Yehowa mmumanye mua kupandisha bantu bende

‘Mukalenge udi mumanye mua kupandisha bantu bende bimpe mu mateyi abu.’​—2 PET. 2:9.

BUA TSHINYI TUDI NE BUA KUIKALA BASHINDIKE NE:

Yehowa mmumanye tshikondo ne dîba didiye ukumbaja malu adiye mulongolole?

Yehowa neakuate mudimu ne bukole buende bua kusungila bantu bende?

Yehowa mmumanye muikala malu ne bua kuenzeka?

1. “Dikenga dinene” nedilue ne malu kayi?

NZAMBI neabutule bulongolodi bua Satana ebu mu tshimpitshimpi. (1 Tes. 5:2, 3) Bu mudi “dituku dinene dia Yehowa” dienda disemena pabuipi, malu neanyanguke bikole pa buloba. (Sef. 1:14-17) Bantu nebapete ntatu ne makenga a bungi. Netshikale tshikondo tshia dikenga ‘dikala katshia ku tshibangidilu tshia buloba too ne katataka kadiyi dianji kuenzeka.’​—Bala Matayo 24:21, 22.

2, 3. a) Mmalu kayi ikala bantu ba Nzambi mua kutuilangana nawu mu tshikondo tshia “dikenga dinene”? b) Tshidi mua kutukolesha bua malu atshidi alua kumpala ntshinyi?

² Pikala “dikenga dinene” ditangila ku ndekelu, “Gogo wa buloba bua Magoga” neatue bantu ba Nzambi mutu bua kubaluisha. Dîba adi, “tshisumbu tshinene tshia masalayi” netshilue kuluisha bantu ba Nzambi “bu ditutu didi dibuikila buloba.” (Yeh. 38:2, 14-16) Kakuena bulongolodi bua bantu nansha bumue buasungila bantu ba Yehowa. Lupandu luabu neluikale mu bianza bia Nzambi nkayende. Bantu ba Nzambi nebenze tshinyi pamonabu lufu ne mêsu?

³ Biwikala mutendeledi wa Yehowa, udiku witaba ne: Yehowa nealame bantu bende ne muoyo ku dikenga dinene anyi? Mupostolo Petelo wakamba ne: ‘Mukalenge udi mumanye mua kupandisha bantu bende bimpe mu mateyi abu, ne mua kulama bantu babi mu dikenga too ne palua dituku dia kulumbulula.’ (2 Pet. 2:9) Kuelangana meji bua mishindu ivua Yehowa musungile bantu bende kudi mua kutukolesha bua malu adi alua kumpala. Tukonkononayi bilejilu bisatu biatujadikila mudi Yehowa ne bukole bua kusungila bantu bende.

 BAKAPANDUKA KU MVULA WA KABUTU

4. Mmalu kayi avua ne bua kuenzeka kumpala kua Mvula wa kabutu?

⁴ Tshia kumpala tuakulayi bua Mvula wa kabutu wa mu tshikondo tshia Noa. Yehowa wakadikosela dîba bua kukumbaja disua diende. Mudimu munene wa kuibaka buatu uvua ne bua kujika ne bivua bikengela kubuejamu nyama kumpala kua mvula kulokaye. Mukanda wa Genese udi uleja ne: Yehowa kavua muindile bua benze buatu bua ashisha kukosa dîba divua mvula ne bua kuloka, bienze anu bu ne: uvua ne bua kushintulula dîba divua Mvula wa kabutu ne bua kutuadija bu buatu kabuyi bujike kumpala kua dîba. Kadi kumpala mene kua kuambilaye Noa bua kuenza buatu, Nzambi ukavua mukose dîba divua Mvula wa kabutu ne bua kutuadija. Mmunyi mutudi bajadike nanku?

5. Bilondeshile Genese 6:3, Yehowa uvua muambe bualu kayi? Wakabuamba dîba kayi?

⁵ Bible udi wamba ne: Yehowa wakamba dîyi mu diulu. Bilondeshile Genese 6:3, Nzambi wakamba ne: ‘Nyuma wanyi kena utendekena bantu tshiendelele, bualu bua badi anu ba pa buloba, ne matuku abu neikale bidimu lukama ne makumi abidi.’ Nzambi kavua wakula bua matuku a muoyo wa bantu to. Yehowa uvua udikosela dîba bua tshikondo tshivuaye ne bua kumbusha malu mabi pa buloba. * Bu muakatuadija mvula mu 2370 kumpala kua Yezu, tudi tuamba ne: Nzambi uvua muambe mêyi aa mu 2490. Dîba adi, Noa uvua ne bidimu 480. (Gen. 7:6) Bidimu bitue ku 20 pashishe, mmumue ne: mu tshidimu tshia 2470. Bana ba Noa bakabanga kulelangana pabu. (Gen. 5:32) Kuvua kushale bidimu bitue ku lukama kumpala kua Mvula wa kabutu kutuadija, kadi Yehowa kavua anu muanji kuambila Noa tshia kuenza bua kusungila bantu to. Nzambi uvua ne bua kuindila too ne dîba kayi bua kulejaye Noa tshia kuenza?

6. Ndîba kayi divua Yehowa muambile Noa bua kuenza buatu?

⁶ Bidi bimueneka ne: Yehowa uvua muindile bidimu bia bungi kumpala kua kuambila Noa tshivuaye mulongolole bua kuenza. Tudi tuamba nanku bua tshinyi? Bible udi uleja ne: bana ba Noa bakavua bakole ne basele pavua Nzambi muambile Noa bua kuenza buatu. Yehowa wakamuambila ne: ‘Nenjadike tshipungidi tshianyi nebe; wewe neubuele mu buatu ne bana bebe balume ne mukajebe ne bakaji ba bana bebe.’ (Gen. 6:9-18) Nunku bidi bimueneka ne: pavua Nzambi muambile Noa bua kuenza buatu, kuvua kushale anu bidimu 40 anyi 50 bua Mvula wa kabutu kulokaye.

7. a) Mmunyi muvua Noa ne bena mu dîku diende baleje muvuabu ne ditabuja? b) Ndîba kayi divua Nzambi muambile Noa dîba divua Mvula wa kabutu ne bua kubangisha?

⁷ Bu muvua mudimu wa kuenza buatu wenda uya kumpala, Noa ne bena mu dîku diende bavua mua kuikala badiebeja muvua Nzambi mua kukumbaja disua diende ne dîba divua Mvula wa kabutu ne bua kuloka. Kadi nansha muvuabu kabayi bamanye malu onso, kabakalekela mudimu wa dibaka buatu to. Mukanda wa Nzambi udi wamba ne: “Noa wakenza nunku; wakenza mianda yonso yakamuambila Nzambi.” (Gen. 6:22) Matuku muanda mutekete kumpala kua mvula kuloka, Yehowa wakambila Noa dîba divua mvula ne bua kutuadija. Nunku Noa ne dîku diende bavua ne dîba dia bungi dia kubueja nyama mu buatu. Pakakangulabu biibi bia mu diulu ‘mu tshidimu tshia nkama isambombo tshia muoyo wa Noa, mu ngondo muibidi, mu dituku dia dikumi ne muanda mutekete dia ngondo,’ malu onso akavua makumbane.​—Gen. 7:1-5, 11.

8. Mmunyi mudi muyuki wa Mvula wa kabutu utusaka ku dieyemena Yehowa bajadike ne: mmumanye dîba dia kusungila bantu bende?

⁸ Muyuki wa Mvula wa kabutu kawena uleja  anu mudi Yehowa muikale Munemeki wa dîba kadi udi kabidi uleja mudiye Musungidi. Bu mudiye mumanye ne: nshikidilu wa bulongolodi bubi ebu ukadi pabuipi, tudi ne bua kujadika ne: tshintu tshionso tshidi Yehowa mulongolole netshikumbane anu mu ‘dituku ne pa dîba’ dijadika.​—Mat. 24:36; bala Habakuka 2:3.

BAKAPANDISHIBUA KU MBUU MUKUNZE

9, 10. Mmunyi muvua Yehowa mukuate mudimu ne bantu bende bua kukoka basalayi bena Ejipitu mu buteyi?

⁹ Tudi bamone mudi Yehowa muikale ne bukokeshi bua kulongolola malu pa dîba dikumbane bua kukumbaja disua diende. Tshilejilu tshibidi tshituakonkonona tshidi tshileja bualu bukuabu budi butusaka ku dieyemena Yehowa bajadike ne: utu usungila bantu bende. Bualu ebu budi ne: udi ukuata mudimu ne bukole buende budi kabuyi mikalu bua kukumbaja disua diende. Nunku tudi batuishibue mudi Yehowa ne bukole bua kusungila bantu bende ne mutuye imue misangu ukuata nabu mudimu bua kukoka baluishi bende mu buteyi. Ke tshivuaye muenze pavuaye mupatule bena Isalele mu bupika mu Ejipitu.

¹⁰ Bena Isalele bavua bumuke mu Ejipitu bavua mua kuikala batue ku miliyo isatu. Yehowa wakasungula Mose bua kubalombola mu mushindu uvua mufikishe Palô ku diela meji ne: bavua bajimine. (Bala Ekesode 14:1-4.) Palô wakakuluka mu buteyi. Wakangata basalayi bende, kulonda bena Isalele ne kubasangana ku Mbuu mukunze. Bivua bimueneka bu ne: bena Isalele kabavua kabidi ne kua kuya to. (Ekes. 14:5-10) Bushuwa bena Isalele kabavua mu njiwu to. Bua tshinyi? Bualu Yehowa ukavua pa kubasungila.

11, 12. a) Mmunyi muvua Yehowa muambuluishe bena Isalele? b) Mbipeta kayi biakamueneka? Bualu ebu budi butulongesha tshinyi pa bidi bitangila Yehowa?

¹¹ “Ditutu” divua dilombola bena Isalele diakaya panyima pabu bua kupangisha basalayi ba Palô bua kusemena pabuipi nabu ne diakababueja mu mîdima. Ditutu adi divua dikenkeshila bena Isalele butuku mu tshishima. (Bala Ekesode 14:19, 20.) Yehowa wakakosolola Mbuu ku diambuluisha dia tshipepele tshia ku Est, ‘buloba  bûme buakamueneka muaba uvua mâyi.’ Kakuyi mpata bualu ebu buakangata dîba ndambu. Bible udi wamba ne: ‘[Ndekelu wa bionso] bena Isalele bakaya mu bunene bua mâyi pa buloba bûme buakamueneka kuakadi mâyi.’ Patudi tufuanyikija bena Isalele ne basalayi ba Palô bavua ne makalu a mvita, bena Isalele bavua benda bitekete. Kadi kakuvua mushindu wa bena Ejipitu kubakuata bualu Yehowa ke uvua ubaluila mvita. Bible udi wamba ne: “Wakabatshinyisha. Wakakanga nkata ya makalu, kabakamanya mua kuya bimpe.”​—Ekes. 14:21-25.

¹² Pavua bena Isalele bafike diamuamua dia mâyi, Yehowa wakambila Mose ne: ‘Olola tshianza tshiebe pa mâyi, mâyi apingane kabidi pa mutu pa bena Ejipitu ne pa makalu abu ne pa masalayi abu adi enda pa tubalu.’ Pavua basalayi bakeba bua kunyema mâyi, ‘Yehowa wakapita bena Ejipitu bukole mu bunene bua mâyi.’ Kakuvua mushindu wa kunyema to. ‘Nansha umue wabu kakapanduka.’ (Ekes. 14:26-28) Nunku Yehowa wakaleja mudiye ne bukole bua kusungila bantu bende mu bualu kayi buonso.

BAKAPANDUKA KU KABUTU KA YELUSHALEMA

13. Mmibelu kayi ivua Yezu mupeshe bayidi bende? Bayidi bende bavua mua kuikala bele meji kayi?

¹³ Yehowa mmumanye menemene muikala malu ne bua kuenzeka bua kukumbaja disua diende. Bualu ebu budi bumueneka mudibu ne mushinga mu tshilejilu tshisatu tshitudi tukonkonona mpindieu tshia dikuata dia Yelushalema mu bidimu lukama bia kumpala. Ku diambuluisha dia Muanende, Yehowa wakapesha bena Kristo bavua basombele mu Yelushalema ne mu Yudaya mibelu ivua mua kubambuluisha bua kupanduka ku kabutu kavua ne bua kuenzeka mu tshidimu tshia 70. Yezu wakamba ne: ‘Panuamona tshinyangu tshia dibutuka, tshiakambabu kudi muprofete Danyele, tshimane mu muaba wa tshijila, ku tshikondo atshi badi mu Yudaya banyemene ku mikuna.’ (Mat. 24:15, 16) Kadi mmushindu kayi uvua bayidi ba Yezu mua kujingulula dîba divua mulayi eu ukumbana?

14. Mmalu kayi avua menzeke avua menze bua mêyi a Yezu umvuike bimpe?

¹⁴ Bu muakenzeka malu anu muvua Yezu muleje, mêyi ende akumvuika bimpe. Mu 66 basalayi ba bena Lomo balombola kudi Cestius Gallus bakafika mu Yelushalema bua kujikija buntomboji bua bena Yuda. Pakasokoma bantomboji bena Yuda bavuabu babikila ne: ba-Zelote mu ntempelo, basalayi bena Lomo bakabanga kupula bimanu bia ntempelo. Bena Kristo bavua bavuluke tshivua Yezu muambe bakamanya tshivua malu aa umvuija, bakamanya ne: tshiluilu tshia bena Lomo ne bimanyishilu biatshi bia ditendelela bivua ‘tshinyangu tshia dibutuka’ tshivua tshienda tshisemena mu “muaba wa tshijila.” Ke tshikondo tshivua bayidi ba Yezu ne bua ‘kunyemena ku mikuna.’ Kadi mmunyi muvuabu mua kupatuka mu tshimenga atshi tshikavuabu bamane kujingila? Bualu bua dikema buvua ne bua kuenzeka.

15, 16. a) Yezu uvua mufile mubelu kayi? Bua tshinyi bayidi bende bavua ne bua kuwutumikila? b) Bua tuetu kupanduka nebikengele tuenze tshinyi?

 ¹⁵ Bua bualu buvua kabuyi bumanyike, Cestius Gallus ne basalayi bende bakumbuka ku Yelushalema ne kutuadijabu kupingana ku Lomo. Bantomboji bena Yuda bakabalonda bua kubaluisha. Bu muvua bena Lomo ne bantomboji bena Yuda bumuke mu Yelushalema, bena Kristo bakapeta diakamue mushindu wa kunyema. Yezu uvua mubambile patoke bua kushiya bintu biabu ne kumbuka kabayi bajingakana. (Bala Matayo 24:17, 18.) Bivua ne mushinga bua bobu kutumikila mêyi a Yezu ne kuya diakamue. Bua tshinyi? Bualu basalayi bantomboji bena Yuda bakapingana mu matuku makese ne kutuadijabu kuenzeja bena mu Yelushalema ne mu Yudaya bua kubuela mu tshiluilu tshia bantomboji. Malu akanyanguka bikole mu Yelushalema bualu kuvua tusumbu tua bantomboji tuvua tuluangana tufuila bukokeshi. Kakuvua mushindu wa kupatuka mu Yelushalema to. Pakapingana bena Lomo mu 70, kakuvua kabidi mushindu wa kunyema to. (Luka 19:43) Bakakuata muntu yonso uvua mujanguluke. Kadi bena Kristo bavua batumikile mibelu ya Yezu ne banyemene ku mikuna bakasungidibua. Bakadimuena mudi Yehowa mumanye mua kusungila bantu bende. Ndilongesha kayi ditudi mua kupetela ku bualu ebu?

¹⁶ Mu dikenga dinene nebikengele bua bena Kristo kutumikila mibelu ya mu Bible ne idi ifumina kudi bulongolodi. Tshilejilu, tshivua Yezu muambe bua ‘kunyemena ku mikuna’ tshidi tshitutangila petu. Netunyeme mushindu kayi? Katuena banji kumanya menemene to. * Kadi tudi ne bua kujadika ne: Yehowa neatuleje tshia kuenza pakumbana dîba. Bu muikalabi bikengela kutumikila bua kushisha kupanduka, tudi ne bua kudiebeja ne: ‘Mmunyi muntu ntumikila mibelu idi Yehowa utupesha mpindieu? Ntu ntumikila mibelu eyi ne lukasa anyi ntu ngelakana bua kuyitumikila?’​—Yak. 3:17.

TUDI BAKOLESHIBUE BUA MALU ADI ALUA KUMPALA

17. Mêyi a Habakuka adi aleja tshinyi bua buluishi buelabu bantu ba Nzambi?

¹⁷ Tuakulayi mpindieu bua buluishi bua Gogo butuvua batela ku mbangilu. Muprofete Habakuka wakamba bua buluishi ebu ne: ‘Ngakumvua malu aa ne mutshima wanyi wakupampakana, mishiku yanyi yakukanka bua tshiona atshi. Mifuba yanyi yakuvingutuka, ngakuzakala mu muaba ungakimana; ndi ne bua kuindila dituku dia ntatu, mupuwe talalaa; too ne paluadi kudi bantu badi batukengesha.’ (Hab. 3:16) Pavua Habakuka mumvue muikalabu mua kuluisha bantu ba Nzambi, tshifu tshiakatuadija kumusama, mishiku yende yakakanka ne wakatshiokakana. Mushindu uvua Habakuka mudiumvue udi uleja mutuikala mua kumvua buôwa pikala Gogo ne bantu bende batuluisha. Kadi Habakuka uvua mudiakaje bua kuindila mu ditalala dituku dinene dia Yehowa mujadike ne: Yehowa neasungile bantu bende. Tudi petu ne bua kuenza nunku.​—Hab. 3:18, 19.

18. a) Katuena ne bua kutshina buluishi bualua bua tshinyi? b) Tshituamona mu tshiena-bualu tshidi tshilonda ntshinyi?

¹⁸ Kakuyi mpata, bilejilu bisatu bitudi bakonkonone bidi bileja ne: Yehowa mmumanye mua kusungila bantu bende. Malu adiye mulongolole neakumbane bushuwa ne neatshimune baluishi bende. Kadi bua tuetu petu kutshimuna, tudi ne bua kushala balamate Yehowa too ne ku ndekelu. Mmunyi mudi Yehowa utuambuluisha bua kushala ne muoyo mutoke mu matuku etu aa? Ke tshituamona mu tshiena-bualu tshialonda.

[Mêyi adi kuinshi]

[Nkonko ya dilonga]

[Tshimfuanyi mu dibeji 24]

Bena Isalele bavuaku mu njiwu kumpala kua tshiluilu tshia Palô anyi?