Bukokeshi bua Satana mbupangile
Bukokeshi bua Satana mbupangile
‘Muntu mubi kena upeta diakalengele.’—MUAM. 8:13.
1. Bua tshinyi lumu lua dilumbuluisha dia bantu babi ndumu luimpe?
NEBALUMBULUISHE bantu babi nansha ku tototo nansha ku ndandanda. Nebafute bua malu abu mabi avuabu benze. (Nsu. 5:22; Muam. 8:12, 13) Elu ndumu luimpe, nangananga bua bantu badi banange buakane ne badibu bakengesha kakuyi bualu kudi bantu babi. Satana Diabolo ke muntu mubi wa kumpala walumbuluishabu, bualu yeye ke tatuende wa bubi.—Yone 8:44.
2. Bua tshinyi bivua bikengela matuku a bungi bua kukosa tshilumbu tshivua tshijuke mu Edene?
2 Mu budimi bua Edene, Satana wakadimona ne mushinga wa bungi ke kusakaye bantu bua kubenga bukokeshi bua Yehowa. Ke bualu kayi baledi betu ba kumpala bakatua ku tshiende, kubengabu bua Yehowa kuikalaye mfumuabu ne kuluabu bantu babi ku mêsu kuende. (Lomo 5:12-14) Yehowa uvua mumanye tshivua buntomboji buabu ne dipanga kanemu ne bua kubakebela. Kadi banjelu ne bantu bonso bavua ne bua kudimuena pabu malu avua ditomboka dikebeshe. Nunku, bivua bikengela matuku a bungi bua kukosa tshilumbu etshi ne kuleja patoke muvua bantomboji abu benze bubi bunene.
3. Mmunyi mutudi tumona makalenge a bantu?
3 Bu muvua bantu babenge bukokeshi bua Yehowa, bavua ne bua kudienzela yabu mishindu ya dikokesha. Pavua mupostolo Paulo mufundile bena Kristo nende ba mu Lomo wakabikila makalenge a bantu aa ne: “Bakokeshi badi ku mutu.” Mu tshikondo tshiende, bakokeshi bavua ku mutu bavua bena Lomo bavuabu balombola kudi mukalenge Néron uvua mukokeshe kutuadijila mu 54-68. Paulo wakamba ne: bakokeshi badi ku mutu aba ‘bakajadikibua kudi Nzambi.’ (Bala Lomo 13:1, 2.) Paulo uvuaku usua kuamba ne: makalenge a bantu adi akokesha pa muaba wa Nzambi anyi? Nansha kakese. Kadi uvua musue kuamba ne: patshidi Yehowa mulekele bantu bakokesha, bena Kristo badi ne bua kubanemeka ne kuitaba bukokeshi buabu.
Njila udi ufikisha ku diakabi
4. Umvuija bua tshinyi bantu kabena mua kukokesha bimpe.
4 Makalenge a bantu adi ku bukokeshi bua Satana kaena mua kukokesha bimpe to. Bua tshinyi? Bualu kaena alonda meji a Nzambi to. Anu Yehowa nkayende ke udi ne meji mapuangane. Nunku anu yeye ke udi mua kuleja bantu mushindu muimpe wa kukokesha. (Yel. 8:9; Lomo 16:27) Yehowa kena bu bantu batu balongela malu ku bilema biabu to, yeye mmumanye tshia kuenza misangu yonso. Bukokeshi buonso budi kabuyi bulonda mikenji yende kabuena mua kukokesha bimpe to. Bua bualu ebu, dikokesha dia Satana ku butuangaji bua bantu divua ne bua kupangila anu ku ntuadijilu. Pashishe bu muvuaye ne meji mabi pavuaye musake bantu bua kubenga bukokeshi bua Yehowa, bukokeshi bua bantu kabuena ne kudibu mua kuya to.
5, 6. Bidi bimueneka ne: ntshinyi tshivua tshisake Satana bua kutombokela Yehowa?
5 Pa tshibidilu muntu muimpe katu wenza bualu budiye mumanye ne: kabuakukumbana to. Yeye mutungunuke anu ne kubuenza, nealue kuitaba tshilema tshiende. Malu akadi menzeke mmaleje misangu ne misangu ne: kuluisha Mufuki wa bukole buonso kakuena ne dikuatshisha to. (Bala Nsumuinu 21:30.) Kadi bu muvua Satana udiangata ne mushinga wa bungi ne uditambisha, wakela Yehowa nyima. Nunku, Diabolo wakadisunguila njila uvua ne bua kumufikisha anu ku diakabi.
6 Mfumu mukuabu wa mu Babulona wakalua kuleja meji a buena a Satana bualu wakaditambisha wamba ne: ‘Nembande mu diulu, nembandishe nkuasa wanyi wa bukalenge mulu pa mutu pa mitoto ya Nzambi; nenshikame pa mutu pa mukuna wa disangisha ku mfudilu kua luseke lua Nord. Nembande kulu pa mutu pa matutu, nendivuije bu Nzambi Mutambe wa Mulu.’ (Yesh. 14:13-15) Mfumu uvua mubule meji au kakakumbaja tshivuaye ujinga to, ne bukalenge bua bena Babulona buakashikila mu mushindu mubi. Bia muomumue, Satana ne bantu bende nebashikile bibi bitambe.
Bua tshinyi Nzambi mmulekele bantu badikokesha?
7, 8. Mmalu mimpe kayi adi mamueneke bualu Yehowa mmulekele bubi bua tshikondo kampanda?
7 Bantu bakuabu badi mua kudiebeja bua tshinyi Yehowa kavua mupangishe bantu bua kutua ku tshia Satana ne kulonda bukokeshi buvua kabuyi ne kuvuabu mua kuya. Bu mudiye Nzambi wa Bukole Buonso, kakuvua tshivua mua kumupangisha bua kuenza nanku to. (Ekes. 6:3) Kadi wakabenga. Meji ende akamuambila ne: kubenga kuela dîyi mu buntomboji bua bantu bua tshipolu kampanda kuvua mua kufikisha ku malu mimpe. Yehowa uvua ne bua kulua kubingishibua bu Mukokeshi muakane udi ne dinanga ne dipangadika diende divua ne bua kupetesha bantu bavua bamulamate masanka.
8 Bu bantu babenge tshivua Satana muambe ne bitabe bukokeshi bua Nzambi, kabavua ne bua kuikala ne ntatu idibu nayi lelu eyi to. Kadi dipangadika dia Yehowa dia kulekela bantu badikokesha bua tshipolu kampanda ndibambuluishe bikole. Bantu badi banange buakane mbafike ku dimona buimpe bua kuteleja Nzambi ne kumueyemena. Katshia anu ku ntuadijilu, bantu mbatete mishindu mishilangane ya dikokesha, kadi yonso idi anu mibi. Bualu ebu mbuambuluishe batendeledi ba Nzambi bua kuikala batuishibue ne: bukokeshi bua Yehowa ke budi buimpe. Tshidibi, bantu bonso too ne badi batendelela Nzambi mbapete ntatu mikole bualu Yehowa mmulekele bukokeshi bubi bua Satana. Kadi padiye muanji kulekela malu mabi aa, mbiambuluishe kabidi batendeledi bende ba lulamatu.
Buntomboji budi butumbishisha Yehowa
9, 10. Leja mudi bukokeshi bua Satana butumbishishe Yehowa.
9 Kulekela bantu badilombola ku bukokeshi bua Satana ki nkupendeshishe mushindu udi Yehowa ukokesha to. Kadi nkumutumbishishe. Malu adi menzeke mmaleje muvua Yelemiya muambe bulelela pavuaye mufunde ku bukole bua nyuma muimpe ne: bantu kabena mua kudilombola bimpe to. (Bala Yelemiya 10:23.) Pashishe buntomboji bua Satana mbupeteshe Yehowa mushindu wa kuleja patoke ngikadilu yende mimpe. Mushindu kayi?
10 Bu mutudi bamone bubi bua bukokeshi bua Satana, ngikadilu milenga ya Yehowa idi imueneka mu mushindu uvuayi kayiyi mua kumueneka to. Ngikadilu eyi mmimuvuije Nzambi muimpe mutambe ku mêsu kua badi bamunange. Pamutu pa bukokeshi bua Satana kupendeshisha Nzambi, mbuambuluishe bua kumutumbisha. Mbuleje patoke mushindu muimpe menemene udi Yehowa mupite ne tshilumbu tshia mpata ivua mijuke bua bumfumu buende. Bua kumvuija bualu ebu bimpe, tukonkononayi mu tshikoso imue ngikadilu ya Yehowa ne tumone mudi bukokeshi bubi bua Satana bufikishe Yehowa ku diyileja mu mishindu mikuabu.
11. Mmushindu kayi udi Yehowa muleje dinanga diende?
11 Dinanga. Mukanda wa Nzambi udi wamba ne: “Nzambi udi dinanga.” (1 Yone 4:8) Nzambi mmufuke bantu tshia kumpala bualu udi ne dinanga. Mushindu wa dikema udiye mutufuke udi uleja kabidi mudiye ne dinanga. Yehowa wakaleja kabidi mudiye munange bantu pavuaye mubalongoluele muaba muimpe wa kusomba ne bintu bionso bivua bikengela bua diakalenga diabu. (Gen. 1:29-31; 2:8, 9; Mus. 139:14-16) Kadi dîba diakenza bantu bubi, Yehowa wakaleja dinanga diende mu mishindu mikuabu. Mushindu kayi? Mupostolo Yone wakatela mêyi a Yezu adi amba ne: ‘Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’ (Yone 3:16) Kuvuaku mushindu mukuabu mutambe buimpe uvua Nzambi mua kuleja dinanga diende kupita wa kutuma Muanende mulela umue bua kupikula bantu ku bubi anyi? (Yone 15:13) Dinanga dia pa buadi edi ndipeshe bantu tshilejilu, bualu ndibapeshe mushindu wa kunanga bakuabu kupita mudibu badinanga mu malu onso anu muvua Yezu muenze.—Yone 17:25, 26.
12. Mmushindu kayi udi Yehowa uleja bukole buende?
12 Bukole. Anu “Nzambi wa Bukole Buonso” ke udi ne bukole bua kufuka muoyo. (Buak. 11:17; Mus. 36:9) Padi muntu uledibua, udi anu bu dibeji ditoke didibu kabayi bafunda tshintu. Padiye ufua, mmuuje dibeji adi ne mapangadika, bienzedi ne malu avua mamuenzekele bivua bienze bua ikale muntu wa mushindu kampanda. Yehowa udi ulama malu aa mu lungenyi luende ne pakumbana tshikondo, udi mua kubisha muntu au anu muvuaye. (Yone 5:28, 29) Nunku, nansha muvua Nzambi kayi mulongolole bua bantu bikale bafua, lufu ndumupeshe mushindu wa kuleja ne: udi ne bukole bua kubisha bantu ku lufu. Bushuwa, Yehowa udi “Nzambi wa Bukole Buonso.”
13. Mmushindu kayi uvua mulambu wa Yezu muleje mudi Yehowa muakane mu malu onso?
13 Buakane. Yehowa katu ushima anyi wenza malu mabi to. (Dut. 32:4; Tito 1:2) Misangu yonso utu wenza malu adi alonda bulelela ne buakane nansha padi kuenza nanku kumueneka bu kudi kumuenzela bibi. (Lomo 8:32) Uvua ne bua kuikala mumvue bibi menemene pavuaye mumone Muanende munanga ufua pa mutshi wa makenga anu bu mupendi wa Nzambi. Kadi bu muvuaye munange bantu bena mapanga, wakalekela bualu budi busama ku muoyo abu buenzeka bua kuleja muvuaye mulamate mikenji yende ya buakane. (Bala Lomo 5:18-21.) Divulangana dia malu mabi pa buloba ndipeteshe Yehowa mushindu wa kuleja mudiye muakane mu malu onso.
14, 15. Mmushindu kayi udi meji ne lutulu bia Yehowa bimueneke?
14 Meji. Diakamue pavua Adama ne Eva benze bubi, Yehowa wakaleja mushindu uvuaye ne bua kujikija ntatu ivua buntomboji buabu ne bua kukebesha. (Gen. 3:15) Tshivuaye muenze diakamue atshi pamue ne mushindu wakalejaye batendeledi bende malu avua atangila bualu ebu ku kakese ku kakese, biakaleja meji ende mu mushindu wa dikema. (Lomo 11:33) Kakuena tshintu tshidi mua kupangisha Nzambi bua kukumbaja malu adiye mulongolole to. Mu buloba budi buule ne tshiendenda, mvita, muoyo mubi, tshitunu, dipanga luse, kansungasunga ne lubombo, Yehowa mmupete mushindu wa kuleja bifukibua biende bionso tshidi meji malelela umvuija. Muyidi Yakobo wakamba ne: ‘Meji adi afuma mu diulu diambedi adi mimpe, pashishe adi ditalala, adi bupole, budi bualu butekete bua kuasengelela, adi muule tente ne luse ne mamuma mimpe, kaena ne mpata, kaena ne lubombo.’—Yak. 3:17.
15 Lutulu ne muoyo mule. Lutulu ne muoyo mule bia Yehowa kabivua mua kutamba kumueneka bu yeye kayi muitabe bua bantu bena mapanga, bena bubi ne bilema kumutendelelabu to. Bu mudiye muitabe bualu ebu munkatshi mua bidimu binunu ne binunu, mmuleje mudiye ne ngikadilu milenga eyi mu mushindu wa dikema ne tudi ne bua kumuela tuasakidila bua bualu ebu. Mupostolo Petelo wakamba ne: tudi ne bua kumona ‘lutulu lua Mukalenge wetu bu lupandu.’—2 Pet. 3:9, 15.
16. Bua tshinyi tudi tusanka bikole bua mudi Yehowa witaba bua kutufuila luse?
16 Mmusue kufuilangana luse. Tuetu bonso tudi bena mapanga ne tutu tuenza malu mabi misangu ya bungi. (Yak. 3:2; 1 Yone 1:8, 9) Tudi ne bua kuikala ne dianyisha dia bungi bua mudi Yehowa witaba bua ‘kutamba’ kutufuila luse. (Yesh. 55:7) Bualu bukuabu, bu mutudi baledibue mu bubi, tudi bamanye disanka ditutu tumvua padi Nzambi utubuikidila mibi yetu. (Mus. 51:5, 9, 17) Padi Yehowa utufuila luse nunku, bidi bitusaka bua kumunanga bikole ne kulonda tshilejilu tshiende mu disomba dietu ne bakuabu.—Bala Kolosai 3:13.
Tshidi malu a pa buloba manyangukile
17, 18. Mmushindu kayi udi bukokeshi bua Satana bupangile?
17 Bulongolodi bua Satana budi bufumine ku bukokeshi buende mbupangile mu mishindu yonso katshia anu ku ntuadijilu. Mu 1991, tshikandakanda tshikuabu tshiakamba ne: “Malu a pa buloba mmanyanguke anyi? Eyowa, kadi ki Nzambi udi muanyange to, mbantu badipu.” (The European) Tshikandakanda etshi tshivua tshiambilamu. Satana wakasaka baledi betu ba kumpala bua kusungula bukokeshi bua bantu ne kubenga bua Yehowa. Nunku bakakeba bukokeshi buvua kabuyi mua kuenza bualu bua nsongo. Ntatu ne makenga bidi bantu ba pa buloba bujima nabi bidi bileja ne: bukokeshi bua bantu bukadi pa kutua ku tshibungubungu.
18 Bukokeshi bua Satana budi busaka bantu anu bua kusankisha majinga abu. Kadi kudisankisha kakuena mua kupita dinanga bukole to, bualu diodi ke didi dilombola bukokeshi bua Yehowa. Bukokeshi bua Satana mbupangile bua kupesha bantu nsombelu muimpe, disanka ne bupole. Nunku, bukokeshi bua Yehowa mbubingishibue mu mushindu wa pa buawu. Tudiku ne malu adi ajadika bualu ebu lelu anyi? Eyowa, anu bu mutuabimona mu tshiena-bualu tshidi tshilonda.
Ntshinyi tshituvua balonge bua bukokeshi patuvua babale . . .
• Lomo 13:1, 2?
• Kolosai 3:13?
[Nkonko ya dilonga]
[Tshimfuanyi mu dibeji 25]
Bukokeshi bua Satana kabutu buanji kuambuluisha bantu
[Mêyi a dianyisha]
U.S. Army photo
WHO photo by P. Almasy
[Tshimfuanyi mu dibeji 26]
Yehowa udi ne bukole bua kubisha bantu ku lufu
[Tshimfuanyi mu dibeji 27]
Dinanga dia Yehowa ne buakane buende biakamuenekela mu mulambu wa Muanende
