabu bamulele.
Yezu uvua mulela nkaya.
Yezu uvua Nzambi mu mubidi wa bantu.
Yezu kavua anu muntu muimpe patupu to.
BANTU ba bungi badi mua kuamba ne: malu aa mmalelela. Bakuabu pabu badi mua kuamba ne: mbikole bua kumanya ni mmalelela anyi ne: kakuena mushindu wa kujadika ni mmalelela peshi a dishima. Badi pamuapa bela meji ne: padi muntu muitabuje Yezu kabiena amu ne mushinga bua kuditatshisha bua malu aa to.
Kadi Bible yeye udi wamba malu mu mukuabu mushindu. Udi utukankamija bua kupeta ‘dimanya ditue dia Mfumu wetu Yezu Kristo.’ (2 Petelo 1:8, Muanda Mulenga Lelu) Tudi tupeta dimanya edi patudi tukonkonona mukanda wa Matayo, Mâko, Luka ne Yone. Mikanda eyi idi ituleja bulelela pa bidi bitangila Yezu ne ituambuluisha bua kusunguluja malu malelela ne a dishima. Tukonkononayi tshidi mikanda eyi yamba bua malu adi bantu bitabuja adi ku ntuadijilu kua tshiena-bualu etshi.
TSHIDI BANTU BITABA: Bakalela Yezu mu dia 25 ngondo wa 12.
MBULELELA ANYI NDISHIMA? NDISHIMA.
Kakuena mvese musunguluke mu Bible udi wakula bua ngondo anyi dituku divuabu balele Yezu to. Kadi dituku dia 25 ngondo wa 12 ndifume kuepi? Bilondeshile mukanda kampanda, bamue bantu bavua badiamba muvuabu bena Kristo “bakajinga bua dituku edi dipetangane ne dituku divua bena Lomo benza tshibilu tshivua tshileja ntuadijilu wa tshikondo tshia mashika tshitu matuku mikale male kupita butuku ne mulu mutubuke.” (The Encyclopædia Britannica) Mukanda eu udi wamba kabidi ne: bilele bia bungi bia Nowele mbifumine ku “fete ya batendeledi ba nzambi ya dishima bivuabu benza munkatshi mua muvu wa mashika bua madimi abu.”
Yezu uvuaku mua kuitaba bua bantu kusekelela diledibua diende mu dia 25 ngondo wa 12 anyi? Tumanye ne: dituku divuabu balele Yezu ki ndimanyike. Kakuena muaba nansha umue mu Bible udibu batuambile bua kusekelela diledibua dia Yezu, nansha udibu baleje muvua bena Kristo ba kumpala badisekelele to. Kadi Bible udi utuleja dituku divua Yezu mufue, ne wakambila bayidi bende bua kuvuluka dituku edi. * (Luka 22:19) Nunku, Yezu uvua musue bua bantu bavuluke mulambu wa mushinga uvuaye mufile pakafuaye, ki ndiledibua diende to.—Matayo 20:28.
TSHIDI BANTU BITABA: Bena meji basatu (badibu babikila miaba mikuabu ne: bakalenge) bavua balue kumona Yezu dituku divuabu bamulele.
MBULELELA ANYI NDISHIMA? NDISHIMA.
Ukadi pamuapa mumone bintu bizola anyi mu manaya baleja Yezu utshidi muana muladika mu tshidiilu tshia nyama, munyunguluke kudi bena meji basatu bambule bintu bia kumupesha. Tshimfuanyi etshi ntshia mafi, ki ntshilelela to.
Tudi bamanye ne: bantu bavua bafume ku Est bua kukukuila Yezu patshivuaye muana. Kadi mu bulelela, bantu aba bavua bamanyi ba malu a mitoto. (Matayo 2:1) Bavuaku basangane Yezu muladika mu tshidiilu tshia nyama anyi? Tòo, bavua baye kumumuena kumbelu. Bidi bimueneka ne: bavua bafike kudi Yezu ngondo mikese yeye mumane kuledibua.—Matayo 2:9-11.
Bantu aba bavua bungi kayi? Bavua babidi, basatu anyi makumi asatu? Bible ki mmuambe bungi buvuabu to. Batu bamba ne: bavua basatu pamuapa bualu bavua balue ne mishindu isatu ya bintu. * (Matayo 2:11) Kudi bantu batu bamba ne: yonso wa ku bantu badibu babikila ne: bena meji abu uvua uleja mpala wa bantu ba makoba mashilangane. Kadi Bible kena wamba nanku to. Bilondeshile mukanda kampanda udi umvuija mukanda wa Matayo, Mâko, Luka ne Yone, “mufundi kampanda wa malu a kale wa mu bidimu bia 700 uvua musue kufuikakaja malu bikole” ke uvua mupatule bualu bua dishima ebu.
TSHIDI BANTU BITABA: Yezu uvua mulela nkaya.
MBULELELA ANYI NDISHIMA? NDISHIMA.
Bible udi uleja patoke ne: Yezu uvua ne bana babu ba balume ne ba bakaji. Mukanda wa Luka udi wamba mudi Yezu muikale ‘muan’a bute’ wa Mariya, bua kuleja ne: Mariya uvua mulele bana bakuabu pashishe. * (Luka 2:7) Mukanda wa Mâko udi uleja ne: kuvua bantu ba mu tshimenga tshia Nazaleta bavua bambe muvua Yezu kayi mushilangane ne bana babu, ne kabakamuangata ne mushinga to. Ke bualu kayi bakebeja ne: ‘Kena muanabu ne Yakobo ne Yosefe ne Yuda ne Simona anyi? Bana babu ba bakaji kabena munkatshi muetu anyi?’—Mâko 6:3; Matayo 12:46; Yone 7:5.
Nansha mudi Bible wamba ne: Yezu uvua ne bana babu, bantu ba bungi batu balonga malu a bitendelelu badi bamba amu ne: Yezu uvua mulela nkaya. Kudi bakuabu badi bamba ne: bana babu ne Yezu abu bavua mua kuikala bana ba bamansebende ne ba batatuende mukaji. * Bakuabu pabu badi bamba ne: bana aba bavua ba bayende wa Mariya. Kadi bu Yezu muikale muana mulela umue wa Mariya, bena Nazaleta bavuaku mua kuamba muvuabu bambe amu anyi? Bamue ba kudibu bavua pamuapa badimuene ne abu abidi pavua Mariya ne mafu a bana abu. Bavua bamanye ne: Yezu uvua umue wa ku bana bavua Mariya mulele.
TSHIDI BANTU BITABA: Yezu uvua Nzambi mu mubidi wa bantu.
MBULELELA ANYI NDISHIMA? NDISHIMA.
Lungenyi lua ne: Nzambi ke Yezu uvua mulue pa buloba ne musombe ne bantu kudi dilongesha dia Busatu Bunsantu difumine, ludi lutangalake mu bantu kukadi bidimu bia bungi, kadi kaluvua lutuadije mu tshikondo tshivua Yezu pa buloba to. Mukanda kampanda udi wamba ne: ‘Mu Dipungila Dipiadipia kamuena tshiambilu tshia Busatu Bunsantu peshi kabena bumvuijamu dilongesha edi to. Diakatangalaka ku kakese ku kakese mu kupita kua bidimu ne mu dikokangana dia bungi.’—The Encyclopædia Britannica.
Padi bitendelelu bilongesha bantu ne: Nzambi ke Yezu uvua mulue pa buloba, bidi bipuekesha Yezu milongo. * Mushindu kayi? Tuangate tshilejilu. Bena mudimu badi balomba tshintu kampanda kudi mulombodi wabu, kadi udi ubambila ne: kena ne bukokeshi bua kubapeshatshi. Pikala tshidi mulombodi muambe tshilelela, mmuleje mudiye kayi ne bukokeshi bua kuenza malu onso. Kadi mmushime bikalaye ne bukokeshi bua kubapeshatshi kadi ubenga.
Ntshinyi tshiakenza Yezu pavua bapostolo bende babidi bajinge miaba minene? Wakabambila ne: ‘Kushikama ku tshianza tshianyi tshia balume ne ku tshianza tshianyi tshia bakaji ki mbualu buanyi bua kupa muntu; kushikama nunku kudi bualu bua bantu bakabulongoluelabu kudi Tatu wanyi.’ (Matayo 20:23) Bu Yezu muikale Nzambi, mêyi ende aa kaavua mua kuikala a dishima anyi? Yezu mmutushile tshilejilu tshimpe tshia kudipuekesha pavuaye muitabe ne: kuvua muntu uvua ne bukokeshi butambe buende. Wakaleja patoke muvuaye kayi diatshimue ne Nzambi.
TSHIDI BANTU BITABA: Yezu kavua anu muntu muimpe patupu to.
MBULELELA ANYI NDISHIMA? MBULELELA.
Yezu wakamba patoke muvuaye kayi anu muntu muimpe patupu to. Wakamba ne: “Ndi Muana wa Nzambi.” (Yone 10:36) Bushuwa, muntu yonso uvua mua kuamba muvuaye Muana wa Nzambi. Kadi bikala Yezu uvua mushime, tuvua mua kumumona mushindu kayi? Katuvua mua kumumona bu muntu muimpe to, kadi anu bu muena dishima munene.
Nzambi nkayende wakafila tshijadiki tshitambe bunene tshia muvuaye Muanende. Wakamba misangu ibidi ne: “Eu udi Muana wanyi.” (Matayo 3:17; 17:5) Anji ela meji: Bible udi uleja anu miaba mikese patupu ivua dîyi dia Nzambi diumvuike pa buloba, kadi mu ibidi ya kudiyi Nzambi wakamba muvua Yezu muanende. Etshi ntshijadiki tshinene tshidi tshileja ne: Yezu kavua mushime pavuaye muambe ne: uvua Muana wa Nzambi.
Udiku mupete malu kampanda adi atangila Yezu auvua kuyi mumanye anyi? Pikalabi nanku, kuenaku mua kukonkonona kabidi mukanda wa Matayo, Mâko, Luka ne Yone idi mifundisha ku nyuma wa Nzambi anyi? Dikonkonona edi nedikupeteshe masanka a bungi. Yezu muine wakamba ne: bua kupeta “muoyo wa tshiendelele” mbimpe kulonga bulelela budi bumutangila yeye ne Tatuende.—Yone 17:3.
[Mêyi adi kuinshi]
^ tshik. 13 Bilondeshile kalandrié ka bena Yuda, Yezu wakafua mu dituku dia Pasaka anyi mu dia 14 ngondo wa Nisana.—Matayo 26:2.
^ tshik. 18 Matayo udi wamba ne: bantu aba ‘bakabulula bibutshilu biabu’ ne kupesha Yezu ngolo, manananshi ne mula. Bidi bimueneka ne: bavua balue ne bintu bia mushinga ebi mu tshikondo tshikumbane bualu bakavua pa kuenzeja baledi ba Yezu bavua bapele bua kunyemena mu ditunga dikuabu.—Matayo 2:11-15.
^ tshik. 21 Nansha muvua Mariya muimite Yezu mu tshishima, wakalua kulela bana bakuabu ne bayende Yosefe anu mutu bantu bonso balela.—Matayo 1:25.
^ tshik. 22 Dilongesha edi divua Jerome mupatule mu tshidimu tshia 383 nditangalake bikole munkatshi mua bantu badi bitabuja ne: Mariya wakashala kamama matuku ende onso a muoyo. Jerome wakalua kuamba muvua dilongesha edi kadiyi dilelela to, kadi bantu ba bungi ne banene ba mu Katolike batshidi anu badilamate.
^ tshik. 26 Wewe musue kumanya malu a bungi pa bidi bitangila dilongesha dia Busatu Bunsantu, udi mua kubala kakanda kadi kamba ne: Tudi ne bua kuitabuja Busatu Bunsanto anyi?, kapatula kudi Bantemu ba Yehowa.
[Kazubu/Tshimfuanyi mu dibeji 14]
Malu makuabu adi mua kukukemesha
Yezu uvua muntu wa mushindu kayi? Uvuaku muntu wa malu makole, muntu wa mashika mashika ne wa bunyengu uvua kayi mua kusomba ne bantu bakuabu anyi? Kudi bantu badi mua kuamba ne: ke muvuabi. Ke bualu kayi bidi pamuapa bibakemesha padibu bamanya ne: Yezu . . .
• uvua uya mu fete.—Yone 2:1-11.
• uvua wela bantu kalumbandi.—Mâko 14:6-9.
• uvua musue kusomba ne bana.—Mâko 10:13, 14.
• uvua udila patoke.—Yone 11:35.
• uvua uditeka pa muaba wa bakuabu.—Mâko 1:40, 41.
