Ngikadilu itudi ne bua kulonda

‘Londa malu makane ne a buimpe bua Nzambi ne ditabuja ne dinanga ne ditantamana ne kalolo.’​—1 TIM. 6:11.

1. Leja tshidi muaku “kulonda” ukuvuluija.

NTSHINYI tshidi tshikuluila mu lungenyi padibu batela muaku “kulonda”? Pamuapa udi uvuluka tshikondo tshia Mose pavua basalayi bena Ejipitu ‘balonda’ bena Isalele anu bua kuya kadifuisha mu Mbuu Mukenze patupu. (Ekes. 14:23) Anyi udi mua kuvuluka njiwu ivua mua kukuata muena Isalele uvua ushipa mukuende ku mpukapuka. Uvua ne bua kuya diakamue mu umue wa ku misoko isambombo ivuabu basungule bua kusokoma. Tshianana ‘musombuedi uvua ulonda mushipianganyi eu ne tshiji tshikole, umupeta ne umushipa.’​—Dut. 19:6.

2. (a) Mbualu kayi budi Nzambi ulomba bamue bena Kristo bua kuipatshila? (b) Mmulongolole tshinyi bua bena Kristo ba bungi lelu?

² Kadi tangila mudi tshilejilu tshia mupostolo Paulo tshishilangane ne bilejilu bidi kulu eku. Wakamba ne: ‘Ndi ntshinta bua kufika ku ndekelu wa njila bua kuangata bukenji bua dibikila dia mulu dia Nzambi mu Kristo Yezu.’ (Filip. 3:14) Bible udi uleja ne: bena Kristo bela manyi 144 000 (Paulo udi munkatshi muabu) badi bapeta bukenji bua kuya mu diulu. Nebakokeshe ne Yezu Kristo bidimu tshinunu pa buloba. Ebu mbualu buimpe budi Nzambi ubalomba bua kuipatshila. Kadi bena Kristo ba bungi lelu badi  ne ditekemena anyi tshipatshila tshikuabu. Yehowa mmulongolole ne dinanga dionso bua bapete muoyo wa tshiendelele mu mparadizu uvua Adama ne Eva bajimije.​—Buak. 7:4, 9; 21:1-4.

3. Mmunyi mutudi mua kuleja dianyisha bua malu mimpe adi Nzambi mutuenzele?

³ Bantu bena mapanga kabena mua kudipetela muoyo wa tshiendelele bualu badi badienzeja bua kuenza malu makane to. (Yesh. 64:6) Bua kuupeta, tudi ne bua kuitabuja malu adi Nzambi mulongolole bua kutupandisha ku butuangaji bua Yezu Kristo. Ntshinyi tshitudi mua kuenza bua kuleja dianyisha dietu bua malu mimpe adi Nzambi mutuenzele? Tudi mua kutumikila dîyi edi: ‘Londa malu makane ne a buimpe bua Nzambi ne ditabuja ne dinanga ne ditantamana ne kalolo.’ (1 Tim. 6:11) Kukonkonona ngikadilu eyi nekutuambuluishe bua kuangata dipangadika dia ‘kutamba’ kuyilonda.​—1 Tes. 4:1.

“Londa malu makane”

4. Bua tshinyi tudi bajadike ne: kulonda “buakane” kudi ne mushinga, ne mmalu kayi atudi ne bua kutuadija nawu?

⁴ Mu mikanda yonso ibidi ivua mupostolo Paulo mufundile Timote wakatela ngikadilu itudi ne bua kulonda, ne misangu yonso uvua utuadija anu ne “malu makane” anyi “buakane.” (1 Tim. 6:11; 2 Tim. 2:22) Kudi kabidi mvese mikuabu mu Bible idibu batulomba misangu ne misangu bua kulonda buakane. (Nsu. 15:9; 21:21; Yesh. 51:1) Bualu bua kumpala butudi ne bua kuenza bua kulonda buakane ‘nkumanya Nzambi umuepele mulelela ne yeye wakatumaye, Yezu Kristo mene.’ (Yone 17:3) Kulonda buakane kudi kufikisha muntu ku dinyingalala bua mibi ivuaye muenze ne ‘kuandamuka’ bua kuenza disua dia Nzambi.​—Bien. 3:19.

5. Ntshinyi tshitudi ne bua kuenza bua kuikala bantu bakane ku mêsu kua Nzambi?

⁵ Bantu ba bungi badi balonda buakane ne muoyo umue mbalambule mioyo yabu kudi Yehowa ne mbaleje mudibu badilambule padibu batambule. Pawikala muena Kristo mutambule, udiku mujadike ne: nsombelu webe udi uleja muudi utungunuka ne kulonda buakane anyi? Udi mua kuleja nunku paudi usunguluja “tshidi tshimpe ne tshidi tshibi” bilondeshile Mukanda wa Nzambi dîba diudi wangata mapangadika. (Bala Ebelu 5:14.) Tshilejilu, wewe muikale muena Kristo ukadi mukumbane bua kusela anyi kusedibua, udi mudisuike bua kubenga kuselangana ne muntu udi kayi muena Kristo mutambule anyi? Newenze nanku biwikala ulonda buakane.​—1 Kol. 7:39.

6. Kulonda buakane ne muoyo umue kudi kumvuija tshinyi?

⁶ Kuikala muntu muakane nkushilangane ne kudiamba mutudi bakane anyi ‘kupita kudibingisha.’ (Muam. 7:16) Yezu wakadimuija bantu bua kabenji malu bua kuleja mudibu bakane kupita bakuabu. (Mat. 6:1) Kadi kulonda buakane kudi kulomba kuakaja meji etu, lungenyi luetu, malu adi atusaka bua kuenza bualu kampanda ne kuakaja majinga etu ne muoyo mujima. Tuetu tutungunuka ne kuenza nunku, katuakuenza mpekatu minene to. (Bala Nsumuinu 4:23; tangila Yakobo 1:14, 15.) Pashishe Yehowa neatubeneshe ne neatuambuluishe patudi  tudienzeja bua kulonda ngikadilu mikuabu ya mushinga ya bena Kristo.

‘Londa malu a buimpe bua Nzambi’

7. “Buimpe bua Nzambi” ntshinyi?

⁷ Buimpe bua Nzambi anyi ditshina didi diumvuija kudifila ne muoyo mujima kudiye ne kushala bamulamate. Mukanda mukuabu udi umvuija malu a mu Bible udi uleja ne: muaku wa mu tshiena Greke udibu bakudimune ne: “buimpe bua Nzambi” udi umvuija “lungenyi luimpe lua kubenga kulekela tshintu nansha tshimue tshikepesha ditshina dia Nzambi.” Misangu ya bungi bena Isalele kabakaleja ditshina edi bualu bavua batombokela Nzambi nansha pakavuaye mubapatule ku bupika mu Ejipitu.

8. (a) Ditomboka dia Adama diakajula lukonko kayi? (b) Mmunyi muakela Nzambi “bualu busokoka” patoke?

⁸ Bidimu bia bungi panyima pa Adama mumane kutombokela Nzambi, kabavua banji kuandamuna lukonko lua ne: “Kudiku muntu udi mua kutshina Nzambi mu malu onso anyi?” Munkatshi mua bidimu bia bungi, kakuvua muntu nansha umue uvua uleja muvuaye utshina Nzambi mu nsombelu wende mujima to. Kadi pakakumbana tshikondo, Yehowa wakaleja patoke “bualu busokoka” ebu. Wakumusha muoyo wa Muanende mulela umue mu diulu ne kuuteka munda mua Mariya bua aledibue muntu mupuangane. Mu matuku onso akenza Yezu pa buloba too ne muakafuaye lufu lubi, wakaleja tshidi kudilambula kudi Nzambi mulelela ne muoyo mujima ne kushala anu mumulamate kumvuija. Masambila avuaye wenza akaleja muvuaye unemeka Tatuende wa mu diulu. (Mat. 11:25; Yone 12:27, 28) Ke bualu kayi Yehowa wakasaka Paulo bua kuakula bua “buimpe bua Nzambi” pavuaye wakula bua nsombelu muimpe uvua nende Yezu.​—Bala 1 Timote 3:16.

9. Mmunyi mutudi mua kulonda buimpe bua Nzambi?

⁹ Bu mutudi bantu bena mapanga, katuena mua kuleja ditshina dia Nzambi mu malu onso to. Kadi tudi mua kudilonda. Bua kudilonda, tudi ne bua kuidikija tshilejilu tshia Kristo ne muoyo mujima. (1 Pet. 2:21) Nunku katuakuikala bu bena lubombo badi ne “tshimuenekelu tshia buimpe bua Nzambi, kadi bamane kudiula bukole buabu.” (2 Tim. 3:5) Kabiena biumvuija ne: ditshina dia Nzambi kadiena dipetangana ne tshimuenekelu tshietu to. Didi dipetangana natshi. Tshilejilu, nansha tuetu tusungula bilamba bia kuvuala dituku dia dibaka dietu anyi patudi tuya mu tshisalu, tshimuenekelu tshietu tshidi ne bua kuleja misangu yonso mutudi “tutshina Nzambi.” (1 Tim. 2:9, 10) Bushuwa, kulonda buimpe bua Nzambi kudi kutulomba bua kutumikila mikenji yende dituku dionso diakafukaye edi.

‘Londa ditabuja’

10. Ntshinyi tshitudi ne bua kuenza bua kukolesha ditabuja dietu?

¹⁰ Bala Lomo 10:17. Bua muena Kristo kukoleshaye ditabuja diende, udi ne bua kutungunuka ne kuela meji pa malu mimpe adi mu Dîyi dia Nzambi. ‘Mupika wa lulamatu ne wa budimu’ mmupatule mikanda mimpe ya bungi. Mikanda bu mudi wa Muntu mutambe bunene wa katshia ne katshia, wa Longa malu kudi Mulongeshi Munene ne wa “Viens, suis-moi” idi ituambuluisha bua kumanya Kristo bimpe ne kumuidikija. (Mat. 24:45-47) Kasumbu ka mupika kadi kabidi kalongolola bisangilu, mpuilu ne mpungilu bidi biakula bua ‘dîyi dia Kristo.’ Udiku umona mushindu udi malu adi Nzambi  utupesha mua kukuambuluisha paudi ‘ualama ne ntema ya bungi’ anyi?​—Eb. 2:1, MMM.

11. Kusambila ne kutumikila kudi ne mudimu kayi mu dikolesha ditabuja dietu?

¹¹ Kusambila kudi kabidi kukolesha ditabuja dietu. Dituku dikuabu bayidi ba Yezu bakamulomba ne: ‘Udiundisha ditabuja dietu.’ Ke tshitudi petu ne bua kulomba Nzambi ne budipuekeshi. (Luka 17:5) Bua kukolesha ditabuja dietu, tudi ne bua kulomba Nzambi nyuma wende bualu ditabuja ndimue dia ku “mamuma a nyuma.” (Gal. 5:22) Kutumikila mikenji ya Nzambi kudi paku kudikolesha. Tshilejilu, tudi mua kudienzeja bua kuyisha bikole. Bualu ebu budi mua kutupetesha disanka dia bungi. Patudi tuela meji ku malu mimpe atudi tupeta patudi ‘tukeba diambedi bukalenge [bua Nzambi] ne buakane buende,’ ditabuja dietu didi dikola.​—Mat. 6:33.

‘Londa dinanga’

12, 13. (a) Mukenji mupiamupia wa Yezu udi wamba bishi? (b) Mmishindu kayi mimpe itudi ne bua kuidikija dinanga dia buena dia Kristo?

¹² Bala 1 Timote 5:1, 2. Paulo wakafila mubelu muimpe wa mushindu udi bena Kristo ne bua kunangangana. Ditshina dietu dia Nzambi didi kabidi diumvuija kutumikila mukenji mupiamupia wa Yezu wa ‘kusuangana’ bu mudiye mutusue. (Yone 13:34) Mupostolo Yone wakamba ne: ‘Bikala muntu ne bintu bia pa buloba, ne yeye udi utangila muanabu ubikengela, ne yeye udi ukanda luse luende kudiye, munyi mudi mua kuikala dinanga dia Nzambi munda muende?’ (1 Yone 3:17) Udiku mua kuvuluka misangu iuvua muambuluishangane anyi?

¹³ Mushindu mukuabu utudi tulonda dinanga ngua kufuila bana betu luse pamutu pa kubabaluluila malu. (Bala 1 Yone 4:20.) Tudi ne bua kutumikila mubelu wa mu Bible eu: ‘Nulejangane lutulu, nulekelelangane mibi yenu, bikala muntu ne mukuabu tshilumbu; bu muakanubuikidila Mukalenge mibi yenu; nuenu nuenze muomumue kabidi.’ (Kolos. 3:13) Kudiku muntu mu tshisumbu tshienu uudi mua kufuila luse anyi? Neumufuilelu anyi?

‘Londa ditantamana’

14. Ntshinyi tshitudi tulongela ku tshisumbu tshia Filadelefia?

¹⁴ Mbipepele bua kuipatshila tshintu tshitudi mua kupeta mu matuku makese, kadi ki mbipepele bua kuipatshila tshintu tshidi tshikole bua kupeta anyi tshitudi mua kupeta panyima pa matuku a bungi to. Nunku kuipatshila muoyo wa tshiendelele kudi kulomba ditantamana. Mukalenge Yezu wakambila bena mu tshisumbu tshia mu Filadelefia ne: ‘Bualu bua wakalama dîyi dia kutantamana kuanyi, nenkulame kabidi dîba dia diteta.’ (Buak. 3:10) Bushuwa, Yezu uvua muleje mudi ditantamana ne mushinga bualu didi dituambuluisha bua kubenga kupingana tshianyima patudi mu ntatu ne mu mateta. Bana betu ba mu tshisumbu tshia Filadelefia bavua ne bua kuikala batantamene mateta a bungi. Ke bualu kayi Yezu wakabashindikila ne: uvua ne bua kubambuluisha pavua diteta dinene ne bua kulua.​—Luka 16:10.

15. Ntshinyi tshivua Yezu muambe bua ditantamana?

¹⁵ Yezu uvua mumanye ne: bavua ne bua kukina bayidi bende kudi balela babu bavua kabayi bena Kristo ne bantu bakuabu. Ke bualu kayi wakabakankamija misangu mitue ku ibidi, ubambila ne: ‘Wananukila too ne ku nshikidilu neasungidibue.’ (Mat. 10:22; 24:13) Kadi wakabaleja kabidi ne: bavua ne bua kupeta bukole bua kutantamena ntatu. Mu tshilejilu kampanda, wakafuanyikija bantu ‘badi bitabuja dîyi dia Nzambi ne disanka’ kadi bapingana tshianyima bua ntatu ne buloba bua mabue. Kadi  wakafuanyikija bayidi bende ba lulamatu ne buloba buimpe bualu badi ‘balama’ dîyi dia Nzambi ne ‘bavudija maminu bua dinanukila diabu.’​—Luka 8:13, 15.

16. Ntshintu kayi tshimpe tshidi tshiambuluisha bantu bua kutantamana?

¹⁶ Udiku mumone tshidi mua kutuambuluisha bua kutantamana anyi? Tudi ne bua ‘kulama’ dîyi dia Nzambi ne muoyo mu mitshima yetu ne mu lungenyi luetu. Bible wa Les Saintes Écritures​—Traduction du monde nouveau (udibu bakudimune bimpe ne mu mushindu mupepele) udi mu miakulu ya bungi udi utuambuluisha bua kuenza nunku. Tuetu tuela meji pa tshitupa kampanda tshia Dîyi dia Nzambi dituku dionso, netupete bukole bua kutungunuka ne kuvudija maminu ‘bua dinanukila.’​—Mus. 1:1, 2.

‘Londa kalolo’ ne ditalala

17. (a) Bua tshinyi “kalolo” kadi ne mushinga? (b) Mmunyi muvua Yezu muleje ne: uvua mupole malu?

¹⁷ Kakutu muntu utu usanka padibu bamushiminyina malu to. Bantu batu babenga malu adibu babashiminyina ne tshiji tshionso. Kadi mbimpe kuikala ne “kalolo” anyi bupole. (Bala Nsumuinu 15:1.) Bitu bitulomba kudikanda bikole padibu batushiminyina malu. Yezu Kristo wakatushila tshilejilu tshimpe mu muanda eu. ‘Pakamupendabu, yeye kakabapenda kabidi; pakakengaye, yeye kakabakanyina, kadi wakadifila mu bianza bia udi ulumbulula biakane.’ (1 Pet. 2:23) Katuedi meji ne: tudi mua kuenza petu anu muvua Yezu muenze to, kadi tudi mua kudienzeja bua kuikala bapole malu.

18. (a) Kalolo anyi bupole nkimpe ku tshinyi? (b) Ngikadilu kayi mukuabu udibu batulomba bua kulonda?

¹⁸ Anu bu Yezu, tuikalayi ‘badilongolole misangu yonso bua kukudimuna dîyi’ kudi muntu udi utukonka bua ditabuja dietu, kadi ‘tuenze nunku ne kalolo ne ditshina.’ (1 Pet. 3:15) Tuetu bikale ne kalolo anyi bupole nebituambuluishe bua kubenga kufika munda patudi katuyi tupetangana ne bantu pa bualu kampanda dîba ditudi mu buambi anyi ne bena Kristo netu. (2 Tim. 2:24, 25) Bupole budi butuambuluisha bua kuikala ne ditalala. Pamuapa ke bualu kayi mu mukanda muibidi uvua Paulo mufundile Timote, wakatela “ditalala” munkatshi mua ngikadilu itudi ne bua kulonda. (2 Tim. 2:22; tangila 1 Timote 6:11.) Eyowa, “ditalala” ngikadilu mukuabu udi Bible utulomba bua kulonda.​—Mus. 34:14; Eb. 12:14.

19. Tuetu bamane kukonkonona ngikadilu muanda mutekete ya bena Kristo, ntshinyi tshitudi badisuike bua kuenza, ne bua tshinyi?

¹⁹ Tudi bakule bua ngikadilu muanda mutekete idibu balomba bena Kristo bua kulonda, mbuena kuamba ne: buakane, buimpe anyi ditshina dia Nzambi, ditabuja, dinanga, ditantamana, kalolo anyi bupole ne ditalala. Bidi bituenza disanka dia bungi bua kumona mudi bana betu mu bisumbu bionso badienzeja ne muoyo mujima bua kuikala ne ngikadilu eyi. Bualu ebu budi butumbisha Yehowa ne bumupesha mushindu wa kutulengeja bua butumbi buende.

Malu a kuelela meji

• Kulonda buakane ne buimpe bua Nzambi kudi kulomba tshinyi?

• Ntshinyi tshiatuambuluisha bua kulonda ditabuja ne ditantamana?

• Mmunyi mudi dinanga mua kutuambuluisha mu nsombelu wetu ne bantu bakuabu?

• Bua tshinyi tudi ne bua kulonda bupole ne ditalala?

[Nkonko ya dilonga]

[Tshimfuanyi mu dibeji 12]

Yezu wakadimuija bantu bua kabadileji mudibu bakane kupita bakuabu

[Tshimfuanyi mu dibeji 13]

Tudi mua kulonda ditabuja patudi tuela meji pa malu mimpe adi mu Dîyi dia Nzambi

[Tshimfuanyi mu dibeji 15]

Tudi mua kulonda dinanga ne bupole malu