Udi muvuluke anyi?

Dibala dia bibejibeji bia Tshibumba tshia Nsentedi bishale ebi divua dikusankishe anyi? Nanku, anji tangila ni udi mua kuandamuna nkonko idi ilonda eyi:

• Bua tshinyi bidi ne mushinga wa bungi bua kulama muoyo wetu mutoke?

Patudi tulama muoyo wetu mutoke tudi tuleja mutudi tukokela bumfumu butambe bunene bua Yehowa bualu tudi bamunange ne mudi Satana muikale muena dishima. Nzambi neatulumbuluishe bilondeshile muoyo wetu mutoke ne udi ne mushinga bualu neutupeteshe muoyo wa tshiendelele.​—15/12, dibeji 4-6.

• Ngimue mianzu kayi ya Yezu idi ileja mudimu udiye nawu mu malu adi Nzambi mulongolole?

Muana umuepele mulela. Dîyi. Amen. Mutuangaji wa tshipungidi tshipiatshipia. Muakuidi munene. Kankanunuina kavuabu balaye.​—15/12, dibeji dia 15.

• Bua tshinyi tshivua Eliya muambile muena mudimu wende bua kutangila ku luseke lua mâyi manene pavua Eliya usambila tshidi ne mushinga? (1 Bak. 18:43-45)

Eliya wakaleja muvuaye mumanye luendu lua mâyi. Matutu avua enzeka muulu pa mutu pa mâyi manene avua abanda too ne pa mutu pa ditunga bua kulokesha mvula.​—1/4, dibeji dia 24-25.

• Mmushindu kayi utudi mua kuvudija disanka ditudi tupeta mu mudimu wa kuyisha?

Tudi ne bua kulongolola muoyo wetu, kuimanyina pa mushindu utudi mua kuambuluisha bakuabu. Tudi mua kuyisha ne tshipatshila tshia kutuadija kulonga Bible ne bantu. Padi bantu kabayi batuteleja, tudi mua kusungula biena-bualu bidi mua kusankisha bantu ba mu teritware wetu.​—15/1, dibeji dia 8-10.

• Bua tshinyi mankenda adi ne mushinga mu nsombelu wa bena Kristo balelela bonso?

Muprofete Yeshaya wakafunda tshikena-kumona tshikuabu tshia muvua banjelu bakula bua Mufuki mudiye “Wa tshijila, wa tshijila, wa tshijila.” (Yeshaya 6:3) Miaku eyi idi ishindika bukezuke ne mankenda bia Nzambi bidi bipite kule ne kule bintu bikuabu bionso bidiye mufuke. Nanku, Nzambi udi ulomba basadidi bende bonso bua bikale pabu ba tshijila ne bena mankenda. Udi ubambila ne: “Nuenu nenuikale ba tshijila, bualu bua meme ndi wa tshijila.”​—1 Petelo 1:16.​—1/1, dibeji dia 26.

• Mmushindu kayi udi malongesha a mu Bible ne bua kushintulula mushindu udi muena Kristo ne bua kumona bilele bia malu a madilu?

Nansha mudi muena Kristo mua kudila padiye ufuisha, mmumanye ne: bafue ki mbamanye bualu nansha bumue to. Nansha padi badi kabayi bena Kristo bamuamba mêyi mabi, udi wepuka bilele bidi bileja ne: bafue badi mua kuambuluisha badi ne muoyo anyi kubenzela bibi. Bua kuepuka bilumbu, bamue bena Kristo batu bafunda mukanda bua kuleja mushindu udibu basue bua babadile pafuabu.​—15/2, dibeji dia 29-31.

• Mmushindu kayi udi batendeledi ba Yehowa bamupesha bukole?

Bu mutudi bafuke ku tshimfuanyikiji tshia Nzambi, tutu tuenza muetu muonso bua kuikala ne ngikadilu ya buena yende bu mudi bukole. (Genese 1:27) Tuetu bikale bushuwa ne dianyisha bua malu adi Mufuki mutuenzele, netufile bukole buetu ne makanda etu bua kumutumbisha ne kumusamuna. Pamutu pa tuetu kufila bukole anu ku malu adi atutangila tuetu nkayetu, tudi bamona ne: Yehowa Nzambi mmukumbane bua tuetu kumuenzela mudimu ne bukole buetu buonso.​—Mâko 12:30.​—1/1, dibeji dia 27.

• “Mukanda wa Yashâ” ne ‘mukanda wa mvita ya Yehowa’ mmikanda ya mu Bible idi mijimine anyi? (Yosh. 10:13; Nom. 21:14)

Tòo. Bidi bimueneka ne: ivua mikanda ivuabu kabayi bafunde ku nyuma wa Nzambi, kadi ivua bafundi ba Bible batele mêyi ayi.​—15/3, dibeji dia 32.

• Mmajinga kayi adi tatu mulenga ne bua kukumbajila bana bende?

Bana badi dijinga ne (1) dinanga diende, (2) tshilejilu tshilenga, (3) muaba utu nsombelu muimpe, (4) kubalongesha malu a Nzambi, (5) dinyoka, (6) bukubi.​—1/1, dibeji dia 11-13.