1. Mbukole kayi budi mua kutuambuluisha bua kuidikija ngikadilu ya Nzambi?

YEHOWA mmutufuke ne bukole bua kuditeka pa muaba wa bakuabu. Mu mushindu kampanda, tudi mua kumona mu lungenyi nsombelu kampanda utudi katuyi banji kutuilangana nende. (Bala Efeso 5:1, 2.) Mmunyi mutudi mua kuenza mudimu bimpe ne dipa didi Nzambi mutupeshe edi? Ntshinyi tshitudi mua kuenza bua dipa edi kaditukebedi njiwu?

2. Mmunyi mudi Yehowa umvua bua tunyinganyinga tuetu?

² Kakuyi mpata tudi tusanka bua mudi Nzambi mulaye bela manyi ba lulamatu muoyo udi kawuyi ufua mu diulu ne mulaye “mikoko mikuabu” ya Yezu idi ne lulamatu muoyo wa tshiendelele pa buloba. (Yone 10:16; 17:3; 1 Kol. 15:53) Bushuwa, bantu bapeta muoyo udi kawuyi ufua mu diulu anyi bapeta muoyo wa tshiendelele pa buloba kabakuikala ne ntatu itudi nayi lelu to. Yehowa mmumanye tunyinganyinga tutudi natu anu muvuaye mumanye muvua bena Isalele bakenga pavuabu bapika mu Ejipitu. Bulelela, ‘mu makenga abu onso yeye wakumvua dikenga.’ (Yesh. 63:9) Bidimu nkama ya bungi pashishe, bena Yuda bavua ne buôwa bualu baluishi babu bavua babapangisha bua kuibakulula ntempelo, kadi Nzambi wakamba ne:  ‘Udi ubisha tshianza tshiende kudi bena Isalele udi utua mu kamonyi ka dîsu dia Yehowa.’ (Zek. 2:8) Anu bu mudi mamu munange bikole muanende wa mu maboko, ke mudi Yehowa wenzela bantu bende malu ne dinanga. (Yesh. 49:15) Mu mushindu kampanda Yehowa udi uditeka pa muaba wa bakuabu, ne mmutufuke petu ne bukole ebu.​—Mus. 103:13, 14.

3. Ntshinyi tshidi tshileja ne: Yezu uvua uditeka pa muaba wa bakuabu?

³ Yezu uvua umvua tunyinganyinga tua bakuabu, nansha tua aba bavua mu nsombelu ivuaye kayi mutuilangane nayi. Tshilejilu, bantu ba patupu bavua batshina bamfumu ba bitendelelu bavua babashima ne babelela mikenji ya bungi ivua ibanemena bujitu. (Mat. 23:4; Mâko 7:1-5; Yone 7:13) Yezu kavua ubatshina ne kabavua bamushime to, kadi uvua umvua bimpe nsombelu ivuaye kayi mutuilangane nayi. Ke bualu kayi “pakamonaye bisumbu bia bantu, wakabumvuila luse, bualu bavua batata, balekelela bu mikoko idi kayiyi ne mulami.” (Mat. 9:36) Anu bu Tatuende, Yezu uvua munange bantu ne uditeka pa muaba wabu.​—Mus. 103:8.

4. Pavua Yezu umona bantu bakenga, bivua bimusaka bua kuenza tshinyi?

⁴ Pavua Yezu umona bantu bakenga, uvua ubaleja dinanga. Nunku, uvua uleja bimpe menemene dinanga dia Tatuende. Dimue dituku Yezu ne bapostolo bende bamane kuyisha bikole, bakakeba bua kuya muaba wa nkayabu bua kuikisha. Kadi bu muvua Yezu mumvuile tshisumbu tshia bantu bavua bamuindile luse, “wakatuadija kubalongesha malu a bungi.”​—Mâko 6:30, 31, 34.

5, 6. Bua kuidikija dinanga dia Nzambi, mmunyi mutudi ne bua kuenzela bantu bakuabu malu? Fila tshilejilu. (Tangila tshimfuanyi tshia ntuadijilu.)

⁵ Tudi mua kuidikija dinanga dia Yehowa mu mushindu utudi tuenzela bakuabu malu. Tuangate tshilejilu etshi: Fuanyikija ne: nsonga kampanda muena Kristo utudi mua kubikila ne: Alan udi wela meji bua muanetu wa balume kampanda mukulakaje udi mêsu atatshisha bua kubala bimpe. Muanetu eu udi kabidi ne lutatu lua kuenda bua kuyisha ku nzubu ne ku nzubu. Alan udi uvuluka mêyi a Yezu a ne: “Malu anudi basue bua bantu banuenzele, nubenzelawu penu.” (Luka 6:31) Nunku, Alan udi udiebeja ne: ‘Ntshinyi tshindi musue bua bantu bangenzele?’ Diandamuna diende didi ne: ‘Ndi musue bua tunaye nabu ndundu.’ Kadi muanetu wa balume ukadi mukulakaje eu kakukumbana bua kunaya ndundu to. Mêyi a Yezu adi asua kuleja ne: tudi ne bua kudiebeja ne: ‘Ntshinyi tshindi musue bua muntu mukuabu angenzele bu meme mu nsombelu wa buena wende?’

⁶ Alan ki mmukulakaje to, kadi udi ne bukole bua kumona mu lungenyi nsombelu idiye kayi muanji kutuilangana nayi. Udi utangila nsombelu wa muanetu wa balume mukulakaje eu ne umuteleja bua kumanya dijinga diende. Ku kakese ku kakese Alan udi umvua bimpe nsombelu udi nende muntu mukulakaje udi ne lutatu lua kubala Bible anyi lua kuenda bua kuyisha ku nzubu ne ku nzubu. Padi Alan umvua lutatu lua muanetu wa balume mukulakaje eu, udi umona diambuluisha didi dikengela ne udi umuambuluisha. Tudi petu mua kuenza bia muomumue. Bua kuidikija dinanga dia Nzambi, tudi ne bua kuditeka pa muaba wa bana betu.​—1 Kol. 12:26.

7. Mmunyi mutudi mua kufika ku diumvua bimpe ntatu ya bana betu?

⁷ Kabitu anu bipepele misangu yonso bua kumvua tunyinganyinga tudi natu bakuabu to. Bantu ba bungi batu ne ntatu itudi katuyi banji kupeta. Bamue batu ne ntatu ya ku mubidi mikebesha kudi mputa, masama anyi bukulakaje. Bakuabu badi ne ntatu ya mu lungenyi mikebesha kudi dibungama dikole, dibabunda anyi  kudi bipeta bia malu kampanda mabi avuabu benze. Bakuabu badi mu dîku didi ditapuluke mu malu a ntendelelu anyi didi ne muledi umue udikoleshila bana. Muntu yonso utu ne yende ntatu, ne misangu ya bungi katutu banji kutuilangana nayi to. Mmunyi mutudi mua kuidikija dinanga dia Nzambi mu nsombelu eyi? Mbimpe kuteleja ne ntema mudi muntu mukuabu udiumvua bua kuteta mua kumvua nsombelu wende. Nebitusake bua kumuenzela malu bilondeshile majinga ende bua kuidikija dinanga dia Yehowa. Majinga a muntu ne muntu mmashilangane, kadi tudi mua kumuleja mudi Yehowa umvua bua lutatu luende anyi kumupesha diambuluisha dikuabu didi dikengela.​—Bala Lomo 12:15; 1 Petelo 3:8.

8. Ntshinyi tshivua tshiambuluishe Yezu bua kuleja bantu bulenga?

⁸ Muana wa Nzambi wakamba ne: ‘Mutambe Bunene utu wenzela bantu badi kabayi bena dianyisha ne bantu babi bimpe.’ (Luka 6:35) Bushuwa, Yezu uvua widikija bulenga bua Nzambi. Ntshinyi tshivua tshimuambuluishe bua kuenza nunku? Uvua wenzela bantu malu ne bulenga bualu uvua udianjila kumona tshivua mêyi ende ne bienzedi biende mua kuenzela bantu bakuabu. Tshilejilu, mukaji kampanda uvua mumanyike bu muenji wa malu mabi wakalua kudiye udila ne ubolesha makasa ende ne binsonji. Yezu wakajingulula ne: mukaji eu uvua munyingalale, ne uvua mumanye muvuabi mua kusama mukaji eu ku muoyo bu yeye kayi mumuenzele malu ne bulenga. Kadi, wakamuanyisha ne kumubuikidilaye mibi yende. Pavua Mufalese mubenge kuanyisha tshivua tshienzeke, Yezu wakayukila pende nende ne bulenga.​—Luka 7:36-48.

9. Ntshinyi tshidi mua kutuambuluisha bua kuidikija bulenga bua Nzambi? Fila tshilejilu.

⁹ Mmunyi mutudi mua kuidikija bulenga bua Nzambi? Mupostolo Paulo wakamba ne: “Mupika wa Mukalenge kena ne bua kuluangana, kadi udi ne bua kuikala muena bupole kudi bantu bonso.” (2 Tim. 2:24) Muntu muena bupole utu ujingulula mudiye mua kupita ne nsombelu mikole bua kubenga kunyingalaja bakuabu. Ela meji bua mutudi mua kuleja bulenga mu nsombelu idi ilonda eyi: ku mudimu, mfumuetu wa mudimu kena wenza mudimu wende bimpe to. Netuenze tshinyi? Muanetu wa balume kampanda udi ulua mu bisangilu kunyima kua ngondo ya bungi. Netumuambile tshinyi? Mu buambi, muntu udi ukuambila ne: “Tshiena ne dîba dia tuetu kuyukila nebe mpindieu to.” Netumumvuile anyi? Kumbelu, muena dibaka netu udi webeja ne: “Bua tshinyi kuvua mungambile tshiuvua mulongolole bua kuenza mu Disambombo?” Netumuandamune mu mushindu muimpe anyi? Patudi tuditeka pa muaba wa bantu bakuabu ne tuteta kumona tshidi mêyi etu mua kubenzela, tudi mua kujingulula mushindu utudi mua kuakula ne kuenza malu bua kuidikija bulenga bua Yehowa.​—Bala Nsumuinu 15:28.

10, 11. Ntshinyi tshidi mua kutuambuluisha bua kuidikija meji a Nzambi? Fila tshilejilu.

¹⁰ Bukole butudi nabu bua kuditeka mu nsombelu itudi katuyi banji kutuilangana nayi budi mua kutuambuluisha bua kuidikija meji a Nzambi ne kudianjila kumona bipeta bia malu atudi tuenza. Yehowa udi ne meji a bungi ne udi mua kusungula bua kumona bipeta bia malu kampanda too ne mu katoba. Tuetu katuena mua kumona malu mushindu eu to, kadi mbimpe tuele meji bua bipeta bidi mua kumueneka tuetu benze bualu kampanda. Bena Isalele kabavua bele meji bua tshivua mua kubafikila pavuabu babenga kutumikila Nzambi to. Nansha muvua Nzambi mubenzele malu a bungi, Mose uvua mumanye ne: bavua ne bua kuenza malu avua mabi ku mêsu kua Yehowa. Mose wakambulula  kumpala kua bena Isalele bonso mêyi a mu musambu aa: ‘Bobu badi bu tshisamba tshia bantu badi kabayi ne lungenyi, kabena ne dijingulula dia malu munda muabu. Bu bobu bikale ne lungenyi, bakadi kujingulula bualu ebu, bakadi kuela meji a malu alua kudibu.’​—Dut. 31:29, 30; 32:28, 29.

¹¹ Bua kuidikija meji a Nzambi, mbimpe tuele meji anyi tudifuanyikijile mu lungenyi bipeta bidi mua kumueneka tuetu benze malu kampanda. Tshilejilu, tuetu tutantshilangana ne muntu kampanda bua kuselangana, mbimpe tumanye bukole budi nabu majinga a disangila. Katuena ne bua kulongolola anyi kuenza bualu kampanda budi mua kunyanga malanda etu ne Yehowa nansha. Kadi tuenze malu mu diumvuangana ne mêyi a mu Bible aa: ‘Muntu mudimuke udi utangila dikenga diamba kumukuata, udi usokoma; kadi batshimbakanyi badi bapitaku, badi bakengeshibua.’​—Nsu. 22:3.

12. Mmunyi mudi malu atudi tuelela meji mua kutufikisha ku njiwu?

¹² Muntu mudimuke udi utabalela malu adiye welela meji. Meji atudi tuela adi mua kutuambuluisha anyi kutuenzela bibi anu mudi kapia mua kutuambuluisha anyi kutukebela njiwu. Tuetu benze naku mudimu bimpe, kadi mua kutuambuluisha bua kulamba biakudia. Kadi tuetu katuyi badimuke, kapia kadi mua kutuoshila nzubu ne pamuapa kutushipa. Bia muomumue, mbimpe tuetu kuelangana meji bua malu adi Yehowa utulongesha. Kadi tuetu ne tshibidilu tshia kuela meji a malu a masandi ne tudifuanyikijila mu lungenyi tuenza malu mabi, netunange malu a nunku bikole, ne tudi mua kufika ku dienza malu aa. Nunku malanda etu ne Yehowa adi mua kunyanguka.​—Bala Yakobo 1:14, 15.

13. Eva uvua muele meji kayi bua nsombelu wende?

¹³ Tumone muvua mukaji wa kumpala Eva mufike ku dipeta dijinga dia kudia tshimuma tshia “mutshi wa lungenyi lua kujingulula malu mimpe ne malu mabi” tshivua Nzambi mukandike. (Gen. 2:16, 17) Nyoka wakamuambila ne: ‘Kanuena nufua bulelela; bualu bua Nzambi udi mumanye ne: panuadia mamuma au, mêsu enu neabululuke, nenuikale bu Nzambi, nenumanye malu mimpe ne malu mabi.’ Eva wakela meji muvua nsombelu wende mua kulengela bu yeye mudisunguile tshidi tshimpe ne tshidi tshibi. Wakatungunuka ne kuela meji bua bualu ebu ne ‘wakamona ne: mutshi au udi muimpe wa kudia ne muimpe ku mêsu.’ Tshiakenzeka ntshinyi? ‘Wakangata dimuma, wakadia, wakapesha mulume wende kabidi, ne yeye wakadia.’ (Gen. 3:1-6) Bua bubi bua Adama, ‘bubi buakalua pa buloba ne lufu luakalua bua bubi abu.’ (Lomo 5:12) Kabivua bimpe bua muvua Eva mutungunuke ne kuela meji a kuenza tshivua tshibi to.

14. Mmunyi mudi Bible utuambuluisha bua kubenga kuenza malu mabi?

 ¹⁴ Bubi buvua Eva muenze mu budimi bua Edene kabuvua dienda dia masandi to. Kadi Yezu wakadimuija bantu bua kubenga kulama mu lungenyi malu adi mua kufikisha ku tshiendenda. Wakamba ne: “Muntu yonso udi utungunuka ne kutangila mukaji mu mushindu wa kumvua dijinga dia kusangila nende, ukadi muende nende masandi mu muoyo wende.” (Mat. 5:28) Paulo wakamba pende ne: “Kanuikadi nudianjila kulongolola malu bua majinga a mubidi.”​—Lomo 13:14.

15. Mbiuma bia mushindu kayi bitudi mua kudibutshila? Bua tshinyi?

¹⁵ Buteyi bukuabu mbua muntu udimona mubanji kadi kayi udifila bikole mu malu a Nzambi. Misangu ya bungi, biuma bia muntu mubanji bidi bu ‘lumbu lule mu meji ende.’ (Nsu. 18:11) Yezu uvua mulonde bualu kampanda bua kuleja nsombelu mubi wa “muntu udi udilamina biuma, kadi kayi mubanji ku mêsu kua Nzambi.” (Luka 12:16-21) Yehowa udi usanka patudi tuenza malu adi amusankisha. (Nsu. 27:11) Tudi tupeta disanka padiye utuanyisha bualu tudi badibutshile “biuma mu diulu.” (Mat. 6:20) Kakuyi mpata, malanda mimpe atudi badie ne Yehowa adi ne mushinga wa bungi kupita biuma bitudi mua kuikala nabi.

16. Mmushindu kayi utudi mua kupita bimpe ne tunyinganyinga?

¹⁶ Fuanyikija kanyinganyinga kakole katudi mua kupeta tuetu badisunsule bua kudibutshila “biuma pa buloba.” (Mat. 6:19) Yezu wakafila tshilejilu bua kuleja ne: “tunyinganyinga tua malu a mu ndongoluelu wa malu eu, ne mashimi adi nawu biuma” bidi mua kufimpakaja dîyi dia Bukalenge. (Mat. 13:18, 19, 22) Nansha bamue bantu bikale ne dijinga dikole dia kupeta makuta anyi kabayi nadi, batu misangu ya bungi bela meji bua malu mabi adi mua kubafikila. Kadi, tunyinganyinga tubi tudi mua kutuenzela bibi ku mubidi ne mu nyuma. Tueyemenayi Yehowa ne tuvuluke ne: ‘Kanyinganyinga mu muoyo wa muntu kadi kawunemesha bujitu, kadi dîyi dimpe didi diwusanguluja.’ (Nsu. 12:25, NWT) Mêyi mimpe adi akankamija a kudi muntu udi utumvuila adi mua kusankisha muoyo wetu. Kueyemena baledi betu, muena dibaka netu anyi mulunda wetu udi umona malu mudi Nzambi uamona kudi mua kutuambuluisha bua kupeta disulakana.

17. Mmunyi mudi Yehowa utuambuluisha bua kupita bimpe ne tunyinganyinga tuetu?

¹⁷ Kakuena muntu nansha umue udi umvua tunyinganyinga tuetu bimpe kupita Yehowa to. Paulo wakafunda ne: “Kanusamishi mutu bua tshintu nansha tshimue, kadi mu malu onso mu disambila ne mu disengelela pamue ne disakidila, numanyishe Nzambi milombu yenu; ne ditalala dia Nzambi didi dipite dijingulula dionso dia malu nedilame mioyo yenu ne lungenyi luenu ku butuangaji bua Kristo Yezu.” (Filip. 4:6, 7) Tuele meji bua bantu badi batuambuluisha bua kutukuba mu nyuma bu mudi: bena Kristo netu, bakulu, mupika wa lulamatu, banjelu, Yezu ne Yehowa muine.

18. Mmunyi mudi malu atudi tuelela meji mua kutuambuluisha?

¹⁸ Anu mutudi bamone, malu atudi tuelela meji adi mua kutuambuluisha bua kuidikija ngikadilu ya Nzambi bu mudi dinanga. (1 Tim. 1:11; 1 Yone 4:8) Netuikale ne disanka tuetu baleje dinanga dilelela, bele meji bua bipeta bidi bienzedi bietu mua kutukebela ne bepuke tunyinganyinga tudi mua kutujimijila disanka. Nunku, tuenze mudimu bimpe ne bukole budi Yehowa mutufuke nabu bua kudianjila kumona ditekemena didi kumpala kuetu ne kuidikija ngikadilu ya Yehowa eyi: dinanga, bulenga, meji ne disanka.​—Lomo 12:12.