Mmufuane ‘nsongakaji mupika muena Isalele’

MBINGU ibidi kumpala kua Tshivulukilu tshia lufu lua Yezu, muntu yonso wa mu dîku dia Sales, mu tshimenga tshia Praia Grande mu ditunga dia Brésil, wakafunda ende mêna a bantu bavuaye musue kubikila mu Tshivulukilu etshi. Muana mukuabu wa bidimu 6, diende Abigayl, uvua pende ne diende dibeji dimue dia dibikila nadi bantu, ke kumukonkabu bua kuambaye uvuaye ukeba kubikila.

Wakandamuna ne: “Muntu utu unsekesha misangu yonso au.”

Baledi kumukonka ne: “Nganyi au?”

Yeye ne: “Utu musomba mu kakalu ka balema au.”

Matuku anayi pashishe, Abigayl kuleja baledi bende muntu au. Muntu au diende Walter, ne uvua usombela pabuipi menemene ne Nzubu wa Bukalenge. Uvua mushale mutekete bualu mifuba ya nyima ivua mitshibuke mu njiwu ya mashinyi ivuaye mupete kukadi bidimu bipite pa 15, patshivuaye ne mvula 28. Bu muvuaye ne makuta a bungi, uvua ne bantu babidi bavua bamulama. Pavuabu banyishile Abigayl bua kuyikila ne Walter, baledi bende bakamuambila ne: Muanetu au udi ne dibeji dia dibikila didiye ukeba kukupesha.

Kundekelu kua muyiki wabu, Abigaly wakamba ne: “Bantu bonso batu mu Nzubu wetu wa Bukalenge badi ne mabeji aa a bungi be, kadi meme mvua amu ne dimue edi. Nanku, anu wewe nkayebe ke muntu undi mbikila panyi. Wewe kuyi mulue, ntshia kuikala ne wanyi muntu ungikala mubikile to. Kadi wewe mulue, nengikale ne disanka dia bungi, ne Yehowa neikale nadi dipite bungi.”

Dituku dia Tshivulukilu, Bantemu bavua basukula mu Nzubu wa Bukalenge, balongolola muaba bua muyiki wa dilolo adi ne Abigayl pende uvuapu. Mu mapingaja, Walter uvua upita ne shofere wende mumuambula mu mashinyi, padiye umona Abigaly kumuambilaye bua kuimanyika mashinyi. Yeye kupuekesha lumuenu lua mashinyi ne kukonka Abigayl ne: udi wenza tshinyi? Muana kumuandamuna muvuabu bamulongoluele muaba bua wikala mulenga wa dikema buende.

Dilolo adi Abigayl kavua ne disanka to. Muyuki wa Tshivulukilu e kutuadija, muana uvua anu ukenzakane ukeba Walter ne mêsu. Mutantshi eu, yeye ne bantu babidi batu bamulama e kubuela. Ke muana kutua mimuemue ne disanka dia bungi. Padi muyuki ujika, Walter wakaleja mukavuaye mudilongolole bua kuenza luendu bua kuya mu tshimenga tshikuabu, kadi anu bua muana eu wakashintulula mmuenenu wende ne kulua mu Tshivulukilu. Pashishe yeye kuamba ne: “Bivua bikengela nteleja muyuki wa mushindu eu.” Wakalomba bua bikala bamulongesha Bible ne katshia anu pinapu udi ubuela mu bisangilu.

Matuku akalonda, muakunyi wa Walter wa bakaji wakajinga bua kumanya Abigayl uvua tutuende nende mukana dîba dionso. Pakamanyaye Abigayl, wakasanka bikole bua muvuaye muana muimpe. Wakamba ne: “Mpindieu ngamanyi bua tshinyi tutu udi ne disanka dia bungi.”

Walter udi utungunuka ne dilonga diende ne kubuela mu bisangilu. Ukadi wandamuna ne mu bisangilu ne udi wambila pende bakuabu malu adiye ulonga. Bushuwa, muana eu Abigayl udi utuvuluija nsongakaji mupika uvua muambuluishe Namana bua kuyaye kudi Nzambi mulelela Yehowa.​—2 Bakalenge 5:2-14.