Malu atudi tumanyina kudi Yezu

Mushindu wa kuenzela bakuabu malu

Bua tshinyi kuikala ne muoyo muimpe?

Utu wenzela bantu malu mimpe nansha bobu kabayi bakuenzela wewe nawu anyi? Tuetu basue kuidikija Yezu, tudi ne bua kuenzela bakuabu malu mimpe nansha bobu kabayi batunange. Yezu wakamba ne: ‘Binuasua anu badi banusue, nenuikale ne disakidila kayi? Bualu bua bantu babi badi basue badi babasue. Kadi nuenu suayi badi nenu lukuna, nenuikale bana ba udi Mutambe Bunene wa mu diulu, bualu bua yeye udi wenzela badi kabayi bamusakidila ne badi babi malu mimpe.’​—Luka 6:32-36; 10:25-37.

Bua tshinyi kufuilangana luse?

Tutu basue bua Nzambi ikala utufuila luse patudi benze malu mabi. Yezu uvua mulongesha bantu ne: tudi ne bua kulomba Nzambi luse. (Matayo 6:12) Kadi, Yezu wamba kabidi ne: Bua Nzambi kutufuila luse bimpe, anu tuetu petu tufuile bantu bakuabu luse bua bilema bidibu batuenzela. Wakamba ne: ‘Binuajimijila bantu mibi yabu, Tatu wenu udi mu diulu neanujimijile mibi yenu. Kadi binuikala kanuyi nujimijila bantu mibi yabu, Tatu wenu kêna unujimijila mibi yenu.’​—Matayo 6:14, 15.

 Mmunyi mudi mêku mua kupeta disanka?

Nansha muvua Yezu kayi musele mukaji, tudi mua kulongela kudiye malu a bungi adi mua kuvuija disanka mu dîku. Ku mêyi ende ne ku bienzedi biende, udi tshilejilu tshimpe tshitudi mua kulonda. Tukonkononayi malu asatu adi alonda aa:

1. Mulume anange mukajende mudiye mudinange nkayende. Yezu uvua mushile balume tshilejilu. Wakambila bayidi bende ne: ‘Ndi nnuelela mukenji mupia-mupia ne: nusuangane.’ Mushindu kayi? Wakabambila ne: ‘Bu mungakunusua.’ (Yone 13:34) Bible udi welela balume mukenji eu wamba ne: ‘Balume, suayi bakaji benu bu muakasua Kristo ekeleziya kabidi, wakadifila bua bualu buende. Nunku budi balume nabu mbua kusua bakaji babu mene bu mudibu basue mibidi yabu. Muntu udi unanga mukajende udi udinanga; bualu bua kakuena kuanji kuikala muntu udi ne mubidi wende lukuna; kadi udi udisha mubidi wende, udi uulama, bu mudi Kristo ulama ekeleziya.’​—Efeso 5:25, 28, 29.

2. Mulume ne mukaji bikale balamatangane. Kuangatangana ne muntu udi kayi bayebe anyi mukajebe mbualu bubi ku mêsu kua Nzambi, kudi kabidi kunyanga dîku. Yezu wakamba ne: ‘Kanuakubala ne: Bua bualu ebu mulume neashiye tatuende ne baba wende, nealamate kudi mukaji wende; bubidi buabu nebalue mubidi umue? Nunku kabena bantu babidi kabidi, badi mubidi umue. Bua bualu ebu muntu kapanduludi tshidi tshibumbakaja kudi Nzambi. Ndi nnuambila kabidi ne: Umusha mukajende kabuyi bua masandi, pabakaye mukaji mukuabu, yeye udi wenda masandi; biabaka mulume mukaji mumusha nunku, yeye udi wenda masandi.’​—Matayo 19:4-9.

3. Bana badi ne bua kutumikila baledi babu. Nansha muvua Yezu kayi ne bubi, kadi bu muvuaye muana uvua utumikila baledi bende bavua bobu bantu bena mibi. Bible udi wamba pavua Yezu ne bidimu 12 ne: ‘Yeye wakapueka nabu, wakaya ku Nazaleta; wakadi utumikila mêyi abu; baba wende wakalama malu aa onso mu mutshima wende.’​—Luka 2:51; Efeso 6:1-3.

Bua tshinyi kutumikila mikenji eyi?

Pavua Yezu ulongesha bayidi bende, wakabambila ne: ‘Binuamanya malu aa, nenuikale ne disanka binuaenze.’ (Yone 13:17) Bua tuetu kuikala bena Kristo balelela, tudi ne bua kutumikila mibelu ivua Yezu mufile, mibelu ya mushindu wa kuenzela bakuabu malu. Wakamba ne: “Bua bualu ebu bantu bonso nebamanye ne: Nudi bayidi banyi, binuasuangana nunku.”​—Yone 13:35.

Bua kumanya malu a bungi, tangila nshapita wa 14 wa mukanda wa Bible utu ulongesha tshinyi menemene? *

[Mêyi adi kuinshi]

[Tshimfuanyi mu mabeji 16, 17]

Lusumuinu lua Yezu lua muana mujimine ludi lutulongesha mushinga wa kuikala ne muoyo muimpe ne luse.​—Luka 15:11-32

[Tshimfuanyi mu dibeji 17]

Mulume ne mukaji bikale balamatangane