1, 2. Ntshinyi tshikala mua kukolesha dishindika dietu dia ne: Bukalenge nebukumbaje malu adi Nzambi mulongolole bua bantu? Bua tshinyi? (Tangila tshimfuanyi.)

BU MUTUDI Bantemu ba Yehowa, tutu misangu yonso tuamba ne: anu Bukalenge bua Nzambi ke buajikija ntatu yetu yonso, ne tutu basue kukoka ntema ya bantu ku bulelela bua mushinga budi mu Bible ebu. Tudi kabidi tukoleshibua bikole mu ditekemena didi Bukalenge butupesha. Kadi dishindika dietu dia ne: Bukalenge mbualu bulelela buakumbaja malu adibu balongolole didiku dikole anyi? Ntshinyi tshidi tshituambuluisha bua kuikala ne ditabuja dikole kudi Bukalenge?​—Eb. 11:1.

² Bukalenge bua Masiya ndongoluelu mujadika kudi Wa Bukole Buonso nkayende bua kukumbaja malu adiye mulongoluele bifukibua biende. Bukalenge mbujadika pa tshishimikidi tshikole, mmumue ne: bukenji buonso budi nabu Yehowa bua kukokesha. Malu a mushinga a Bukalenge, mbuena kuamba ne: mukalenge wabu, bakokeshi nende, muaba wakokeshilabu, mmajadika mu diumvuangana ne mikenji ku diambuluisha dia bipungidi. Bipungidi ebi mbilongolola kudi Nzambi peshi kudi Muanende Yezu Kristo. Kuelangana meji bua bipungidi ebi nekukoleshe ngumvuilu wetu wa ne:  malu adi Nzambi mulongolole neakumbane ne nekutuambuluishe bua kumona mudiwu mashindame.​—Bala Efeso 2:12.

3. Ntshinyi tshituakonkonona mu tshiena-bualu etshi ne mu tshidi tshilonda?

³ Bible udi wakula bua bipungidi bisambombo bia mushinga bidi bitangila Bukalenge bua Masiya budi mu bianza bia Kristo Yezu ebi: 1) tshipungidi tshia Abalahama, 2) tshipungidi tshia Mikenji, 3) tshipungidi tshia Davidi, 4) tshipungidi tshia muakuidi bu Melekisedeke, 5) tshipungidi tshipiatshipia, ne 6) tshipungidi tshia Bukalenge. Tukonkononayi mudi tshipungidi tshionso tshitangila Bukalenge ne muditshi tshienza bua malu adi Nzambi mulongolole bua buloba ne bantu akumbane.​—Tangila tablo wa ne: “ Muakumbaja Nzambi malu adiye mulongolole.”

4. Anu mudibi bileja mu Genese, mmikenji kayi ivua Yehowa muele bua bidi bitangila bantu?

⁴ Panyima pa Yehowa mumane kulongolola buloba buetu bua bantu kusombapu, wakela mikenji isatu ivua itangila bantu: 1) Nzambi wetu uvua ne bua kufuka bantu mu tshimfuanyi tshiende, 2) bantu bavua ne bua kualabaja Mparadizu pa buloba bujima ne kuuja buloba tente ne bantu bakane, ne 3) bavua bakandike bantu bua kudia tshimuma tshia mutshi wa kujingulula malu mimpe ne malu mabi. (Gen. 1:26, 28; 2:16, 17) Mikenji isatu eyi ivua mikumbane. Panyima pa Nzambi mumane kufuka muntu, kutumikila mikenji mikuabu ibidi eyi kuvua ne mushinga bua disua dia Nzambi kukumbanadi. Kadi, bua tshinyi Nzambi uvua ne bua kupunga bipungidi?

5, 6. a) Mmunyi muvua Satana mutete kunyanga tshivua Nzambi mulongolole bua kuenza? b) Mmunyi muvua Yehowa muandamune ku diyobola dia Satana mu Edene?

⁵ Satana Diabolo wakakebesha buntomboji ne mayele mabi ujinga bua kunyanga tshivua Nzambi mulongolole. Wakenza nunku pa kutuma meji ende ku mukenji uvuaye mua kunyanga bipepele, mmumue ne: mukenji uvua ulomba muntu bua kutumikila Nzambi. Wakateta kusaka Eva mukaji wa kumpala bua kubenga kutumikila mukenji wa kubenga kulenga mutshi wa dijingulula malu mimpe ne malu mabi. (Gen. 3:1-5; Buak. 12:9) Pakenza Satana nunku, wakela bukenji budi nabu Nzambi bua kukokesha ku mutu kua bifukibua bionso mpata. Pashishe, Satana wakamba kabidi mudi batendeledi ba Nzambi bamulamate anu bua kukeba masanka abu.​—Yobo 1:9-11; 2:4, 5.

⁶ Mmunyi muvua Yehowa mua kuandamuna ku diyobola dia Satana dia mu Edene? Kushipa bantomboji kuvua bushuwa mua kujikija buntomboji buabu. Kadi kuenza nunku kuvua kabidi mua kuleja ne: disua dia Nzambi divuaye muambe bua buloba kuwulabu tente ne bana ba Adama ne Eva bena butumike kadivua mua kukumbana to. Pamutu pa kushipa diakamue bantomboji aba, Mufuki wa meji wakafila mulayi munene wa buprofete, mbuena kuamba ne: Mulayi wa mu Edene bua kujadika ne: malu onso avuaye muambe avua ne bua kukumbana.​—Bala Genese 3:15.

7. Ndishindika kayi didi mulayi wa mu Edene utupesha bua bidi bitangila nyoka ne kankanunuina kende?

⁷ Ku diambuluisha dia mulayi wa mu Edene, Yehowa wakalumbuluisha nyoka udi uleja Satana Diabolo ne kankanunuina kende kadi kaleja bantu bonso badi balamata ku luseke luende mu tshilumbu tshia bukenji bua Nzambi bua kukokesha. Nzambi mulelela wakapesha kankanunuina ka mukajende wa mu diulu bukokeshi bua kubutula Satana. Nunku, mulayi wa mu Edene kawuvua anu uleja ne: nebumbushe mukebeshi wa buntomboji bua mu budimi bua Edene ne bipeta bibi bia tshivuaye muenze patupu to, kadi udi kabidi uleja mushindu uvua bualu ebu mua kuenzeka.

8. Ntshinyi tshitudi mua kuamba bua dimanyika dia mukaji ne kankanunuina kende?

⁸ Nnganyi uvua ne bua kuikala kankanunuina  ka mukaji? Bu mudi kankanunuina ne bua kuboza nyoka ku mutu, mmumue ne: ‘kuvuija tshianana’ Satana Diabolo udi tshifukibua tshia mu nyuma, kavua ne bua kuikala muntu wa mu nyuma. (Eb. 2:14) Nunku, mukaji uvua ne bua kulela kankanunuina uvua pende ne bua kuikala wa mu nyuma. Bu muvua kankanuina ka nyoka kavulangane, dimanyika dia kankanunuina ne dia mukaji biakashala bualu busokoka munkatshi mua bidimu bitue ku 4 000 panyima pa Yehowa mumane kufila mulayi wa mu Edene. Mu tshikondo atshi, Yehowa wakapunga bipungidi bia bungi bivua bileja kankanunuina ne bishindikila batendeledi bende ne: kankanunuina ke kavua Nzambi mua kuenza naku mudimu bua kumbusha malu mabi adi Satana mukebele bantu.

9. Tshipungidi tshia Abalahama ntshipungidi kayi? Ndîba kayi diakatuadijatshi mudimu watshi?

⁹ Bidimu binunu bibidi Yehowa mumane kukosela Satana tshibawu, wakambila Abalahama bua kumbuka mu Ula mu Mezopotamiya muvuaye musombele bua kuya mu ditunga dia Kanâna. (Bien. 7:2, 3) Yehowa wakamuambila ne: ‘Umbuka mu musoko webe ne kudi bana benu ne ku nzubu wa tatuebe; ya biebe mu muaba undualua kukuleja. Nenkuvuije tshisamba tshinene, nenkusankishe, nemvuije dîna diebe dinene, ne wewe neuvudijile bakuabu disanka. Nensankishe bantu badi bakuvudijila wewe disanka; nengele muntu mulawu udi ukuela wewe mulawu. Bisamba bionso bia pa buloba nebisanke bua bualu buebe.’ (Gen. 12:1-3) Eu ke musangu wa kumpala udibu bafunde muyuki wa tshipungidi tshia Abalahama, tshivua Yehowa Nzambi mudie nende. Katuena bamanye bimpe dîba divua Yehowa mudie tshipungidi ne Abalahama bua musangu wa kumpala to. Kadi, tshiakatuadija mudimu watshi mu 1943 kumpala kua Yezu, pavua Abalahama uvua ne bidimu 75 mumbuke mu Halana musabuke musulu wa Efelata.

10. a) Mmunyi muvua Abalahama muleje ditabuja dikole mu milayi ya Nzambi? b) Mmalu kayi avua atangila kankanunuina ka mukaji avua Yehowa musokolole ku kakese ku kakese?

 ¹⁰ Yehowa wakambulula njila ya bungi mulayi uvuaye mupeshe Abalahama, ne kusakidila malu makuabu. (Gen. 13:15-17; 17:1-8, 16) Pavua Abalahama muleje ditabuja dikole mu milayi ya Nzambi pa kuitaba bua kulambula muanende mulela umuepele, Yehowa wakakolesha tshipungidi pa kumujadikila muvua mulayi wende ne bua kukumbana. (Bala Genese 22:15-18; Ebelu 11:17, 18.) Pakatuadija tshipungidi tshia Abalahama mudimu watshi, Yehowa wakasokolola ku kakese ku kakese malu a mushinga avua atangila kankanunuina ka mukaji. Kankanunuina kavua ne bua kupatukila mu ndelanganyi ya Abalahama, kavua ne bua kuikala bantu ba bungi, kavua ne bua kuenza mudimu bu bakalenge, kavua ne bua kubutula baluishi ba Nzambi bonso ne kavua ne bua kupetesha bantu ba bungi masanka.

11, 12. Mmunyi mudi Mifundu ileja ne: tshipungidi tshia Abalahama tshidi tshikumbana mu mushindu munene? Bualu ebu budi bumvuija tshinyi buetu tuetu?

¹¹ Milayi ya tshipungidi tshia Abalahama yakakumbana bua musangu wa kumpala pavua ndelanganyi yende mipiane Buloba bulaya. Kadi Bible udi uleja ne: tshipungidi etshi tshivua ne bua kupetesha masanka a bungi. (Gal. 4:22-25) Mupostolo Paulo muenzeja kudi nyuma muimpe wakumvuija ne: tshitupa tshinene tshia kankanunuina ka Abalahama tshidi Yezu Kristo ne tshitupa tshibidi mbena Kristo bela manyi a nyuma 144 000. (Gal. 3:16, 29; Buak. 5:9, 10; 14:1, 4) Mukaji udi ulela kankanunuina ke “Yelushalema wa muulu” anyi tshitupa tshia bulongolodi bua Nzambi tshia mu diulu tshidi tshienza ne bifukibua bia mu nyuma bia lulamatu. (Gal. 4:26, 31) Anu muvua tshipungidi tshia Abalahama tshilaye, kankanunuina ka mukaji kavua ne bua kutuadila bantu masanka.

¹² Tshipungidi tshia Abalahama tshidi tshiakula bua Mukalenge ne bua bantu bakokesha nende mu Bukalenge bua Nzambi, ne tshidi tshienza nshindamenu wa Bukalenge bua mu diulu. (Eb. 6:13-18) Tshipungidi etshi tshivua ne bua kushala musangu bule kayi? Genese 17:7 udi wamba ne: ‘ntshipungidi tshia tshiendelele.’ Tshidi tshitungunuka ne kuikalaku too ne padi Bukalenge bua Masiya bubutula baluishi ba Nzambi ne padi mêku onso a pa buloba abeneshibua. (1 Kol. 15:23-26) Bushuwa, bantu bikala ne muoyo pa buloba nebapete masanka a kashidi. Tshipungidi tshivua Nzambi mudie ne Abalahama tshidi tshileja ne: Yehowa mmudisuike bua kukumbaja dijinga diende dia ne: bantu bakane ‘buuje buloba tente.’​—Gen. 1:28.

13, 14. Tshipungidi tshia Davidi tshidi tshitujadikila tshinyi bua bukokeshi bua Masiya?

¹³ Mulayi wa mu Edene ne tshipungidi tshia Abalahama bidi bitulongesha ne: bumfumu bua Yehowa butu misangu yonso bushindamene pa mikenji yende miakane. Nunku, Bukalenge bua Masiya budiye mujadike mbushindamene pabu pa mikenji miakane ayi. (Mus. 89:14) Bukalenge bua Masiya nebunyangukaku anyi? Nebabupinganaku kudi bukalenge bukuabu anyi? Tshipungidi tshikuabu tshivuabu bajadike tshidi tshitushindikila ne: bualu ebu kabuakuenzeka nansha.

¹⁴ Tukonkonone tshivua Yehowa mulaye Davidi, mukalenge wa mu Isalele wa kale ku diambuluisha dia tshipungidi tshia Davidi. (Bala 2 Samuele 7:12, 16.) Yehowa wakadia tshipungidi etshi ne Davidi pavuaye ukokesha mu Yelushalema, kumulayaye ne: Masiya uvua ne bua kupatukila mu ndelanganyi yende. (Luka 1:30-33) Nunku, Yehowa wakaleja malu makuabu masunguluke bua mulongolongo wa mêku muvua Masiya ne bua kupatukila. Yehowa wakamba ne: muntu wa mu ndelanganyi ya Davidi eu uvua ne bua kuikala “muakanangane” bua kulua Mukalenge wa Bukalenge bua Masiya.  (Yeh. 21:25-27) Ku diambuluisha dia Yezu, bukalenge bua Davidi ‘nebujadikibue tshiendelele.’ Bushuwa, kankanunuina ka Davidi ‘nekashale kashidi, nkuasa waku wa bukalenge neikalaku bu mudi dîba.’ (Mus. 89:34-37) Eyowa, bukokeshi bua Masiya kabuakunyanguka nansha kakese, malu enzabu neashalaku kashidi.

15-17. Bilondeshile tshipungidi tshia muakuidi bu Melekisedeke, mmudimu kayi mukuabu wikala nawu kankanunuina? Bua tshinyi?

¹⁵ Nansha mudi tshipungidi tshia Abalahama ne tshipungidi tshia Davidi bijadika ne: kankanunuina ka mukaji nekenze mudimu wa kukokesha, mudimu eu nkayawu kawakukumbana bua kupetesha bantu ba mu bisamba bionso mabenesha to. Bua bantu kupetabu mabenesha, bavua ne bua kubapikula ku bupika bua bubi ne kubabueja mu dîku dia Yehowa dia buloba bujima. Bua bualu ebu kukumbanabu, kankanunuina kavua kabidi mua kuenza mudimu wa buakuidi. Mufuki wa meji wakenza bualu ebu ku diambuluisha dia bualu bukuabu buvuaye mulongolole, mbuena kuamba ne: tshipungidi tshia muakuidi bu Melekisedeke.

¹⁶ Yehowa wakasokolola ku butuangaji bua mukalenge Davidi ne: uvua ne bua kudia tshipungidi ne Yezu bua bipatshila bibidi: bua ‘ashikame ku tshianza tshia balume’ too ne patshimunaye baluishi bende ne paluaye “muakuidi tshiendelele wa ku mulongo wa Melekisedeke.” (Bala Musambu wa 110:1, 2, 4.) Bua tshinyi “wa ku mulongo wa Melekisedeke”? Bualu, matuku a bungi kumpala kua muntu nansha umue wa mu ndelanganyi ya Abalahama kayi muanji kupiana Buloba bulaya, Melekisedeke, mukalenge wa Salema wakenza mudimu bu “muakuidi wa Nzambi Mutambe Bunene.” (Eb. 7:1-3) Yehowa nkayende ke uvua mumusungule bua kuenza mudimu eu. Yeye nkayende ke udi Mifundu ya tshiena Ebelu ileja ne: uvua muenze mudimu bu mukalenge ne muakuidi. Kabidi, bu muvuaye kayi ne muntu uvuaye mupinganyine peshi uvua mua kumupinganyina, badi mua kumubikila ne: “muakuidi bua kashidi” anyi bua tshiendelele.

¹⁷ Yehowa mmuteke Yezu muakuidi ku diambuluisha dia tshipungidi tshidiye mudie nende, ne neashale “muakuidi kashidi bu Melekisedeke.” (Eb. 5:4-6) Bualu ebu budi buleja patoke ne: Yehowa mmudisuike bua kuenza mudimu ne Bukalenge bua Masiya bua kukumbaja tshivuaye mulongolole ku ntuadijilu bua bantu ne buloba.

18, 19. a) Ntshinyi tshidi bipungidi bitukadi bamone bileja bua Bukalenge? b) Ndukonko kayi ludi lushale?

¹⁸ Anu mutudi bamone mu bipungidi bitudi bakonkonone, tudi tumona mudibi bitangila Bukalenge bua Masiya ne mudi Bukalenge bujadika bikole. Mulayi wa mu Edene udi usaka Yehowa bua kukumbaja tshidiye mulongolole bua buloba ne bantu ku diambuluisha dia kankanunuina ka mukaji. Nnganyi uvua ne bua kuikala kankanunuina aku? Mmudimu kayi uvuaku ne bua kuenza? Tshipungidi tshia Abalahama tshidi tshileja malu aa.

¹⁹ Tshipungidi tshia Davidi ntshileje malu makuabu avua atangila mulongolongo wa mêku a Masiya. Tshipungidi etshi ntshileje kabidi mudi Yezu ne bukenji bua kukokesha buloba bua kashidi. Tshipungidi tshia muakuidi mufuanangane ne Melekisedeke ntshilue nshindamenu bua kankanunuina kuenzaku mudimu wa buakuidi. Kadi, Yezu kakuenza mudimu nkayende bua kufikisha bantu ku bupuangane to. Mbele kabidi bantu bakuabu manyi bua kuenzabu mudimu bu bakalenge ne bakuidi. Bantu aba bavua ne bua kufumina penyi? Netukonkonone bualu ebu mu tshiena-bualu tshialonda.