Nkonko ya babadi

Muana yeye mufuile munda mua mamuende, neabishibue ku lufu anyi?

Bitu bikole bua muntu udi kayi muanji kutula difu anyi kufuisha muana pa lulelu kumvuaye kanyinganyinga katu naku bantu bakadi bajimije bana mushindu eu. Kudi baledi batu banyingalala bikole bua bualu ebu. Mamu mukuabu uvua mafu atanu matuke wakalua kulela bana babidi. Kadi uvua anu uvuluka bana bende bonso bavuaye mujimije abu. Too ne muakafuaye, uvua anu utshinka bukole buvua bana abu mua kuikalabu bu bobu kabayi bafue. Bena Kristo ba mushindu eu badiku mua kutekemena ne: bana babu abu nebabishibue anyi?

Diandamuna dia mu tshikoso ku lukonko elu didi ne: Katuena bamanye to. Bible kena wakula patoke bua dibika dia bana bavua bafuile pa lulelu anyi bafuile munda to. Kadi udi ne amue mêyi adi akula bua tshilumbu etshi adi mua kutukolesha ku muoyo.

Tuakulayi bua nkonko ibidi idi ipetangana ne bualu ebu. Lua kumpala, ku mêsu kua Yehowa muoyo wa muntu udi utuadija padibu bamuimita anyi padibu bamulela? Luibidi, mmunyi mutu Yehowa umona muana patshidiye munda mua mamuende? Utuku umumona bu muntu wetu wa bushuwa eu anyi bu tutupa tua muntu mu difu dia mamuende? Bible udi wandamuna nkonko ibidi eyi patoke.

Mikenji ya Mose ivua ileja patoke ne: muoyo wa muntu udi utuadija kumpala kua kuledibuaye. Mushindu kayi? Ivua ileja ne: bavua ne bua kushipa muntu uvua ushipa muana utshivua munda mua mamuende. Kuvua mukenji uvua wamba ne: “Wewe neufile muoyo ku muoyo.” * (Ekes. 21:22, 23) Nunku, muana utshidi munda mua mamuende mmuntu udi ne muoyo. Bualu ebu mbuambuluishe bena Kristo ba bungi bua kubenga kutula mafu ku bukole bualu mbamanye ne: kuenza nunku mbubi bunene ku mêsu kua Nzambi.

Muana utshidi munda mua mamuende mmuntu udi ne muoyo. Kadi muoyo au udi ne mushinga kayi ku mêsu kua Yehowa? Mukenji utudi batele udi uleja ne: bavua ne bua kushipa muntu mukulumpe uvua ukebesha lufu lua muana utshivua munda mua mamuende. Nunku bidi bimueneka ne: muoyo wa muana utshidi munda mua mamuende udi ne mushinga wa bungi ku mêsu kua Nzambi. Kudi kabidi mvese ya bungi mu Bible idi ileja ne: Yehowa udi umona muana udi kayi muanji kuledibua bu muntu wetu wa bushuwa eu. Tshilejilu, mukalenge Davidi wakamba bua Yehowa ku bukole bua nyuma muimpe ne: ‘Wakalamakaja bitupa bianyi bia mubidi mu difu dia mamuanyi. Mêsu ebe akumona bitupa bia mubidi wanyi kabiyi bianji kulamakana. Matuku anyi onso akadi mafunda mu mukanda webe, matuku mene awakapangadija bua meme ngikale ne muoyo.’​—Mus. 139:13-16; Yobo 31:14, 15.

Yehowa utu kabidi umona ne: muana utshidi munda mua mamuende udi ne yende ngikadilu idi mua kumuambuluisha mu matuku atshilualua. Tshilejilu, pavua Lebeka mukaji wa Isaka ne difu dia mapasa, Yehowa wakakula bua bana babidi bavua baluangana munda muende bua kuleja ne: ukavua mumone ngikadilu yabu ivua mua kulenga nsombelu wa bantu ba bungi mu matuku atshilualua.​—Gen. 25:22, 23; Lomo 9:10-13.

Tshilejilu tshia Yone Mubatiji tshidi kabidi mua kutuambuluisha bikole. Mukanda wa Luka udi wamba ne: ‘Pakumvua Elisabeta muoyo wakamuela Mariya, muana wakatabuluka mu difu diende; Elisabeta wakuujibua tente ne nyuma muimpe.’ (Luka 1:41) Pavua munganga Luka mufunde bualu ebu, wakatela muaku wa mu tshiena Greke udi uleja muana utshidi munda mua mamuende anyi ukadibu balele. Wakatela anu muaku umue au bua kuakula bua Yezu pavuaye mu tshikumbi.​—Luka 2:12, 16; 18:15.

 Nunku, Bible udiku uleja ne: kudi dishilangana pankatshi pa muana utshidi munda mua mamuende ne utshidibu balelelaku anyi? Bidi bimueneka ne: kabiena nanku to. Bualu ebu budi bumvuangana ne malu adi bena sianse bapete lelu. Tshilejilu, mbafike ku dimona ne: muana utshidi munda mua mamuende utu umvua malu adi enzeka pambelu ne udi mua kuenza malu bilondeshile malu au. Nunku, kabiena bitukemesha bua mutu malanda adi pankatshi pa mamu ne muana udi munda muende ashemakana bikole to.

Bana bakuabu batu bakumbaja ngondo ya diledibua, bakuabu pabu baledibua tubishi. Tuangate tshilejilu etshi: Mamu udi ulela muana wa kabishi, kadi muana au udi ulua kufua matuku makese pashishe. Mukuabu pende udi ukumbaja ngondo ya dilela kadi muana udi ufuila munda kumpala kua kumulelaye. Tudiku mua kuamba ne: mamu wa kumpala udi ne ditekemena dia ne: muanende neabishibue bualu uvua muledibue kabishi, kadi muibidi kena ne ditekemena anyi?

Mu tshikoso, Bible udi wamba patoke ne: muoyo wa muntu udi utuadija padibu bamuimita, ne Yehowa utu umona muana udi munda mua mamuende bu muntu wa pa buende udi ne mushinga. Nunku, bantu bakuabu badi mua kumona ne: kuamba ne: muana udi mufuile munda kakubishibua ku lufu kudi kubengangana ne tshidi Bible wamba. Badi mua kumona ne: bualu ebu budi bushipa mukenji udi Bible utuelela wa kubenga kutula mafu ku bukole. Pabi mukenji eu mmuimanyine pa malu abidi a ne: muoyo wa muntu utu utuadija padibu bamuimita ne udi ne mushinga ku mêsu kua Yehowa.

Kumpala, tshibejibeji etshi tshivua tshijule nkonko ivua ileja dielakana bua dibishibua dia bana badi bafuila munda. Tshilejilu, bavua bebejamu ne: Nzambi udiku mua kupingaja mukuji wa muana utshivuabu bafuma ku dimita munda mua mamuende mu Mparadizu anyi? Kadi bena mu Kasumbu kaludiki bamane kulonga bikole, bela meji ne basambile bua bualu ebu, mbafike ku dimona ne: malu aa kaena ne mushinga bua dibishibua to. Yezu wakamba ne: “Nzambi udi mumanye mua kuenza malu onso.” (Mâko 10:27) Tshilejilu tshia Yezu muine tshiakaleja mudi mêyi aa malelela. Nzambi wakangata muoyo wende, kuwela mu difu dia nsongakaji utshivua kamama. Ku mêsu kua bantu, bualu bua mushindu eu kabuena mua kuenzeka to.

Nunku malu onso aa adiku aleja ne: Bible udi wamba ne: bana badi bafua kumpala kua kubalelabu nebabike ku lufu anyi? Tudi tuamba tuambulula ne: Bible kena wandamuna lukonko elu patoke to. Nunku ki mbimpe kuamba ne: nebabike anyi kabakubika to. Tshilumbu etshi tshidi mua kujula nkonko ya mishindu ne mishindu. Kadi ki mbimpe kukokangana ku mêyi bua bualu ebu to. Tshitudi bamanye ntshia ne: Bualu ebu mbutangile anu Yehowa Nzambi udi muule tente ne dinanga ne luse lujalame. (Mus. 86:15) Kakuyi mpata, udi ne dijinga dikole dia kujula bantu ku lufu. (Yobo 14:14, 15) Tuikalayi bashindike ne: utu wenza anu malu makane. Neatumbushile makenga onso atudi nawu mu tshikondo tshibi etshi pambilaye Muanende bua ‘kubutulaye midimu ya Diabolo.’​—1 Yone 3:8.

[Mêyi adi kuinshi]

[Tshimfuanyi mu dibeji 13]

Yehowa neatumbushile makenga onso