Dilongesha didi ditampakane bikole

“Mvua mulote tshilota tshibi tshia inferno! Ngakalota bankupa mu mudilu mukole meme kutabuluka ngela mbila. Nanku, meme kuenza muanyi muonso bua tshienji malu mabi to.”​—Arline.

UTU pebe witaba ne: inferno muaba udibu bakengeshila bantu babi mu mudilu anyi? Bantu ba bungi badi bitaba bualu ebu. Tshilejilu, mu tshidimu tshia 2005, mulongeshi mukuabu wa mu iniversite wa Saint Andrews wa mu ditunga dia Ecosse wakasangana ne: tshia bisatu tshia bamfumu ba bitendelelu bia mu Ecosse badi bitaba ne: bantu badi kule ne Nzambi badi ne bua kukenga “mu lungenyi mu inferno bua kashidi.” Muntu umue pa batanu udi witaba ne: bantu badi mu inferno badi boshika mubidi kadi kabayi bafue.

Dilongesha dia inferno wa kadilu nditampakane bikole. Tshilejilu, mu États-Unis bantu 70 pa 100 bavuabu bela nkonko bakamba mudibu bitaba dilongesha dia inferno wa kadilu. Badi baditaba bualu ebu too ne mu matunga mudi bantu ba bungi kabayi banange malu a Nzambi. Mu tshidimu tshia 2004 mu ditunga dia Canada, bantu 42 pa 100 bavuabu bela nkonko bavua bitaba dilongesha dia inferno. Nansha mu ditunga dia Grande Bretagne, bantu 32 pa 100 badi bitaba ne muoyo mujima ne: inferno udiku.

Tshitu bamfumu ba bitendelelu balongesha

Bamfumu ba bitendelelu ba bungi kabatshiena balongesha kabidi ne: inferno mmuaba udibu bakengesha bantu mu mudilu muena dîna eu to. Kadi, bakadi bafila diumvuija difuanangana ne didi mu mukanda wa malongesha a bena Katolike mupatula mu tshidimu tshia 1994. (Catechism of the Catholic Church) Mukanda eu udi wamba ne: “Dinyoka ditambe bunene dia mu inferno ndia kuikala kule menemene ne Nzambi bua kashidi.”

Nansha nanku, bantu ba bungi batshidi anu bitaba ne: inferno mmuaba udibu bakengeshila bantu mu lungenyi anyi ku mubidi bua kashidi. Bantu batu balongesha bualu bua inferno batu bamba ne: ndilongesha dia mu Mukanda wa Nzambi. Mulombodi wa tulasa tua seminere tua ba Batiste diende Albert Mohler udi wamba ne: “Ndilongesha dia mu Bible.”

Bua tshinyi malu audi witaba adi ne mushinga?

Inferno yeye muikale muaba wa kukengeshila bantu mu mudilu, udi ne bua kukuenza buôwa. Kadi, bikala dilongesha edi diodi dia dishima, bamfumu ba bitendelelu badi badilongesha badi babueja bantu badi babalonda mu tshibuejakaji ne babatshingisha mu lungenyi tshianana. Badi kabidi bapenda Nzambi.

Bible udi pende wamba tshinyi bua bualu ebu? Mu biena-bualu bidi bilonda ebi netuenze mudimu ne Bible wa bena Katolike ne wa bena Mishonyi bua kuandamuna nkonko isatu eyi: 1) Tshinyi tshitu tshienzeka padi muntu ufua? 2) Yezu wakalongesha tshinyi bua inferno? 3) Mmushindu kayi udi dimanya dia bulelela pa bidi bitangila inferno mua kukuambuluisha?