Nuambuluishangane bua kutendelela Nzambi bimpe

BUA bena mu dîku kunangabu Nzambi ne kumuenzela mudimu bimpe, badi ne bua kuikala ne lungenyi lua kuambuluishangana. Pavua Yehowa mufuke mulume wa kumpala ne mukajende wakaleja mudi kukuatshishangana kuikale ne mushinga. Eva uvua ne bua kuikala “mukuatshishi” wa Adama. (Gen. 2:18) Mu dibaka, mulume ne mukaji badi ne bua kuikala bambuluishangana. (Muam. 4:9-12) Bua baledi ne bana kukumbajabu mudimu udi Yehowa mubapeshe badi kabidi ne bua kuambuluishangana.

Ntendelelu wa mu dîku

Barry ne Heidi badi ne bana batanu. Mbafike ku dimona ne: kulongolola malu pamue bua kulonga Bible mu dîku nkubambuluishe bua kuya kumpala. Barry udi wamba ne: “Imue misangu kumpala kua tuetu kulonga mu dîku, ntu mpesha muana yonso ka mudimu ka kuenza. Ndi mua kubalomba bua kubala tshiena-bualu kampanda tshia mu Réveillez-vous! ne kulua kutuambila tshidibu bumvuamu. Tutu kabidi tuambulula malu a kuya kuamba mu buambi bua muana yonso amanye tshia kuamba.” Heidi udi wamba pende ne: “Yonso wa kutudi mmufunde bipatshila bidiye ne bua kukumbaja mu mudimu wa Nzambi ne tutu tubikonkonona patutu tulonga mu dîku bua kumona ni tudi baye kumpala.” Barry ne mukajende mbafike ku dimona kabidi ne: kubenga kutemesha televizion amue matuku ku dilolo, kudi kupetesha yonso wa kudibu dîba dia kudibadila.

Bisangilu bia tshisumbu

Mike ne Denise mbakoleshe bana banayi. Mmushindu kayi udi kuenza malu pamue kubambuluishe? Mike udi wamba ne: “Imue misangu nansha tuetu badilongolole bimpe mushindu kayi, katuvua anu tufika kumpala kua dîba mu bisangilu to. Kadi kukuatshishangana kuvua kutuambuluisha bua kufikamu kumpala kua dîba.” Denise udi wamba pende ne: “Pavua bana benda bakola, yonso wa kudibu uvua ne mudimu wa kuenza. Tshilejilu, Kim muanetu wa bakaji uvua wambuluisha bua kulamba biakudia ne kubiteka ku mêsa.” Muanabu wa balume Michael udi wamba ne: “Mu Dibidi dilolo kuvua tshisangilu tshia tshisumbu tshivua tshienzekela kuetu. Nunku tuvua tukomba mu nzubu, tukolopamu ne tulonga nkuasa.” Matthew muanabu mukuabu wa balume udi wamba pende ne: “Tatu uvua udienzeja bua kufika kumbelu kumpala kua dîba matuku atuvua ne tshisangilu atshi ne utuambuluisha bua kudilongolola bua kubuelamu kumpala kua dîba.” Ntshinyi tshiakapetabu?

Kuambuluishangana kudi ne mushinga

Mike udi wamba ne: “Mu 1987, meme ne Denise tuakalua bampanda-njila. Tshikondo atshi, bana betu basatu batshivua kumbelu. Bana babidi bakalua bampanda-njila ne bakuabu bakaya kuenza midimu ya dibaka Betele. Disanka dikuabu didi dîku dietu dipete ndia ne: tudi bambuluishe bantu batue ku 40 bua kudilambula kudi Yehowa ne kutambula. Dîku dietu divua dipete kabidi diakalenga dia kuya kuibaka Nzubu ya Bukalenge ne ya Mpuilu too ne mu matunga makuabu.”

Bushuwa, kukuatshishangana mu dîku kudi ne mushinga wa bungi. Nudiku mua kukeba mishindu mikuabu inudi mua kuambuluishangana mu dîku dienu anyi? Numanye ne: nuenu nuambuluishangana, dîku dienu nediye kumpala mu mudimu wa Nzambi.

[Tshimfuanyi mu dibeji 28]

Kuambulula malu a kuamba mu buambi kudi kuambuluisha bua kuyisha bimpe