Utuku umvua disanka bua kudilongela Dîyi dia Nzambi anyi?

LORRAINE udi wamba ne: “Pangakatuadija kubala Bible pa tshibidilu, bivua bintonda pamutu pa kunsankishabi. Tshivua ngumvua bimvua mbala to, ke bualu kayi tshivua ntumaku lungenyi luanyi to.”

Bantu bakuabu badi bamba pabu ne: pavuabu batuadije kubala Bible kabivua bibasankisha to. Kadi bakasuminyina bualu bavua bamanye ne: kubala Mifundu minsantu ke bualu bua nsongo buvuabu ne bua kuenza. Marc udi wamba ne: “Paudi ubala Bible anyi udilongela, bitu bipepele bua kutuma meji ku malu a tshianana. Bivua bikengela kuikala kusambila bikole ne kudienzeja bua meme kuikala ne tshibidilu tshia kubala Bible ku dituku ne ku dituku.”

Ntshinyi tshiudi ne bua kuenza bua kuikala ne dianyisha bua Dîyi dia Nzambi? Ntshinyi tshiudi mua kuenza bua dibala dia Bible kukusankishadi? Konkonona malu adi alonda aa:

Malu a kudifundila ne mishindu ya kuakumbaja

Ikala usambila paudi ujinga kubala Bible ne utuishila lungenyi pa biudi ubala. Lomba Yehowa diambuluisha bua wikale ulonga Dîyi diende ne tshisumi. Musengelele bua akuambuluishe bua ujingulule meji ende bimpe. (Mus. 119:34) Wewe kuyi wenza nunku, dilonga dia Bible nedikale diumakane ne kuakuikala ne disanka dia kutungunuka nadi to. Lynn udi wamba ne: “Ntu imue misangu mbala Bible lubilu lubilu ngenda mpita malu adi ne mushinga. Pa tshibidilu, tshitu nkuata malu manene andi mbala to. Nunku ntu ndomba Yehowa bua ampeshe lutulu, bitu bingambuluisha bua kulama meji kaba kamue.”

Ikala wangata malu audi ulonga ne mushinga. Vuluka ne: kumvua ne kutumikila malu audi ulonga mu Bible nekukupeteshe muoyo wa tshiendelele. Nanku, dienzeja bua kupeta malu a mushinga ne uatumikile. Chris udi wamba ne: “Pandi ndilongela, ntu nkeba malu adi mua kungambuluisha bua kujingulula ngenyi mibi indi mua kuikala nayi. Bitu bingenza disanka bua mudi malu adi mu Bible ne mu mikanda yetu angambuluisha nansha mudi badi baafunde kabayi bammanye.”

Difundila malu audi mua kukumbaja. Dienzeja bua kulonga bualu kampanda bupiabupia bua bantu ba mu Bible. Udi mua kupeta malu mimpe avuabu benze mu mukanda wa Étude perspicace des Écritures anyi mu Index des publications Watch Tower. Paudi wenda umanya bantu ba mu Bible, neubamone bu bantu balelela ne malu awalongela ku bilejilu biabu neakuambuluishe bikole.

Keba mishindu mipiamipia ya kuelangana meji pa Dîyi dia Nzambi. (Bien. 17:2, 3) Ke tshivua Sophia wenza pavuaye udilongela Bible. Udi wamba ne: “Ndi ne dijinga dia kulonga mishindu mipiamipia ya kuelesha bantu meji dîba dindi mu buambi ne mêba makuabu, bua mmanye mua kumvuija bulelela bua mu Bible bimpe. Tshibumba tshia Nsentedi tshidi ne bilejilu bimpe bia mushindu wa kuelesha bantu meji pa malu a mu Bible.”​—2 Tim. 2:15.

Ikala udifuanyikijila miyuki ya mu Bible mu mutu. Ebelu 4:12 udi wamba ne: ‘Dîyi dia Nzambi didi ne muoyo.’ Paudi ubala Dîyi dia Nzambi, ikala udifuanyikijila malu muvua bantu ba mu Bible baamona bua ashale mu mutu webe. Tetabi kuteleja malu avuabu bateleja ne kudiumvua muvuabu badiumvua. Teta  kufuanyikija malu a mu nsombelu wabu ne malu masunguluke a mu nsombelu webe. Longela ku mushindu uvuabu bapita ne malu abu. Kuenza nunku nekukuambuluishe bua kumvua bimpe miyuki ya mu Bible ne kuyilama mu mutu.

Dikebela dîba dia kukeba diumvuija dia mvese mikole bua uyumvue bimpe. Ikala uditekela dîba dia bungi bua dilonga dionso. Udi mua kupeta amue malu a mushinga adi alomba kuenza makebulula. Keba bua kumvua miaku iudi kuyi mumanye, wewe muikale ne Bible udi ne note kuinshi kua mabeji ne mvese milayidilamu enza nende mudimu. Paudi wenda umvua biudi ubala ne ubitumikila, newikale umvua disanka bua kubala Dîyi dia Nzambi. Dîba adi newambe anu bu mufundi wa Misambu wakamba ne: ‘Ngakuangata mikenji yebe bu bumpianyi tshiendelele, bualu bua idi disanka dia mu mutshima wanyi.’​—Mus. 119:111.

Kuikadi ubala lubilu lubilu to. Ikala utshintshikila dîba diudi mulongolole bua kudilongela. Ikala ne nkatshinkatshi bua dîba dia kudilongela ne dia kulongolola bisangilu. Mamu mukuabu diende Raquel udi wamba ne: “Misangu ya bungi tshitu nkokesha bua kulama meji kaba kamue pandi ndilongela to. Ke meme kumona ne: kudilongela nansha bua minite mikese tshianana kudi ne mushinga. Biakangambuluisha bua kupeta malu mimpe mu didilongela dianyi.” Chris udi wamba pende ne: “Pandi mbala lubilu lubilu, kondo kanyi ka muoyo kadi kalubakana bualu tshiena ntamba kukuata bindi mbala to. Malu andi mbala kaatu alenga mutshima wanyi to.” Ke bualu kayi mbimpe kudikebela dîba dia bungi bua kulonga.

Kolesha dijinga diebe dia kulonga Dîyi dia Nzambi. Mupostolo Petelo wakamba ne: ‘Bu bana balela katataka, nujinge mabele a meji adi kaayi ne kudinga, bua nuenu nudiundeku too ne ku lupandu.’ (1 Pet. 2:2) Kabatu mua kujula bana dijinga dia kunua dibele to, bualu batu baledibua ne dijinga edi. Kadi Bible udi utuambila ne: tudi ne bua kukeba dijinga dia kubala Dîyi dia Nzambi. Wewe ubala anu dibeji dimue dia mu Bible dituku dionso, neupete dijinga edi. Pamuapa ku ntuadijilu bidi mua kukukolela, kadi pashishe udi mua kulua kunanga dibala dia Bible.

Elangana meji pa mvese ya mu Bible. Udi kabidi mua kupeta disanka divule paudi welangana meji pa malu audi ubala. Ebi nebikuambuluishe bua kumona mudi malu audi ulonga umvuangana. Pashishe neupete meji a  mushinga mukole adi mu Bible.​—Mus. 19:14; Nsu. 3:3.

Kuenza mudimu bimpe ne dîba dietu

Bidi bikengela kudienzeja bua kuikala ne bibidilu bimpe bia kudilongela, pashishe neupete masanka bungi kabuyi kubala. Neutuadije kumvua bimpe malu audi ubala mu Bible. (Eb. 5:12-14) Neupete disanka ne ditalala bua meji ne dijingulula dia malu biwapeta ku diambuluisha dia Dîyi dia Nzambi. Meji adi mu Dîyi dia Nzambi adi “mutshi wa muoyo” bua badi baapeta ne baatumikila.​—Nsu. 3:13-18.

Kulonga Dîyi dia Nzambi mu buondoke nekukupeteshe mutshima wa bujinguludi bua mianda. (Nsu. 15:14) Nebikuambuluishe bua kuikala ufila mibelu mimpe miangatshila mu Bible. Wewe wangata mapangadika adi umvuangana ne biudi ubala mu Bible ne mu mikanda ya ‘mupika wa lulamatu ne wa budimu,’ neumvue mudi Dîyi dia Yehowa dikuambuluisha bua wikale ne ditalala. (Mat. 24:45, NW) Dîba adi Dîyi dia Yehowa nedikuambuluishe mu mushindu uudi wela meji, wenza malu ne mu ngakuilu webe. Malu onso audi wenza bua kulama malanda ebe ne Nzambi neaye anu kumpala.​—Mus. 1:2, 3.

Wewe munange Nzambi ne muoyo mujima, nebikusake bua kuambila bakuabu malu audi muitabuje. Bualu ebu nebukupeteshe kabidi masanka a bungi. Muanetu wa bakaji Sophia udi udienzeja bua kuvuluka mvese ya bungi ne kuenza nayi mudimu bua kukoka ntema ya bantu badiye uyisha ne bua kulengeja mudimu wende wa buambi bua umupeteshe disanka. Udi wamba ne: “Ntu nsanka bikole pandi mmona bantu bitaba bulelela budi mu Bible.”

Bualu butambe buimpe butudi tupeta patudi tulonga Dîyi dia Nzambi ne disanka, nkuikala mu malanda mimpe ne Yehowa. Kulonga Bible kudi kutuambuluisha bua kumanya mikenji yende, kuyumvua ne kuanyisha ngikadilu yende bu mudi: wa dinanga, wa kupeshangana bintu ne wa buakane. Kakuena bualu bukuabu butudi mua kuenza budi ne mushinga anyi budi mua kutupetesha masanka a nunku to. Difila bikole mu dilonga Dîyi dia Nzambi. Wewe wenza nunku kuena ujimija dîba diebe to.​—Mus. 19:7-11.

[Kazubu/​Bimfuanyi mu dibeji 5]

MALU A KUDIFUNDILA NE MISHINDU YA KUAKUMBAJA PATUDI TUBALA DÎYI DIA NZAMBI

▪ Ikala usambila paudi ujinga kubala Bible ne utuishila lungenyi pa biudi ubala.

▪ Ikala wangata malu audi ulonga ne mushinga.

▪ Difundila malu audi mua kukumbaja.

▪ Keba mishindu mipiamipia ya kuelangana meji pa Dîyi dia Nzambi.

▪ Ikala udifuanyikijila miyuki ya mu Bible mu mutu.

▪ Dikebela dîba dia kukeba diumvuija dia mvese mikole bua uyumvue bimpe.

▪ Kuikadi ubala lubilu lubilu to.

▪ Kolesha dijinga diebe dia kulonga Dîyi dia Nzambi.

▪ Elangana meji pa mvese ya mu Bible.

[Tshimfuanyi mu dibeji 4]

Paudi ubala muyuki kampanda wa mu Bible, ikala udifuanyikija bu udi pebe mu nsombelu wa muomumue au