1, 2. a) Ntshinyi tshidi tshileja ne: tshisumbu tshia mu bidimu lukama bia kumpala tshia mu Kolosayi tshivua mu buluishi? b) Mmubelu kayi uvuabu babapeshe bua kubambuluisha bua kushala bakole?

TSHISUMBU tshia bena Kristo ba mu bidimu lukama bia kumpala tshia mu Kolosayi tshivua mu buluishi. Bamue bena mu tshisumbu bavua bakebesha matapuluka bualu bavua basaka bakuabu bua kushala balamate ku mikenji ya Mose. Bakuabu bavua bimanyine pa dilongesha dia nkindi ya bampangano dia kudikengeshisha divua dilomba muntu bua kudipangisha bidiye nabi dijinga. Mupostolo Paulo wakafundila bena mu Kolosayi mukanda muimpe bua kuepukabu malongesha a dishima aa wamba ne: “Nudimuke bua muntu nansha umue kanukuatshi ku bupika ne nkindi ne mashimi a patupu bilondeshile bilele bia bantu, bilondeshile malu a ku ntuadijilu a pa buloba, kabiyi bilondeshile Kristo.”​—Kolos. 2:8.

² Bu bena Kristo bela manyi abu bateke meji abu ku “malu a ku ntuadijilu a pa buloba,” bavua mua kuela tshivua Yehowa mulongolole bua kufila lupandu nyima. (Kolos. 2:20-23) Bua kubambuluisha bua kulama malanda abu a mushinga ne Nzambi, Paulo wakabadimuija wamba ne: “Nushale bateke meji enu ku malu a muulu, kanuateki  ku malu a pa buloba.” (Kolos. 3:2) Eyowa, bana babu ne Kristo bavua ne bua kulama mu lungenyi luabu ditekemena dia kupeta bumpianyi budi kabuyi bunyanguka buvuabu ‘babalamine mu diulu.’​—Kolos. 1:4, 5.

3. a) Nditekemena kayi didi nadi bena Kristo bela manyi mu meji abu? b) Nnkonko kayi ituandamuna mu tshiena-bualu etshi?

³ Bia muomumue lelu, bena Kristo bela manyi mbateke meji abu ku Bukalenge bua Nzambi bua mu diulu ne ku ditekemena diabu dia kuikala “bapianyi pamue ne Kristo.” (Lomo 8:14-17) Netuambe tshinyi bua bantu badi ne ditekemena dia kupeta muoyo pa buloba? Mmunyi mudi mêyi a Paulo abakumbanyina? Mmunyi mudi “mikoko mikuabu” iteka meji ayi “ku malu a muulu.” (Yone 10:16) Mmunyi mutudi tuetu bonso mua kupeta masanka patudi tukonkonona bilejilu bia bantu ba lulamatu ba kale bu mudi: Abalahama ne Mose bavua bateke meji abu ku malu a muulu nansha muvuabu ne yabu ntatu?

4. Mmunyi mudi mikoko mikubua mua kuteka meji abu ku malu a muulu?

⁴ Nansha mudi mikoko mikuabu kayiyi ne ditekemena dia kuya mu diulu, idi payi mua kuteka meji ku malu a muulu. Mushindu kayi? Mpadiyi iteka Yehowa Nzambi ne bipatshila bia Bukalenge pa muaba wa kumpala mu nsombelu wayi. (Luka 10:25-27) Bua kufika ku dienza nunku, tudi ne bua kuidikija tshilejilu tshia Yezu. (1 Pet. 2:21) Anu bu bana betu ba mu bidimu lukama bia kumpala, tudi tutuilangana ne malongesha a dishima, malu a nkindi ya pa buloba ne lungenyi lua kupeta bintu bia bungi bia ku mubidi mu bulongolodi bua Satana. (Bala 2 Kolinto 10:5.) Bu mutudi bidikiji ba Yezu, tudi ne bua kuikala ne budimu bua kudilama ku malu adi anyanga buena Kristo buetu.

5. Nnkonko kayi itudi mua kudiela bua kukonkonona lungenyi luetu bua bidi bitangila kukeba bintu bia ku mubidi bia bungi?

⁵ Lungenyi lua pa buloba lua kukeba bintu bia bungi bia ku mubidi ndunyangaku nsombelu webe anyi? Malu atudi banange atu misangu ya bungi amuenekela mu mushindu utudi tuela meji ne utudi tuenza malu. Yezu wakamba ne: “Muaba udi biuma biebe ke udi muoyo webe kabidi.” (Mat. 6:21) Bua kumanya kudi muoyo wetu utulombola, mbimpe tudikonkonone ku musangu ne ku musangu. Diebeja ne: ‘Ntuku mpitshisha dîba bungi kayi ngela meji bua malu a makuta? Ntuku mpitshisha dîba dia bungi bua kupeta bubanji bua bungi, mudimu muimpe peshi kuikala ne nsombelu wa nsongo anyi? Ntuku ndienzeja bua mêsu anyi ikale mimanyine anu pa malu a mu nyuma anyi?’ (Mat. 6:22) Yezu wakaleja ne: bantu badi baditatshisha tshia kumpala bua “kudibutshila biuma pa buloba” badi baditeka mu njiwu ya mu nyuma minene.​—Mat. 6:19, 20, 24.

6. Ntshinyi tshitudi mua kuenza bua kutshimuna lungenyi lua dienza malu mabi?

⁶ Mubidi wetu wa bubi utu utusaka bua kuenza malu adi atusankisha. (Bala Lomo 7:21-25.) Tuetu katuyi ne nyuma muimpe wa Nzambi, tudi mua kulonda “malu a mu mîdima.” Mu malu aa mudi bienzedi bu mudi: ‘bisankasanka, dikuatshika dia maluvu, diangatangana dia mu mishindu mibi ne tshikadilu tshibi tshia dikamakama.’ (Lomo 13:12, 13) Bua tuetu kutshimuna diluangana dietu ne “malu a pa buloba,” mmumue ne: bintu bidi bisankisha mubidi, tudi ne bua kuteka meji etu ku malu a muulu. Kuenza nunku kudi kulomba didienzeja. Ke bua tshinyi mupostolo Paulo wakamba ne: “Ndi nkuma mubidi wanyi, ngulombola bu mupika.” (1 Kol. 9:27) Kakuyi mpata, tudi ne bua kudienzeja bua kushala mu lubilu luetu bua kupeta muoyo. Tukonkononayi tshivua bantu babidi ba lulamatu ba kale  benze “bua kusankisha Nzambi bimpe.”​—Eb. 11:6.

7, 8. a) Nntatu kayi ivua Abalahama ne Sala bapete? b) Abalahama uvua muteke meji ende ku tshinyi?

⁷ Pavua Yehowa muambile Abalahama bua kuya ne dîku diende mu Kanâna, wakitaba bua kuya. Bu muvua Abalahama ne ditabuja ne utumikila, Yehowa wakadia nende tshipungidi wamba: ‘Nenkuvuije tshisamba tshinene, nenkusankishe.’ (Gen. 12:2) Kadi panyima pa bidimu, Abalahama ne mukajende Sala kabavua banji kupeta muana to. Yehowa uvuaku mupue muoyo tshivuaye mulaye Abalahama anyi? Bualu bukuabu, nsombelu kavua mupepele mu Kanâna to. Abalahama ne dîku diende bavua bashiye nzubu wabu ne balela babu mu Ula, tshimenga tshia bubanji tshia mu Mezopotamiya. Bakenza luendu lua kilometre mipite pa 1 600 bua kufika mu Kanâna muakayabu kusombela mu ntenta, batantamena nzala ne batuilangana ne banyengi ba bintu. (Gen. 12:5, 10; 13:18; 14:10-16) Kadi, kabavua ne dijinga dia kupinganyina nsombelu wabu muimpe mu Ula to.​—Bala Ebelu 11:8-12, 15.

⁸ Pamutu pa Abalahama ‘kuteka meji ku malu a pa buloba,’ ‘wakitabuja Yehowa.’ (Gen. 15:6) Eyowa, wakatuma meji ende ku malu a muulu mu mushindu wa ne: uvua muimanyine pa milayi ya Nzambi. Nunku, bakafuta ditabuja dia Abalahama pavua Nzambi Mutambe Bunene mumueneke kudiye ne mumuambile ne: ‘Tangila muulu, bala mitoto, biwamanya mua kuyibala. Yeye wakamuambila ne: Tunkanunuina tuebe netuikale bungi nunku.’ (Gen. 15:5) Bualu ebu buvua bumupeshe dishindika. Misangu yonso ivua Abalahama utangila mitoto muulu, uvua mua kuikala uvuluka mulayi wa Yehowa wa kuvudija tunkanunuina tuende. Mu tshikondo tshivua Nzambi mujadike, Abalahama wakapeta mupianyi anu muvuabu bamulaye.​—Gen. 21:1, 2.

9. Mmunyi mudi tshilejilu tshia Abalahama tshitukankamija bua kuikala ne bia bungi bia kuenza mu mudimu wa Nzambi?

⁹ Anu bu Abalahama, tuetu petu tudi bindile dikumbana dia milayi ya Nzambi. (2 Pet. 3:13) Tuetu katuyi bateke meji etu ku malu a muulu, dikumbana dia milayi eyi didi mua kumueneka kutudi bu didi dijanguluka ne tudi mua kukepesha malu a mu nyuma atudi tuenza. Tshilejilu, uvuaku mudipangishe amue malu matuku mashale aa bua kuangata mudimu wa bumpanda-njila peshi bua kuenza mudimu mukuabu wa ku dîba ne ku dîba anyi? Biwikala muenza nunku, udi wa kuela kalumbandi. Kadi ntshinyi tshiudi wenza mpindieu? Vuluka ne: Abalahama uvua muteke mu meji ende “tshimenga tshidi ne bishimikidi bilelela.” (Eb. 11:10) “Wakaleja ditabuja kudi Yehowa, bakamubadila bualu ebu bu buakane.”​—Lomo 4:3.

10. Nnsombelu kayi uvua nende Mose patshivuaye nsonga?

¹⁰ Muntu mukuabu uvua muteke meji ende ku malu a muulu uvua Mose. Patshivuaye nsonga, ‘bakamulongesha meji onso a bena Ejipitu.’ Aka kakavua kalasa ka tshianana to. Kabivua anu bualu Ejipitu uvua bukokeshi bua bukole tshikondo atshi to, kadi mbualu Mose uvua kabidi mukolele mu nzubu mua Palô. Kakuyi mpata, kalasa aka kavua kambuluishe Mose bua kulua “ne bukole mu mêyi ende ne mu bienzedi biende.” (Bien. 7:22) Elabi meji bua diakalenge divuaye mua kuikala nadi! Kadi, Mose uvua muteke meji ku bintu bia mushinga mukole, mmumue ne: kuenza disua dia Nzambi.

11, 12. Ndilongesha kayi divua Mose muangate ne mushinga wa bungi? Ntshinyi tshidi tshitujadikila nanku?

¹¹ Patshivua Mose muana, mamuende Yokebede uvua bushuwa mumulongeshe malu adi atangila Nzambi wa bena Ebelu. Mose wakangata dimanya dia Yehowa ne kudimona ne  mushinga wa bungi kupita bubanji bukuabu buonso. Nunku wakalengulula diakalenga ne mpunga bivuaye mua kupeta bua muvuaye mu nzubu wa Palô. (Bala Ebelu 11:24-27.) Bushuwa, dilongesha dia mu nyuma divua Mose mupete ne ditabuja diende kudi Yehowa biakamusaka bua kuteka mêsu ku malu a muulu.

¹² Mose uvua mupete dilongesha ditambe buimpe divuaku mu tshikondo tshiende, kadi kavua muenze nadi mudimu bua kulua muntu munene, muende lumu anyi mubanji wa mu Ejipitu to. Bu yeye muenze nunku, kavua mua kuikala ‘mubenge bua kumubikilabu muana wa muana wa bakaji wa Palô, kusungula bua kukengeshibua ne bantu ba Nzambi pamutu pa kuikala ne disanka dia tshitupa tshîpi dia bubi’ nansha. Bidi bimueneka patoke ne: Mose wakenza mudimu ne dilongesha diende dia mu nyuma bua kutungunuja malu avua Yehowa mulongolole.

13, 14. a) Ntshinyi tshivua tshiambuluishe Mose bua kukumbana bua kuenza mudimu uvua Yehowa mumupeshe? b) Anu bu Mose, ntshinyi tshitudi ne bua kuenza?

¹³ Mose uvua uditatshisha bikole bua Yehowa ne bua bantu bende. Pavua Mose ne bidimu 40, wakela meji ne: ukavua mukumbane bua kupikula bantu ba Nzambi mu bupika mu Ejipitu. (Bien. 7:23-25) Kadi, kumpala kua Yehowa kupesha Mose mudimu eu, uvua dijinga ne tshintu tshikuabu tshia mushinga. Uvua dijinga ne kupeta ngikadilu bu mudi budipuekeshi, lutulu, bulenga ne didikanda. (Nsu. 15:33) Mose uvua dijinga ne didibidija divua mua kumuambuluisha bua kutantamena ntatu ne nsombelu mikole bivua bimuindile kumpala. Bidimu 40 bivuaye muenze bu mulami wa mikoko bivua bimuambuluishe bua kupeta ngikadilu eyi.

¹⁴ Dilongesha divua Mose mupete divuaku dimuambuluishe anyi? Eyowa. Bible udi wamba ne: Mose ‘wakadi ne kalolo be, wakatamba bantu bonso ba pa buloba ne kalolo.’ (Nom. 12:3) Uvua mupete budipuekeshi buvua bumuambuluishe bua kuenzela bantu ba mishindu mishilashilangane ne bavua ne bilumbu bikole malu ne lutulu. (Ekes. 18:26) Bia muomumue, tudi mua kupeta ngikadilu yatuambuluisha bua kupanduka “mu dikenga dinene” ne kubuela mu bulongolodi bupiabupia bua Nzambi budi ne buakane. (Buak. 7:14) Tudiku mua kuibidilangana ne bantu bonso, kusangisha ne aba badi bafiika munda lukasa peshi aba badi malu atonda lukasa anyi? Mbimpe tutumikile mêyi a mupostolo Petelo uvua mudimuije bena Kristo nende wamba ne: “Nunemeke bantu ba mishindu yonso, nunange tshisumbu tshijima tshia bana betu.”​—1 Pet. 2:17.

15, 16. a) Bua tshinyi mbimpe bua kushala bateke meji etu ku malu adi mimpe? b) Bua tshinyi bidi ne mushinga bua bena Kristo kuikala ne bikadilu bilenga?

¹⁵ Tudi mu “bikondo bibi bidi bikole mua kupita nabi.” (2 Tim. 3:1) Nunku bua kushala batale mu nyuma, tudi ne bua kuteka meji etu ku malu a muulu. (1 Tes. 5:6-9) Tumone mutudi mua kuenza nunku mu mishindu isatu.

¹⁶ Bikadilu bietu: Petelo wakamona mushinga udi nawu bikadilu bilenga. Wakamba ne: “Nuikale ne bikadilu bimpe munkatshi mua bisamba bikuabu, bua . . . badimuene nkayabu bienzedi bienu bimpe ne bafike ku ditumbisha Nzambi.” (1 Pet. 2:12) Nansha tuetu ku nzubu, ku mudimu, mu kalasa, mu manaya peshi mu buambi, tuenze muetu muonso bua bikadilu bietu bitumbishishe Yehowa. Mu bulelela, bu mutudi bena mibi, tutu tuenza bonso bilema. (Lomo 3:23) Kadi patudi tutungunuka ne ‘kuluangana mvita mimpe ya ditabuja,’ tudi mua kutshimuna diluangana ne mubidi wetu mupange bupuangane.​—1 Tim. 6:12.

17. Mmunyi mutudi mua kuidikija meji a buena avua nawu Kristo Yezu? (Tangila tshimfuanyi tshia ntuadijilu.)

¹⁷ Meji etu: Kuikala ne bikadilu bimpe kudi kupetangana ne kuikala ne meji mimpe. Mupostolo Paulo wakamba ne: “Nulame  munda muenu meji a buena avua kabidi munda mua Kristo Yezu.” (Filip. 2:5) Yezu uvua ne meji a mushindu kayi? Uvua ne budipuekeshi. Budipuekeshi buakamusaka bua kudifila ne muoyo mujima mu buambi. Kuyisha bantu bakuabu lumu luimpe lua Bukalenge bua Nzambi ke bualu bunene buvuaye nabu mu meji ende. (Mâko 1:38; 13:10) Yezu uvua umona Dîyi dia Nzambi ne bukole bua bungi. (Yone 7:16; 8:28) Wakalonga ne muoyo mujima Mifundu misantu bua kutela mêyi ayi, kuyakuila ne kuyumvuija. Tuetu ne budipuekeshi ne bikale ne tshisumi mu buambi ne mu didilongela dietu dia Bible, netufuanangane bikole ne Kristo mu ngelelu wetu wa meji.

18. Mmu mushindu kayi munene mutudi mua kutua mudimu wa Yehowa nyama ku mikolo?

¹⁸ Diambuluisha dietu: Yehowa mmulongolole ne: “Mu dîna dia Yezu tshinu tshionso tshia badi mu diulu ne badi pa buloba ne badi muinshi mua buloba tshitue panshi.” (Filip. 2:9-11) Nansha mudi Yezu mubandishibue nunku, neenze disua dia Tatuende ne budipuekeshi, ke tshitudi petu ne bua kuenza. (1 Kol. 15:28) Mmushindu kayi? Patudi tutua mudimu udibu batuambile bua kuenza nyama ku mikolo ne muoyo mujima, mmumue ne: ‘kuvuija bantu ba mu bisamba bionso bayidi.’ (Mat. 28:19) Tudi kabidi basue ‘kuenzela bantu bonso malu mimpe,’ bantu netu ne bena Kristo netu.​—Gal. 6:10.

19. Tudi ne bua kudisuika bua kuenza tshinyi?

¹⁹ Tudi ne dianyisha bua mudi Yehowa utuvuluija bua kuteka meji etu ku malu a muulu. Nunku, tudi ne bua “kunyema ne dinanukila lubilu ludi luteka kumpala kuetu.” (Eb. 12:1) Mbimpe yonso wa kutudi enze mudimu ‘ne muoyo wende mujima bu udi uwenzela Yehowa.’​—Kolos. 3:23, 24.