Tuepuke ditanaji mu ‘dituku edi dia lumu luimpe’

BENA nsudi banayi bavua bela meji tshia kuenza, bualu muntu nansha umue kavua mubapeshe tshintu ku tshiibi tshia musoko. Bena Sulia bavua bapangisha biakudia bua kabibuedi mu Samalea. Nunku, kabivua ne mushinga bua babuele mu musoko to, bualu biakudia bivua mushinga mukole. Mukanda wa Nzambi udi uleja ne: mamu mukuabu uvua mufike too ne ku didia muanende.​—2 Bak. 6:24-29.

Bena nsudi kuebejangana ne: ‘Bua tshinyi katuena mua kuya mu tshitudilu tshia bena Sulia? Tuetu baye ntshinyi tshituajimija?’ Pakila butuku, bobu kuya. Bafika, kusangana mu tshitudilu tshionso talalaa. Kamuvua mulami nansha umue. Tubalu tuvua tusuike, kadi kamuvua musalayi nansha umue. Bobu kuinangila mu ntenta umue, kamuvua muntu kadi muvua biakudia ne maluvu bitule bipuwe. Bobu kudia ne kunua. Kumonabu kabidi or ne argent, bilamba ne bintu bikuabu bia mushinga. Bobu kuambula bivuabu basue, kuyabu kubisokoka ne kualukilabu bua kuambula bikuabu. Bena mu tshitudilu bonso bavua banyeme. Yehowa uvua muenze mu tshishima bua bena Sulia bumvue muadi wa biluilu bia mvita. Bobu kuela meji ne: mbabele mvita, ke kuyabu lubilu, kushiya bintu bionso panshi.

Bena nsudi bakangata bintu bia mushinga ne kubisokokabu. Kadi tshiyole tshia nzala tshivua natshi bena mu Samalea kutuadija kulubakaja kondo kabu ka muoyo. Kutuadijabu kuambilangana ne: “Katuena tuenza bimpe, bualu bua edi ndituku dia lumu luimpe.” Bobu kupingana mu Samalea ne kuambila bantu lumu luimpe lua bivuabu bamone.​—2 Bak. 7:1-11.

Tuetu petu tudi mu dituku ditudi mua kubikila ne: “ndituku dia lumu luimpe.” Pavua Yezu wakula bua ‘tshimanyinu tshia ku nshikidilu kua tshikondo etshi,’ wakamba ne: ‘Nebambile bantu bonso ba pa buloba lumu luimpe elu lua bukalenge buanyi, neluikale tshimanyishilu ku bisamba bionso; pashishe, nshikidilu nealue.’ (Mat. 24:3, 14) Ntshinyi tshidi bualu ebu ne bua kutuenzela?

Malu etu adi mua kutunemesha bujitu

Bua disanka dia bintu bivua bena nsudi bapete, bakanji kupua muoyo Samalea. Ntema yabu yonso yakaya anu ku bivuabu mua kupeta. Bualu bua mushindu eu budi mua kutuenzekela petu anyi? ‘Biyole’ bia nzala mbumue bua ku malu adi enza tshimanyinu tshia nshikidilu wa tshikondo etshi. (Luka 21:7, 11) Yezu wakadimuija bayidi bende ne: ‘Nudilame bimpe, bua mitshima yenu kayinemi ne mudi ne dibuluka dia maluvu ne malu a pa buloba.’ (Luka 21:34) Tuetu bena Kristo tudi ne bua kuikala ne budimu bua ntatu yetu ya ku dituku ne ku dituku kayitufikishi ku dipua muoyo ne: tudi mu ‘dituku dia lumu luimpe.’

Muanetu wa bakaji mukuabu diende Blessing kakalekela malu ende amupita bukole to. Uvua mpanda-njila pavuaye ulonga, ne pashishe kumuselabu kudi muanetu mukuabu wa ku Betele wa mu ditunga dia Bénin, kuluaye pende muena mu dîku dia Betele. Udi wamba ne: “Ndi ngenza mudimu wa dikolopa ne dikomba mu nzubu, ne ndi muunange bikole.” Blessing udi usanka bikole padiye wela meji bua bidimu 12 bikadiye muenze mu mudimu wa ku dîba ne ku dîba bualu mmutangije ntema yende ku ‘dituku dia lumu luimpe’ ditudi lelu eu.

 Tudimukile bintu bidi bituangata dîba dia bungi

Pavua Yezu mutume bayidi bende 70 bua kuyisha, wakabambila ne: ‘Bulelela, bintu bia kunowa bidi bia bungi, kadi bena mudimu badi banyabanya. Nunku nulombe mukalenge wa bintu bia kunowa, atume bena mudimu mu kunowa kuende.’ (Luka 10:2) Anu bu mutu kuenza mudimu wa kunowa ne lulengu mua kunyangishisha bia pa madimi, kuyisha ne lulengu kudi mua kushipesha bantu ba bungi. Ke bualu kayi Yezu wakamba kabidi ne: ‘Kanuedi muntu muoyo musangu mule mu njila.’ (Luka 10:4) Mu tshiena Ebelu tshia kale, ‘kuela muntu muoyo’ kakuvua kumvuija anu kumuambila patupu ne: “Wetu au” anyi “muoyo awu” to. Kuvua kabidi mua kumvuija kuela muntu mu tshitupa ne kuyukila nende mutantshi mule. Nunku Yezu uvua wambila bayidi bende bua kuepuka malu adi mua kubapangisha bua kuenza mudimu wabu mudibi bikengela. Lumu luvuabu batuadila bantu luvua ne mushinga wa bungi.

Ela meji bungi bua dîba didi malu a dijikija lutetuku mua kutuangata. Tshilejilu, munkatshi mua bidimu bia bungi, televizion ke uvua utamba kuangata bantu ba miaba ya bungi dîba diabu dionso. Kadi netuambe tshinyi bua telefone ya ku bianza ne ordinatere? Mbasangane ne: bantu bakulumpe batue ku 1 000 ba mu ditunga dia Grande-Bretagne badi benza minite 88 ku telefone ya mu nzubu dituku dionso edi, benza minite 62 ku telefone ya ku bianza, benza minite 53 ku dituminangana mikanda ku Internet ne minite 22 ku difundilangana malu ku telefone. Bungi bua mêba adibu benza mbupite misangu ibidi bungi bua mêba adi mpanda-njila muambuluishi wenza mu buambi dituku dionso. Diebeja ne: Ntu ngenza mêba bungi kayi ku telefone, ku difundila bantu malu ku Internet ne ku telefone?

Ernst Seliger ne mukajende Hildegard bavua bena Kristo bela manyi bavua ne budimu bua malu avuabu benza ne dîba diabu. Mbenze bonso babidi bidimu bipite pa 40 mu maloko a bena Nazi ne a ba koministe. Pakapatukabu mu maloko au, bakenza mudimu wa bumpanda-njila too ne muakafuabu.

Bantu ba bungi bavua basue kufundilangana mikanda ne Ernst ne mukajende. Tatu eu ne mukajende bavua mua kupitshisha dîba diabu mu dibala ne difundila bantu mikanda. Kadi bakateka malu a ntendelelu mulelela pa muaba wa kumpala.

Bushuwa, tuetu bonso tutu basue bua bantu batudi banange batufundile anyi batubikile ku telefone, ne bualu ebu ki mbubi to. Kuenza malu mashilashilangane ku dituku dionso kudi ne mushinga. Kadi tudi ne bua kudimuka bua malu a dijikija lutetuku kaatuangatshi dîba dituvua mua kuya kuyisha lumu luimpe to.

Tuyishe lumu luimpe ne tshisumi

Tudi ne diakalenga dia kuikala ne muoyo mu ‘dituku dia lumu luimpe.’ Katuitabi bua ditanaji ditukuate bu muvuadi dianji kukuata bena nsudi banayi to. Katupu muoyo ne: bakalua kuamba ne: “Katuena tuenza bimpe.” Bia muomumue, ki mbimpe tulekele dikeba dia masanka etu nkayetu anyi dipitshisha dia dîba ku malu a dijikija nawu lutetuku ditupangisha bua kuyisha bikole to.

Tudi ne tshilejilu tshimpe tshia kulonda mu bualu ebu. Pakela mupostolo Paulo meji bua bidimu 20 bivuaye muenze mu mudimu wa diyisha, wakamba ne: ‘Ngakuvudija kuamba kuanyi kua lumu luimpe lua Kristo.’ (Lomo 15:19) Paulo kavua muitabe bua tshintu nansha tshimue tshikepeshe tshisumi tshiende to. Tuikalayi petu ne tshisumi bu tshiende patudi tuambila bantu mukenji wa Bukalenge mu ‘dituku edi dia lumu luimpe.’

[Tshimfuanyi mu dibeji 28]

Blessing kavua muitabe bua malu ende amupangishe bua kuenza mudimu wa ku dîba ne ku dîba

[Tshimfuanyi mu dibeji 29]

Ernst ne mukajende bavua ne budimu bua bungi bua malu avuabu benza ne dîba diabu