Kakuena bualu budi mua kutufikisha ku diditatshisha bikole bua muaba udi muntu udibu bipate mu tshisumbu mua kusomba mu Nzubu wa Bukalenge to. Bibejibeji bia Tshibumba tshia Nsentedi bikadi bikankamije bikole baledi bena Kristo bua kupesha muanabu utshidi ku nzubu udi muipatshibue mu tshisumbu diambuluisha dia mu nyuma biobi bikumbana bua kuenza nunku. Anu mudibi bileja mu Tshibumba tshia Nsentedi tshia dia 15 ngondo wa 11 wa 1988 (mu mfualansa), dibeji dia 19 ne 20, baledi badi mene mua kulonga Bible ne muanabu utshidi mupuekele udi muipatshibue mu tshisumbu utshidi ku nzubu kuabu. Nunku badi benza bualu ebu bua muana apete dikankamija didi dikengela bua kulongolola bienzedi biende.

Bua bidi bitangila miaba ya kusomba mu Nzubu wa Bukalenge, bidi mua kuikala bimpe bua muana utshidi mupuekele udibu bipate mu tshisumbu kusombaye mupuwe pamue ne baledi bende. Bu mudiku kakuyi mukenji wa ne: muntu udibu bipate mu tshisumbu asombe ku ndekelu mu Nzubu wa Bukalenge, kakuena mukandu bikala muana udibu bipate mu tshisumbu musombe pamue ne baledi bende nansha bobu basombele muaba kayi mu bisangilu to. Bu mudi baledi baditatshisha bua malanda a muanabu ne Nzambi, badi pamuapa mua kujinga mua kujadika bikala bisangilu bimuambuluisha. Kusomba pamue ne muana kudi mua kumuambuluisha pamutu pa kumulekelela.

Kadi netuambe tshinyi bikala muana udibu bipate katshiyi kumbelu kua baledi bende? Mbuena kuamba ne: kena mua kusomba ne baledi bende anyi? Ku kale, Tshibumba tshia Nsentedi tshivua tshileje patoke lungenyi ludi muena Kristo ne bua kuikala nalu bua bidi bitangila dibuelakana ne muena mu dîku dietu udi muipatshibue mu tshisumbu ukadi mumbuke kumbelu. * Kadi, disomba dia muntu talalaa pamue ne balela bende bua mutantshi udi bisangilu bienzeka ndishilangane bikole ne dikeba bua kubuelakana nende mu malu a tshianana tshianana. Bena mu dîku badi balamate Nzambi bobu benzela mulela wabu udi muipatshibue malu mudibi bilombimbue ne badienzeja bua kutumikila mibelu ya mu Bible idi idi itangila dibuelakana nende, kakuena bualu to.​—1 Kol. 5:11, 13; 2 Yone 11.

Disomba dia muntu udi muipatshibue ku luseke lua mulela wende anyi lua muena mu tshisumbu mukuabu kadiena ne bualu yeye utumikila malu malomba. Kuelela muntu mikalu ya muaba wa kusomba kudi mua kujudija bilumbu bia bungi, bilondeshile nsombelu. Bikala bantu bonso, kusangisha ne balela badi balamate Nzambi badienzeja bua kutumikila mêyi manene a mu Bible adi atangila dipatshibua, ne biobi kabiyi bilenduisha bana betu, kakuena bualu bua kuditatshisha bua kukosela bantu badi babuela mu bisangilu miaba ya kusombabu to.