Davidi wakafunda ne: kavua ‘muanji kumona muntu muakane mushale patupu, anyi bana bende baledibue [bakeba, MMM] biakudia.’ Uvua muambe mêyi aa bua bantu bonso mu tshibungi bilondeshile malu avua mamufikile mu nsombelu wende. Uvua mumanye bimpe muvua Nzambi utabalela bantu. (Mus. 37:25) Kadi mêyi a Davidi kaena aleja ne: mutendeledi wa Nzambi nansha umue kena mua kupangila imue misangu bidiye nabi dijinga to.

Kudi bimue bikondo bivua Davidi mu nsombelu mikole. Umue wa ku nsombelu eyi, mpavuaye unyema Shaula. Davidi uvua ne biakudia bikese ne wakalomba biakudia buende yeye ne bantu bavuaye nabu. (1 Sam. 21:1-6) Nunku mu tshikondo atshi, Davidi uvua ‘ukeba biakudia.’ Kadi mu tshikondo tshikole atshi, uvua mumanye ne: Yehowa kavua mumupue muoyo to. Bulelela budi ne: kakuena muaba nansha umue mu Bible utudi tubala ne: Davidi uvua ne bua kulombangana biakudia bua kushalaye ne muoyo to.

Mu Matayi 6:33, Yezu udi ujadika ne: Nzambi neakumbaje majinga a batendeledi bende ba lulamatu badi bateka malu a Bukalenge pa muaba wa kumpala mu nsombelu wabu. Wakamba ne: “Nunku, tungunukayi tshia kumpala ne kukeba Bukalenge ne buakane buende, nanku nebanusakidile bintu bikuabu bionso ebi [bu mudi biakudia, bia kunua ne bia kuvuala].” Kadi Yezu wakaleja kabidi ne: bua dikengeshibua, ‘bana babu’ bavua mua kupeta nzala. (Mat. 25:35, 37, 40) Bualu ebu buvua bufikile mupostolo Paulo. Uvua pende misangu mikuabu mupete nzala ne nyota.​—2 Kol. 11:27.

Yehowa udi utuambila ne: nebatukengeshe mu mishindu mishilashilangane. Udi mua kuitabuja ne: tupangile bitudi nabi dijinga bua tuambuluishe bua kuandamuna malu adi Diabolo utubanda nawu. (Yobo 2:3-5) Tshilejilu, bamue bena Kristo netu bu mudi aba bavua mu buloko bua bena Nazi bavua mu njiwu bua dikengeshibua. Dipangila biakudia bikumbane dia Bantemu divua bumue buteyi buvua Diabolo muenze nabu mudimu bua kunyanga muoyo wabu mutoke. Bantemu ba lulamatu bakatungunuka ne kutumikila Yehowa; ne yeye pende kakabalekela to. Uvua mubalekele bapeta lutatu elu anu mudiye ulekela bena Kristo bonso bapeta ntatu ya mishindu mishilashilangane. Nansha nanku, katuena mua kuela mpata tuamba ne: Yehowa katu ukuatshisha aba bonso badibu bakengesha bua dîna diende to. (1 Kol. 10:13) Tudi mua kuvuluka mêyi a mu Filipoyi 1:29 aa: “Mbanupeshe diakalenga bua bualu bua Kristo, kabiyi anu bua kumuitabuja, kadi kabidi bua kukenga bua bualu buende.”

Yehowa mmulaye bua kuambuluisha batendeledi bende. Tshilejilu, Yeshaya 54:17 udi wamba ne: ‘Kakuena tshielelu tshia mvita tshidibu batula bua kukuluisha natshi tshidi mua kuikala ne diakalengele.’ Mulayi eu ne mikuabu ya buena eyi idi itujadikila mudi bantu ba Nzambi mu tshibungi bikale mu bukubi. Kadi muena Kristo yonso pa nkayende udi mua kupeta mateta, pamuapa ufika too ne ku difua.