Ambuluishayi bantu balume bua kuya kumpala mu mudimu wa Nzambi

‘Katataka too ne tshiendelele wewe neukuate bantu.’​—LUKA 5:10.

1, 2. (a) Ntshinyi tshivua bantu balume benze bua malu avua Yezu uyisha? (b) Netukonkonone tshinyi mu tshiena-bualu etshi?

MUSANGU kampanda pavua Yezu ne bayidi bende bayisha mu Galela, bakabuela mu buatu bua kuya pa nkayabu. Kadi bantu bakabalonda ku makasa. Bantu bavua babalonde abu bavua ‘balume binunu bitanu, ne bakaji ne bana.’ (Mat. 14:21) Musangu mukuabu, bantu bakaya kudi Yezu bua abondope ne bua kuteleja malu avuaye ulongesha. Mu bantu abu muvua ‘balume binunu binayi, ne bakaji ne bana.’ (Mat. 15:38) Bushuwa, bantu balume ba bungi bavua munkatshi mua bantu bavua balua kudi Yezu ne bitaba malongesha ende. Bushuwa, Yezu uvua mutekemene bua bantu bakuabu bamulonde, bualu panyima pa yeye mumane kubambuluisha bua kukuata mishipa mu tshishima, wakambila Simona ne: ‘Katataka too ne tshiendelele wewe neukuate bantu.’ (Luka 5:10) Bayidi bende bavua ne bua kuela tupamba mu mâyi adi mikale bantu ne kutekemena bua mu bantu bavuabu ne bua ‘kukuata’ muikale bantu balume ba bungi.

² Bia muomumue lelu, bantu balume batu bateleja malu a mu Bible atudi tubayisha ne baitaba. (Mat. 5:3) Kadi bantu balume ba bungi batu bapingana tshianyima ne bapangila bua kuya kumpala mu malu a Nzambi. Mmunyi mutudi mua kubambuluisha? Nansha muvua Yezu kayi muyishe mu mushindu wa pa buawu bua kukeba bantu balume, uvua wakuila pa malu avua atangila bantu balume ba mu tshikondo tshiende. Ku diambuluisha dia tshilejilu tshiende, tukonkononayi mutudi mua kuambuluisha bantu balume bua kupita ne malu asatu adi atatshisha bantu lelu aa: (1) mua kupeta bintu bia ku mubidi bidi ne mushinga, (2) kutshina lungenyi ludi nalu bantu bakuabu ne (3) kudimona kuyi mukumbane.

Mua kupeta bintu bia ku mubidi bidi ne mushinga

3, 4. (a) Bantu balume ba bungi batu batamba kuditatshisha bua malu kayi? (b) Bua tshinyi bamue balume batu bateka malu a ku mubidi kumpala kua malu a Nzambi?

³ Mufundi mukuabu wakambila Yezu ne: “Muyishi nenkulonde kuonso kuwaya.” Kadi pakamuambila Yezu ne: ‘Muana wa muntu kena ne pa kuladika mutu wende,’ lungenyi lukuabu luakamuvuila. Wakatuadija kuelakana bua muaba uvuaye mua kupeta biakudia ne muaba wa kulala, bualu Bible kena uleja bikala mufundi eu uvua mulue muyidi wa Kristo to.​—Mat. 8:19, 20.

⁴ Bantu balume batu misangu ya bungi bateka dikeba dia bintu bia ku mubidi kumpala kua malu a Nzambi. Ba bungi ba kudibu batu basue kulonga tulasa tua bungi ne kuenza mudimu wa mfranga ya bungi. Buabu bobu, dijinga dia kupeta makuta ke didibu basue kukumbaja ne lukasa pamutu pa kukeba masanka adi afumina ku dilonga dia Bible ne kuikala mu malanda mimpe ne Nzambi. Malu a mu Bible adi mua kulenga mitshima yabu, kadi ‘meji a malu a pa buloba ne mashimi a biuma’ bidi binyanga dijinga didibu mua kuikala nadi. (Mâko 4:18, 19) Tukonkonone muvua Yezu muambuluishe bayidi bende bua kuakaja malu avuabu bangata ne mushinga.

5, 6. Ntshinyi tshivua tshiambuluishe Andele, Petelo, Yakobo ne Yone bua kuakaja lungenyi luvuabu nalu bua mudimu wa kuyisha ne kukeba bintu bia ku mubidi?

⁵ Andele ne muanabu Simona Petelo bavua benza mudimu wa diloba pamue. Ke mudimu  uvua kabidi Yone ne muanabu Yakobo ne tatuabu Zebedayo benza. Mudimu wabu wa diloba uvua uya kumpala, ke kuangatabu bantu bakuabu ku mudimu eu. (Mâko 1:16-20) Pavua Andele ne Yone bumvue bua musangu wa kumpala lumu lua Yezu kudi Yone Mubatiji, bavua batuishibue ne: bavua bapete Masiya. Andele wakaya kumanyisha muanabu Simona Petelo lumu elu, pamuapa Yone uvua pende mumanyishe muanabu Yakobo. (Yone 1:29, 35-41) Mu ngondo yakalonda, bonso banayi bavua ku luseke lua Yezu pavuaye uyisha mu Galela, mu Yudaya ne mu Samalea. Pashishe bayidi banayi aba bakapingana ku mudimu wabu wa diloba. Bavua banange malu a Nzambi, kadi kabavua bateka mudimu wa kuyisha pa muaba wa kumpala to.

⁶ Matuku makese pashishe, Yezu wakabikila Petelo ne Andele bua kumulonda ne kuluabu balobi anyi ‘bilembi bia bantu.’ Ntshinyi tshiakenzabu? ‘Bakashiya tupamba tuabu panshi lukasa, bakamulonda.’ Ke tshiakenza Yakobo ne Yone. ‘Bakashiya buatu ne tatuabu lukasa, bakamulonda.’ (Mat. 4:18-22) Ntshinyi tshivua tshibambuluishe bua kuditua bikole mu diyisha? Bavuaku bangate dipangadika edi ku mpukapuka anyi? Tòo. Ku ntuadijilu, bantu balume aba bavua bateleje Yezu, bamone bishima bivuaye wenza, muvuaye munange buakane bikole ne muvua bantu banange malu avuaye ulongesha. Malu aa akakolesha ditabuja diabu kudi Yehowa ne akabasaka bua kumueyemena.

7. Mmunyi mutudi mua kuambuluisha balongi ba Bible bua kukolesha dieyemena diabu mu bukokeshi budi nabu Yehowa bua kuambuluisha bantu bende?

⁷ Mmunyi mutudi mua kuidikija Yezu patudi tuambuluisha balongi betu ba Bible bua kueyemena Yehowa? (Nsu. 3:5, 6) Mushindu utudi tulongesha udi mua kuambuluisha balongi bua kukumbaja bualu ebu. Patudi tulongesha, tudi mua kuakula bua malu adi Nzambi mulaye bua kutuenzela bituikala tuteka malu a Bukalenge pa muaba wa kumpala. (Bala Malaki 3:10; Matayo 6:33.) Nansha mutudi mua kukuata mudimu ne mvese ya bungi bua kumvuija mudi Yehowa ukuatshisha bantu bende, katupu muoyo ne: tshilejilu tshietu ke tshidi ne mushinga wa bungi. Kulondela bantu batudi tulongesha Bible malu a mu nsombelu wetu kudi mua kubambuluisha bua kueyemena Yehowa. Tudi kabidi mua kubalondela malu a mu nsombelu adi akolesha atudi babale mu mikanda yetu. *

8. (a) Bua tshinyi mbimpe bua mulongi wa Bible ‘atete, alabule bua umvue ne: Yehowa udi muakane’? (b) Mmunyi mutudi mua kuambuluisha mulongi bua kudimuena buimpe bua Yehowa?

⁸ Pa kumbusha kubala ne kuteleja miyuki ya bantu bavua Yehowa mubeneshe, tudi ne bua kuenza malu makuabu kabidi bua kukolesha ditabuja. Mulongi wa Bible udi ne bua kudimuena buimpe bua Yehowa. Mufundi wa misambu wakamba ne: ‘Teta, ulabule, umvue ne: Yehowa udi muakane; disanka didi kudi muntu udi unyemena kudiye.’ (Mus. 34:8) Mmunyi mutudi mua kuambuluisha mulongi bua kumona ne: Yehowa udi muimpe? Fuanyikija ne: mulongi udi ne lutatu lua kupeta makuta eku muikale udienzeja kabidi bua kulekela tshilele kampanda tshibi bu mudi: kunua makanya, kunaya manaya a mfranga peshi kukuatshika maluvu. (Nsu. 23:20, 21; 2 Kol. 7:1; 1 Tim. 6:10) Tuetu bamulongeshe bua kusambila Nzambi umulomba diambuluisha bua kulekela tshilele tshibi, bidi mua kumuambuluisha bua kumona buimpe bua Yehowa. Tumone kabidi tshidi mua kuenzeka patudi  tubela mulongi bua kuteka malu a Yehowa kumpala padiye udikebela dîba dia kulonga Bible lumingu luonso, kulongolola bisangilu bia bena Kristo ne kubuelamu. Nunku padiye udimuena mudi Yehowa ubenesha mushindu udiye udienzeja, ditabuja diende nedikole.

Kutshina lungenyi ludi nalu bantu bakuabu

9, 10. (a) Bua tshinyi Nikodemo ne Yosefe wa ku Alimataya kabavua basue kuleja patoke ne: bavua bitabuje Yezu? (b) Bua tshinyi bamue bantu balume lelu badi belakana bua kulonda Kristo?

⁹ Bamue bantu balume badi mua kuelakana bua kulonda Kristo ne muoyo mujima bualu badi batshina bakuabu. Nikodemo ne Yosefe wa ku Alimataya bavua batshina bua kuleja patoke muvuabu bitabuje Yezu bualu bavua batshina tshivua bena Yuda bakuabu mua kubamba anyi kubenzela bu bobu mua kumanya bualu ebu. (Yone 3:1, 2; 19:38) Kabavua batshina tshianana to. Bamfumu ba bitendelelu bavua bakine Yezu bikole kufikabu ne ku diamba ne: muntu uvua umuitabuja bavua ne bua kumuipata mu nsunagoga.​—Yone 9:22.

¹⁰ Mu imue miaba lelu, muntu mulume yeye munange bikole Nzambi, Bible anyi kutendelela, badi mua kumutatshisha kudi bena mudimu nende, balunda peshi balela. Mu mikuabu miaba, padi muntu usua kushintulula tshitendelelu, badi mua kumuenzela bibi. Muntu udi mua kutamba kupeta lutatu lua bungi nangananga padiye wenza mudimu wa busalayi, muikale mu malu a tshididi anyi muikale ne muanzu kampanda. Tshilejilu, muntu mulume mukuabu wa mu Allemagne wakamba ne: “Malu a mu Bible anudi nuenu Bantemu nuyisha, mmalelela. Kadi meme mulue Ntemu lelu, malaba bantu bonso nebamanye bualu ebu. Bena mudimu betu, bena mutumba, balunda ne bamanyangana nabu nebele meji kayi? Tshiakukumbana to.”

11. Mmunyi muvua Yezu muambuluishe bayidi bende bua kupita ne ditshina dia bantu?

¹¹ Bayidi ba Yezu bavua ne dikima. Kadi misangu mikuabu bavua bumvua buôwa bua malu avua bantu bakuabu mua kubamba. (Mâko 14:50, 66-72) Mmunyi muvua Yezu mubambuluishe bua kuya kumpala nansha muvua bantu bakuabu bajinga kubenzeja malu ku bukole? Yezu wakadianjila kulongolola bayidi bende bua buluishi buvuabu mua kupeta pashishe. Wakamba ne: ‘Pikala bantu nenu lukuna, panumushabu munkatshi muabu, panupendabu, papetulabu dîna dienu ne: ndibi, bua bualu bua Muana wa muntu, nenuikale ne disanka.’ (Luka 6:22) Yezu wakadimuija bayidi bende ne: bantu bavua ne bua kubakina. Bualu buonso buvuabu babenzela buvua bua “bualu bua Muana wa muntu.” Yezu wakabajadikila kabidi ne: Nzambi uvua ne bua kubakuatshisha buobu bamueyemene bua abakoleshe. (Luka 12:4-12) Yezu wakalomba kabidi bantu bapiabapia bua kudisangisha ne kudia bulunda ne bayidi bende.​—Mâko 10:29, 30.

12. Mmu mishindu kayi mutudi mua kuambuluisha bapiabapia bua kubenga kutshina bantu?

¹² Tuetu petu tudi ne bua kuambuluisha balongi ba Bible bua kubenga kutshina bantu. Tudi mua kuenza nunku patudi tubambuluisha bua kumanya tshia kuenza padi bantu babaluisha. (Yone 15:19) Tshilejilu, tudi mua kuambuluisha mulongi wa Bible bua kulongolola mandamuna mapepele ne a meji mangatshila mu Bible bua  kuandamuna nkonko idi bena mudimu babu anyi bantu bakuabu mua kumuela. Nansha mudiye mulunda wetu, tudi kabidi mua kumuleja kudi bena mu tshisumbu bakuabu nangananga badi mua kuikala ne nsombelu wa buena wende. Tudi nangananga ne bua kumulongesha bua kusambila pa tshibidilu ne muoyo mujima. Ebi bidi mua kumuambuluisha bua kusemena pabuipi ne Nzambi ne kumuvuija tshisokomenu ne dibue diende.​—Bala Musambu wa 94:21-23; Yakobo 4:8.

Kudimona kuyi mukumbane

13. Mmunyi mudi lungenyi lua didimona bashadile lupingaja bamue panyima mu malu a Nzambi?

¹³ Bamue bantu balume batu batshina bua kuenza midimu kampanda mu tshisumbu bualu ki mbamanye kubala ne kuakula bimpe anyi bualu badi ne bundu. Bakuabu kabatu bakumbana kuleja lungenyi luabu anyi mudibu badiumvua munkatshi mua bantu to. Badi mua kumona dilonga, diandamuna mu bisangilu ne diyisha bakuabu bibatshiokesha. Muanetu wa balume mukuabu udi wamba ne: “Pantshivua nsonga, mvua ne tshibidilu tshia kuya ndingidija bu udi ukokola ku tshîbi tshia muntu ne pashishe ngumbukaku lubilu ngela meji ne: muntu kavua mumvue anyi mummone to. . . . Biakantonda bua kuyisha ku nzubu ne ku nzubu.”

14. Bua tshinyi bayidi ba Yezu kabavua buondope muana uvua ne demon?

¹⁴ Elabi meji muvua bayidi ba Yezu mua kuikala badiumvue pavuabu bapangile mua kumbusha demon munda mua muana wa balume kampanda. Tatuende wa muana wakalua kudi Yezu ne kumuambila ne: ‘Muananyi udi ne tshiseki, udi ukenga bikole; misangu ya bungi yeye udi upona mu kapia ne mu mâyi. Ngakalua nende kudi bayidi bebe, bobu kabakamanya mua kujikija disama diende.’ Muana wakumvua bimpe pavua Yezu muipate demon uvua munda muende. Pashishe bayidi bakalua kudi Yezu, kumuebejabu ne: ‘Mmunyi tuetu katuakamanya mua kumumusha?’ Yezu wakabambila ne: ‘Bualu bua ditabuja dienu diakadi dikese. Bulelela, ndi nnuambila ne: binuikala ne ditabuja bunene bua lutete lua mutada, nenuambile mukuna eu ne: umuka aku, nda kuaka, neumuke; kakuena bualu budi mua kunukolela.’ (Mat. 17:14-20) Bua kutantamena ntatu idi bu mikuna, tudi ne bua kuikala ne ditabuja kudi Yehowa. Muntu yeye mutekete mu ditabuja ne mutuadije kudieyemena, ntshinyi tshidi mua kuenzeka? Yeye mupangile bualu, udi mua kumona ne: ki mmukumbane bua kuenzela Yehowa mudimu to.

15, 16. Mmunyi mutudi mua kuambuluisha mulongi wa Bible bua kubengaye kudimona mushadile kudi bakuabu?

¹⁵ Mushindu muimpe utudi mua kuambuluisha muntu bua kumusha lungenyi lua didimona mushadile kudi bakuabu mpatudi tumukankamija bua kueyemena Yehowa pamutu pa kudieyemena. Petelo wakafunda ne: ‘Nudipuekeshe kuinshi kua tshianza tshikole tshia Nzambi, bua yeye anubandishe mu tshikondo tshiasunguleye; nuteke ntatu yenu yonso kudiye.’ (1 Pet. 5:6, 7) Ebi bidi bilomba kuambuluisha mulongi wa Bible bua kunanga Yehowa ne kuitaba bua amuludike. Muntu udi munange Yehowa udi wangata malu ende ne mushinga. Mmunange Dîyi dia Nzambi ne udi udienzeja bua kuikala ne ngikadilu ya ‘dimuma dia nyuma’ mu nsombelu wende. (Gal. 5:22, 23) Mmusue kusambila bikole. (Filip. 4:6, 7) Udi kabidi utekemena bua Nzambi amupeshe dikima ne bukole bikumbana bua kupita ne nsombelu mishilangane ne kukumbaja bimpe mudimu wonso udibu bamupesha.​—Bala 2 Timote 1:7, 8.

¹⁶ Bamue balongi badi mua kuikala bajinga bua babambuluishe bua kubala, kuyukila ne bantu ne bua kuakula bimpe. Bakuabu badi mua kudimona kabayi bakumbane bua kuenzela  Nzambi mudimu bua malu mabi avuabu benze kumpala kua kumumanyabu. Mu nsombelu ya nunku, badi mua kuikala bajinga bua tubambuluishe ne dinanga ne lutulu. Yezu wakamba ne: ‘Badi ne bukole kabena ne muondapi bualu, anu badi ne mabedi.’​—Mat. 9:12.

‘Ukuate’ bantu balume ba bungi

17, 18. (a) Mmunyi mutudi mua kufika ku diyisha bantu balume ba bungi? (b) Netulonge tshinyi mu tshiena-bualu tshidi tshilonda?

¹⁷ Tudi tujinga bua bantu balume ba bungi bitabe lumu luimpe lua disanka ludi lusanganyibua anu mu Bible. (2 Tim. 3:16, 17) Nunku mmunyi mutudi mua kufika ku diyisha bantu balume ba bungi mu teritware wetu? Tudi mua kuenza nunku patudi tuyisha bikole dilolo, ku ndekelu kua lumingu mu mapingaja peshi mu matuku a dikisha padi bantu balume ba bungi kumbelu. Tudi mua kuyukila ne batatu ba mbanza bikalaku mushindu. Tudi kabidi mua kuyisha padi mpunga umueneka bena mudimu netu bantu balume ne balume badi kabayi Bantemu badi mu tshisumbu tshietu.

¹⁸ Patudi tuyisha muntu yonso utudi tupetangana nende, tudi ne bua kuikala bashindike ne: bantu badi ne mitshima ya dianyisha nebitabe lumu luimpe. Nunku tuambuluishayi ne lutulu luonso bantu badi bitaba bulelela. Kadi mmunyi mutudi mua kuambuluisha bantu balume bakadi mu tshisumbu bua kukumbaja ngikadilu milomba bua kuambula majitu mu bulongolodi bua Nzambi? Tshiena-bualu tshidi tshilonda netshiandamune lukonko elu.

[Mêyi adi kuinshi]

Newandamune munyi?

• Mmunyi mutudi mua kuambuluisha bantu balume bua kuteka malu a Yehowa pa muaba wa kumpala?

• Mmunyi mutudi mua kuambuluisha bantu bapiabapia bua kumanya tshia kuenza padibu babasaka ku bukole bua kuenza bualu bubi?

• Ntshinyi tshidi mua kuambuluisha bamue bantu bua kubenga kudimona bashadile kudi bakuabu?

[Nkonko ya dilonga]

[Tshimfuanyi mu dibeji 25]

Utuku ukeba mishindu ya kufika ku diyisha bantu balume lumu luimpe anyi?

[Tshimfuanyi mu dibeji 26]

Mmunyi muudi mua kulongolola mulongi wa Bible bua kutantamena ntatu?