Yehowa uvua ‘usungila’ bantu bende ku kale

“Nzambi, ulue kundi lukasa! Wewe udi mukuatshishi wanyi ne musungidi wanyi.”​—MUS. 70:5.

1, 2. (a) Ndîba kayi ditu batendeledi ba Nzambi bamulomba diambuluisha? (b) Ndukonko kayi lutudi mua kudiela, ne nkuepi kutudi mua kupeta diandamuna?

PAVUA tatu mukuabu ne mukajende mu dikisha bakapeta mukenji ne: muanabu wa bakaji wa bidimu 23 mmujimine. Bakela meji ne: mbamushipe. Kusuikabu diakamue mabuki abu ne kupingana kuabu, benda balomba Yehowa bua abambuluishe. Ntemu kampanda wa bidimu 20 udi upeta disama divua mua kutekesha mubidi wende mujima ku kakese ku kakese. Diakamue wakasambila Yehowa. Mamu mukuabu udi udikoleshila muanende wa bakaji wa bidimu 12 udi ukeba mudimu ne kena ne makuta bua kusumba biakudia to. Udi ulomba Yehowa diambuluisha ne muoyo mujima. Bushuwa, padi batendeledi ba Nzambi bapeta ntatu, batu bamulomba diambuluisha. Ukatuku mulombe Yehowa bua akuambuluishe paudi mu ntatu anyi?

² Lukonko lua mushinga lutudi mua kudiela ndua ne: Yehowa utuku utuandamuna patutu tumulomba diambuluisha anyi? Tudi tupeta diandamuna didi dikolesha ku muoyo mu Musambu wa 70. Davidi mutendeledi wa Yehowa uvua mupete ntatu ya bungi mu nsombelu wende ke uvua mufunda musambu eu ku bukole bua nyuma muimpe. Wakambila Yehowa ne: “Nzambi, . . . udi mukuatshishi wanyi ne musungidi wanyi.” (Mus. 70:5) Dikonkonona dia Musambu wa 70 eu nedituambuluishe bua kumona bua tshinyi tuetu petu tudi mua kueyemena Yehowa patudi mu ntatu bashindike ne: ‘neatusungile.’

‘Udi musungidi’

3. (a) Ndilomba kayi didi mu Musambu wa 70? (b) Ndishindika kayi didi Davidi uleja mu Musambu eu?

³ Davidi udi utuadija Musambu wa 70 ulomba diambuluisha kudi Nzambi ne uujikija kabidi muomumue. (Bala Musambu wa 70:1-5.) Udi ulomba Yehowa bua ‘alue lukasa’ bua kumusungila. Mu mvese muibidi too ne ku muinayi, Davidi udi ulomba Yehowa malu atanu. Malu asatu a kumpala adi atangila bantu badi bajinga kumushipa. Udi ulomba Yehowa bua kutshimuna baluishi bende ne kubafuisha bundu bua malu mabi abu. Malu abidi a ndekelu adi mu mvese muinayi adi atangila batendeledi ba Nzambi. Davidi  udi ulomba bua bantu badi bakeba Yehowa basanke ne bamutumbishe. Ku ndekelu kua Musambu eu, udi wambila Yehowa ne: “Wewe udi mukuatshishi wanyi ne musungidi wanyi.” Mu mvese eu Davidi kena ulomba Yehowa bualu to. Kadi udi umuambila ne: “Udi,” bua kuleja mudiye umueyemena. Davidi mmushindike ne: Nzambi neamuambuluishe.

4, 5. Ntshinyi tshidi Musambu wa 70 utulongesha bua Davidi, ne ndishindika kayi ditudi ne bua kuikala nadi?

⁴ Ntshinyi tshidi Musambu wa 70 uleja pa bidi bitangila Davidi? Pavuaye upetangana ne baluishi bavua bajinga kumushipa, kavua udiangatshila malu mu bianza to. Kadi uvua mushindike ne: Yehowa uvua ne bua kukosa tshilumbu tshia baluishi bende aba mushindu uvuaye musue ne pa dîba divuaye musue. (1 Sam. 26:10) Davidi wakatungunuka ne kueyemena Yehowa mushindike ne: utu wambuluisha ne usungila bantu badi bamukeba. (Eb. 11:6) Davidi uvua mumanye ne: kudi malu a bungi adi asaka batendeledi balelela bua kusanka ne kutumbisha Yehowa padibu bambila bakuabu malu ende manene.​—Mus. 5:11; 35:27.

⁵ Anu bu Davidi, tudi bashindike ne: Yehowa mmukuatshishi wetu ne ‘musungidi’ wetu. Nunku, patudi tupeta ntatu anyi tukeba diambuluisha, tudi ne bua kusambila Yehowa bua atuambuluishe lukasa. (Mus. 71:12) Kadi ntshinyi tshidi Yehowa mua kuenza bua kuandamuna ku masambila etu? Kumpala kua tuetu kumona mushindu udi Yehowa wandamuna masambila etu, tukonkononayi mishindu isatu ivuaye musungile Davidi, mumuambuluishe pavuaye mu ntatu mikole.

Wakamusungila kudi baluishi bende

6. Ntshinyi tshivua tshiambuluishe Davidi bua kumanya ne: Yehowa utu usungila bantu bakane?

⁶ Bitupa bia Mukanda wa Nzambi bivuaku tshikondo atshi biakambuluisha Davidi bua kumanya ne: bantu bakane badi ne bua kutekemena diambuluisha dia Yehowa. Tshilejilu, pavua Yehowa mubutule bantu ku Mvula wa kabutu, wakasungila Noa ne bena mu dîku diende bualu bavua bamutshina. (Gen. 7:23) Pavuaye mutume kapia ne soufre bua kubutula bantu ba mu Sodoma ne Amola, wakambuluisha Lota ne bana bende babidi bua kusungila mioyo yabu. (Gen. 19:12-26) Pavua Yehowa mubutule Palô ne biluilu biende bia mvita mu Mbuu Mukunze, wakasungila tshisamba tshiende ku lufu lubi lutambe. (Ekes. 14:19-28) Nunku kabiena bitukemesha bua muvua Davidi mutumbishe Yehowa mu Musambu mukuabu wamba mudiye ‘Nzambi wa lupandu.’​—Mus. 68:20.

7-9. (a) Mmalu kayi avua mafikishe Davidi bua kuitaba ne: Nzambi uvua mua kumusungila? (b) Nnganyi uvua Davidi mutumbishe bua muvuaye musungidibue?

⁷ Davidi uvua kabidi ne malu makuabu avua mamufikishe ku ditaba ne: Yehowa uvua mua kumusungila. Wakadimuena ne: ‘maboko a tshiendelele’ a Yehowa adi mua kusungila badi bamutendelela. (Dut. 33:27) Yehowa wakamupandisha mu bianza bia “bena lukuna” bende misangu ya bungi. (Mus. 18:17-19, 48) Tuangate tshilejilu.

⁸ Pakatuadija bakaji ba mu Isalele kutumbisha Davidi bua muvuaye utshimuna baluishi, Mukalenge Shaula wakumvua mukawu ne kukebaye mua kumushipa ne difuma misangu mitue ku ibidi mijima. (1 Sam. 18:6-9) Kadi misangu yonso ibidi eyi, Davidi wakadiepela. Wakepela difuma edi anu bualu uvua mumanye kulua mvita bikole anyi? Tòo. Bible udi utuambila ne: ‘Yehowa wakadi nende.’ (Bala 1 Samuele 18:11-14.) Pashishe ‘Shaula wakatangila, wakajingulula ne: Yehowa wakadi ne Davidi’ bualu wakapangila bua kumushipesha kudi bena Peleshete.​—1 Sam. 18:17-28.

⁹ Nnganyi uvua Davidi mutumbishe bua disungidibua diende? Mutu wa mukanda wa Musambu wa 18 (mu Traduction du monde nouveau) udi wamba ne: Davidi ‘uvua muambile Yehowa mêyi aa pavuaye mumupandishe ku tshianza tshia Shaula.’ Davidi wakaleja muvuaye udiumvua pakambaye ne: “Yehowa udi dibue dianyi, musoko wanyi wa ngumbu  ya mvita, ne musungidi wanyi. Udi Nzambi wanyi, dibue dianyi mundi nnyemenamu.” (Mus. 18:2) Kabienaku bitukolesha ku muoyo patudi tumanya ne: Yehowa udi ne bukole bua kutusungila anyi?​—Mus. 35:10.

Wakamukuatshisha pavuaye usama

10, 11. Ntshinyi tshidi tshituambuluisha bua kumanya dîba divua Davidi musame bikole bu mudibi bileja mu Musambu wa 41?

¹⁰ Musangu mukuabu Mukalenge Davidi wakasama bikole anu bu mudibi bileja mu Musambu wa 41. Bamue baluishi bende kufika too ne ku diela meji ne: ‘Kakujuka kabidi’ to. (Mvese wa 7 ne wa 8) Ndîba kayi divua disama edi dikuate Davidi? Malu adi mu Musambu eu avua mua kuikala menzeke tshikondo tshikole tshivua muanende Abashaloma ukeba kumunyenga nkuasa wa bumfumu.​—2 Sam. 15:6, 13, 14.

¹¹ Tshilejilu, Davidi udi wakula bua mulunda wende uvuaye weyemena ne uvuabu badia nende wakamutungila. (Mvese wa 9) Bualu ebu budi mua kutuvuluija bualu kampanda buvua buenzekele Davidi. Pavua Abashaloma mutomboke, Ahitofele mulunda wa kueyemena uvua upesha Davidi mibelu wakamulekela ne kuyaye kudi Abashaloma. (2 Sam. 15:31; 16:15) Anji elayi meji, Mukalenge mutekesha kudi disama, kayi ne bukole bua kuimana kulu, kadi mumanye ne: bantu babi bavua bamunyunguluke bavua bamujingila lufu bua bakumbaje malu abu mabi.​—Mvese 5.

12, 13. (a) Ndishindika kayi diakaleja Davidi? (b) Mmunyi muvua Nzambi mua kuikala mumukuatshishe?

¹² Davidi wakatungunuka ne kueyemena “musungidi” wende. Wakamba bua mutendeledi wa Nzambi udi usama ne: ‘Yehowa neamupandishe mu dituku dia dikenga. Yehowa neamukoleshe padiye ulala pa bulalu bua butekete bua mubidi wende; wewe wakukudimuna bulalu buende bua disama buonso bua yeye asangale.’ (Mus. 41:1, 3) Mu mvese eu kabidi tudi tumona mudi Davidi weyemena Yehowa bualu udi wamba ne: “Yehowa neamukoleshe.” Davidi uvua mutuishibue ne muoyo wende mujima ne: Yehowa uvua ne bua kumusungila. Mushindu kayi?

¹³ Davidi kavua muindile bua Yehowa enze tshishima bua kumondopa to. Kadi uvua mutuishibue ne: Yehowa uvua ne bua ‘kumukolesha,’ tuambe ne: kumupesha bukole pavuaye mu bulalu bua disama. Kakuyi mpata, Davidi uvua dijinga ne diambuluisha edi. Pa kumbusha disama divua dimutekeshe, uvua kabidi munkatshi mua baluishi bavua bamuamba mêyi mabi. (Mvese 5, 6) Yehowa uvua mua kuikala mukoleshe Davidi pa kumuambuluisha bua kuvuluka malu avua mua kumukolesha ku muoyo. Davidi wakamba ne: “Wewe udi unkolesha bualu bua buakane buanyi.” (Mvese wa 12) Uvua kabidi mua kuikala mupete bukole pavuaye uvuluka ne: nansha muvuaye usama ne muvuabu bamuamba mêyi mabi, Yehowa uvua umuangata anu bu muntu muakane. Ndekelu wa bionso, wakumvua bimpe. Kabienaku bitukolesha ku muoyo patudi tumanya ne: Yehowa udi wambuluisha badi basama anyi?​—2 Kol. 1:3.

Wakamupesha bivuaye nabi dijinga

14, 15. Ndîba kayi divua Davidi ne bantu bende bapangile bimue bintu, ne ndiambuluisha kayi diakapetabu?

¹⁴ Pavua Davidi mulue mukalenge wa Isalele, uvua udia bimpe ne unua bimpe, uvua ubikila too ne bantu bakuabu bua badie nende. (2 Sam. 9:10) Kadi kuvua misangu ivuaye pende upangila biakudia. Pavua muanende Abashaloma ukeba kumunyenga bukalenge, Davidi ne bantu bende bakanyema Yelushalema. Bakaya ku Gilada ku Est kua musulu wa Yadene. (2 Sam. 17:22, 24) Bu muvuabu ne bua kunyema dîba dionso, bakapangila biakudia, bia kunua ne bintu bikuabu. Kadi nkuepi kuvuabu mua kupeta bintu ebi mu tshipela muvuabu amu?

¹⁵ Davidi ne bantu bende bakafika mu tshimenga tshia Mahanayima. Bakapetangana ne bantu basatu ba dikima mu tshimenga atshi, ke Shobi, Makî ne Bâzilai. Bakitaba  bua kuteka mioyo yabu mu njiwu bua kuambuluisha mukalenge uvua Yehowa muteke eu bualu bu Abashaloma mua kuangata bukalenge, uvua ne bua kunyoka muntu yonso uvua muambuluishe Davidi. Pavua bantu ba Nzambi basatu aba bamone lutatu luvua nalu Davidi ne bantu bende, bakabapesha bintu bivuabu nabi dijinga bu mudi malalu, blé, mponda, ntete mikanga, nkunde, buitshi, manteka ne mikoko. (Bala 2 Samuele 17:27-29.) Mushindu uvua bantu ba Nzambi basatu aba babakidile wakalenga Davidi ku muoyo bikole. Kavua mua kupua bualu ebu muoyo nansha kakese to.

16. Mu kuamba kuimpe, nnganyi uvua mupeshe Davidi ne bantu bende bivuabu nabi dijinga?

¹⁶ Kadi mu kuamba kuimpe, nnganyi uvua mupeshe Davidi ne bantu bende bivuabu nabi dijinga? Davidi uvua mushindike ne: Yehowa utu utabalela bantu bende. Yehowa udi mua kusaka bamue batendeledi bende bua kuambuluisha muanabu udi mu dikenga. Pavua Davidi uvuluka malu avua mamuenzekele ku Gilada, uvua umona ne: malu mimpe avua bantu basatu abu bamuenzele avua aleja muvua Yehowa mubambuluishe. Wakafunda pakavuaye mukulakaje ne: ‘Ngakadi nsongalume, katataka ngakulua muntu mukole; kadi tshiena muanji kutangila muntu muakane mushale patupu, anyi bana bende baledibue balomba biakudia.’ (Mus. 37:25) Kabienaku bitukolesha ku muoyo patudi tumanya ne: Yehowa utu anu wambuluisha bantu bende anyi?​—Nsu. 10:3.

Yehowa ‘mmumanye mua kupandisha bantu’

17. Ntshinyi tshidi Yehowa muleje misangu ne misangu?

¹⁷ Davidi ntshilejilu tshimue patupu tshia bantu bavua Yehowa musungile ku kale. Katshia anu ku tshikondo tshia Davidi, Nzambi mmuleje misangu ne misangu mudi mêyi a Petelo adi alonda aa mikale malelela: Yehowa ‘mmumanye mua kupandisha bantu bende bimpe mu mateyi abu.’ (2 Pet. 2:9) Tuangate bilejilu bikuabu bibidi.

18. Mmunyi muvua Yehowa musungile bantu bende mu matuku a Hezikiya?

¹⁸ Pavua biluilu bia mvita bia bena Ashû bilue kuluisha bena Yuda ne kufunyina bena mu Yelushalema bulobo mu tshidimu tshia 732 kumpala kua Yezu, Mukalenge Hezikiya wakasambila ne: ‘Yehowa Nzambi wetu, utusungile, bua ba mu makalenge onso a pa buloba bamanye ne: wewe Yehowa udi Nzambi nkayebe.’ (Yesh. 37:20) Hezikiya uvua utamba kuditatshisha bua dîna dia Nzambi ne bua lumu luende. Yehowa wakandamuna disambila divuaye muenze ne muoyo mujima  adi. Mu butuku bumue, muanjelu umue patupu wakashipa bena Ashû 185 000 bua kusungila batendeledi balelela ba Yehowa.​—Yesh. 37:32, 36.

19. Bena Kristo ba kumpala bakapanduka bualu bavua batumikile mubelu kayi?

¹⁹ Matuku makese kumpala kua Yezu kufua, wakambila bayidi bende ba mu Yudaya tshivuabu ne bua kuenza bua kusungidibua. (Bala Luka 21:20-22.) Bidimu bia bungi biakapita, kadi mu tshidimu tshia 66, ditomboka dia bena Yuda diakafikisha bena Lomo ku dituma biluilu biabu mu Yelushalema. Biluilu ebi bivua bilombola kudi Cestius Gallus biakanyangakaja tshitupa tshia tshimanu tshia ntempelo ne pashishe kumbukabu diakamue. Bena Kristo bakamona bualu ebu bu mushindu wa kunyema kabutu kakavua Yezu muleje ne kunyemenabu ku mikuna. Biluilu bia bena Lomo biakapingana mu 70 mu Yelushalema ne musangu eu kumubutula butubutu. Bena Kristo bavua batumikile mibelu ya Yezu bakapanduka ku dibutuka edi dibi.​—Luka 19:41-44.

20. Bua tshinyi tudi ne bua kueyemena Yehowa bu “musungidi” wetu?

²⁰ Bidi bitukolesha ku muoyo patudi tukonkonona muvua Yehowa musungile bantu bende. Malu avuaye muenze adi atusaka bua kumueyemena. Nansha tuetu bapete ntatu ya mushindu kayi mpindieu anyi mu matuku adi alua kumpala, tudi ne bua kueyemena Yehowa bu “musungidi” wetu. Kadi mmunyi mudi Yehowa mua kutusungila? Ntshinyi tshivua tshifikile bantu batuvua batele ku ntuadijilu kua tshiena-bualu etshi? Netuandamune nkonko eyi mu tshiena-bualu tshidi tshilonda.

Udi muvuluke anyi?

• Musambu wa 70 udi utupesha dishindika kayi?

• Mmunyi muvua Nzambi mukuatshishe Davidi pavuaye usama?

• Mbilejilu kayi bidi bileja ne: Yehowa utu usungila bantu bende kudi baluishi babu?

[Nkonko ya dilonga]

[Tshimfuanyi mu dibeji 6]

Yehowa wakandamuna disambila dia Hezikiya