Tuikale bantu ba “tshijila mu ditshina dia Nzambi”

BIBLE udi utuleja mudi Yehowa Nzambi muikale wa tshijila mu mushindu mupuangane wamba ne: “Wa tshijila, wa tshijila, wa tshijila udi Yehowa.” (Yesh. 6:3; Buak. 4:8) Muaku wa mu tshiena Ebelu ne tshiena Greke udibu bakudimune ne: “tshijila” udi umvuija kubenga kuikala ne manyanu anyi kutendelela mu mushindu muimpe ne kubenga kubuelakana mu malu mabi. Nzambi ngua tshijila bualu mmuimpe mu mushindu mupuangane.

Bu mudi Yehowa Nzambi muikale wa tshijila, kenaku ulomba bantu bende bua kuikala pabu ba tshijila ku mubidi, mu bikadilu ne mu ntendelelu wabu anyi? Bible udi uleja patoke ne: Yehowa mmusue bua bantu bende bikale ba tshijila. Tudi tubala mu 1 Petelo 1:16 ne: “Nuikale ba tshijila, bualu bua meme ndi wa tshijila.” Bantu bena mapanga badiku mua kuikala ba tshijila bu Yehowa anyi? Eyowa, nansha mudibu kabayi mua kumuidikija tshishiki. Bua tuetu kuikala bantu ba tshijila ku mêsu kua Nzambi, tudi ne bua kumutendelela mudiye musue ne kuikala nende mu malanda mimpe.

Kadi mmunyi mutudi mua kushala bantu bimpe munkatshi mua bantu babi? Mbikadilu kayi bitudi ne bua kulekela? Mmalu kayi atudi ne bua kushintulula mu ngakuilu wetu ne mu bienzedi bietu? Tumonayi tshitudi mua kulongela ku tshivua Nzambi mulombe bena Yuda pavuabu bapingane kuabu bafumina ku Babulona mu 537 kumpala kua Yezu.

‘Njila wa Tshijila neikaleku’

Yehowa wakamanyisha ne: bantu bende bavua mu bupika mu Babulona bavua ne bua kupingana kuabu. Wakabajadikila ne: ‘Tshibeba netshikaleku ne njila, nebamubikile ne: Njila wa Tshijila.’ (Yesh. 35:8a) Mêyi aa adi aleja ne: Yehowa kavua anu mubapeshe mushindu wa kupingana kuabu to, kadi uvua kabidi mubajadikile ne: uvua ne bua kubalama mu luendu luabu.

Yehowa mmunzuluile kabidi bantu bende ba lelu ‘njila wa tshijila’ bua bumuke mu Babulona munene udi muikale nsangilu wa bitendelelu bionso bia dishima. Mu tshidimu tshia 1919 wakapikula bena Kristo bela manyi ku bitendelelu bia dishima ne kumushabu malongesha a dishima mu ntendelelu wabu ku kakese ku kakese. Tshisumbu tshia batendeledi ba Yehowa lelu eu mmuaba wa tshijila utudi mua kumutendelela bimpe, kudia nende malanda mimpe ne kusomba bimpe ne bena Kristo netu.

 Bena Kristo bela manyi badi benza ‘kasumbu kakese’ ne ‘mikoko mikuabu’ idi yenza ‘musumba munene wa bantu’ mbasungule bua kuendela mu njila wa tshijila ne badi babikila bantu bakuabu bua kudisanga kudibu. (Luka 12:32; Buak. 7:9; Yone 10:16) Bantu bonso badi basue ‘kufila mibidi yabu bu mulambu udi ne muoyo, wa tshijila, udi usankisha Nzambi’ badi mua kuendela mu ‘njila wa tshijila’ eu.​—Lomo 12:1.

‘Badi kabayi balengejibue ku bubi buabu kabena mua kupitshilamu’

Mu tshidimu tshia 537, bena Yuda bavua bapingane kuabu bavua ne bua kukumbaja bualu bua mushinga. Yeshaya 35:8b udi wamba bua bantu badi bakumbane bua kuendela mu ‘njila wa tshijila’ ne: ‘Badi kabayi balengejibue ku bubi buabu kabena bamanye mua kupitshilamu, kadi neikaleku bua bantu bende; bena luendu, nansha bapote, kabena bendelamu.’ Bu muvua bena Yuda bapingane ku Yelushalema bua kujadikulula ntendelelu wa Yehowa, kakuvua muaba bua bantu bavua badikebela anu malu abu, bavua kabayi banemeka bintu bia tshijila ne benza malu mabi to. Bantu bavua bapingane bavua ne bua kutumikila mikenji ya Yehowa. Ke tshidi bantu badi basue bua Nzambi abanyishe ne bua kuenza pabu lelu. Badi ne bua kuikala ba “tshijila mu ditshina dia Nzambi.” (2 Kol. 7:1) Kadi mmalu mabi a bukoya kayi atudi ne bua kulekela?

Mupostolo Paulo wakafunda ne: ‘Malu mabi adi mubidi wenza adi amueneka ne: tshiendenda, malu a bukoya ne buenzavi.’ (Gal. 5:19, NW) Tshiendenda tshidi tshileja diangatangana dionso dia mulume ne mukaji badi kabayi baselangane. Muenzavi mmuntu muena ‘buendenda, udi wenza malu mabi kayi udikanda, udi kayi umvua bundu.’ Muntu muena tshiendenda ne muenzavi kabena mua kuikala ba tshijila ku mêsu kua Yehowa to. Nunku, bantu badi batungunuka ne kuenza malu aa, badi ne bua kubipata mu tshisumbu tshia bena Kristo. Ke mudibi kabidi bua bantu badi benza malu a bukoya mu mushindu mubi, tuambe ne: badi ‘badifila ku malu a bundu onso ne lukuka lukole.’​—Ef. 4:19.

“Malu a bundu” anyi a bukoya adi akonga malu mabi a bungi. Muaku wa mu tshiena Greke udi umvuija malu a bukoya udi uleja bukoya bua mishindu yonso bu mudi mu bikadilu, mu ngakuilu ne kudia malanda ne bantu badi kabayi bena kuitabuja. Udi kabidi umvuija bienzedi bikuabu bibi bidibu kabayi mua kulumbuluishila muntu kudi bakulu. * Kadi tudiku mua kuamba ne: bantu badi benza malu a mushindu eu mba tshijila anyi?

Tuangate tshilejilu tshia muena Kristo udi utuadija kutangila bindidimbi bia bantu butaka mu musokoko. Bidi mua kumujula majinga mabi ku kakese ku kakese ne kumupangisha bua kushala mulamate ku dipangadika diende dia kuikala muntu muimpe ku mêsu kua Yehowa. Tshienzedi tshiende tshidi mua kuikala katshiyi tshia bukoya bubi menemene to, kadi katshiena kabidi wela meji anu ku ‘malu a butoke bua mutshima, adi ne lumu luimpe, a buimpe ne a butumbi’ to. (Filip. 4:8) Bindidimbi bia bantu butaka mbibi ne bidi binyanga malanda etu ne Nzambi. Malu a bundu a mishindu  yonso kaena nansha ne bua kutedibua munkatshi muetu to.​—Ef. 5:3.

Tuangate tshilejilu tshikuabu tshia muena Kristo udi ne tshibidilu tshia kudijula dijinga dia kuangatangana kua mulume ne mukaji ne udijikija nkayende padiye utangila bindidimbi bia bantu butaka anyi kayi ubitangila. Nansha mudi Bible kayi utela tshienzedi etshi, katshienaku tshinyanga lungenyi luende anyi? Padiye utungunuka ne tshienzedi etshi, katshienaku tshimunyangila malanda ende ne Yehowa ne tshimuvuija muntu mubi ku mêsu kuende anyi? Tutumikilayi mubelu wa mupostolo Paulo wa ‘kudilengeja ku manyanu onso a mubidi ne a nyuma’ ne ‘kufuisha bitupa bia mibidi yetu ya pa buloba bua masandi, malu a bukoya, nkuka ya mubidi, disamina dibi dia mutshima ne dikuma dia mutshima ku bintu.’​—2 Kol. 7:1; Kolos. 3:5.

Bena panu badi ku bukokeshi bua Satana mbasue bienzedi bia bukoya ne badi basaka bantu ku dibienza. Mbikole bua kubenga kubuelakana mu malu aa bualu bantu ba bungi badi baenza. Kadi bena Kristo balelela kabena ne bua ‘kuenda bu mudi bantu ba bisamba bia bende benda mu meji abu’ to. (Ef. 4:17) Bua Yehowa kuitabaye bua tuetu kutungunuka ne kuendela mu ‘njila wa tshijila,’ tudi ne bua kulekela bienzedi bibi patudi pa nkayetu anyi munkatshi mua bantu.

‘Ntambue kakuikalamu’

Bua Yehowa Nzambi wa tshijila kuanyishaye bamue bantu, badi ne bua kushintulula bienzedi ne ngakuilu wabu. Yeshaya 35:9 udi wamba ne: ‘Kakuena kuikalamu nyama wa ntambue, nyama mukuabu udi utuanyangana kena ubandamu,’ mmumue ne: mu ‘Njila wa Tshijila.’ Badi bafuanyikija bantu badi ne bienzedi ne ngakuilu wa tshikisu ne nyama ya luonji. Kabakuikala ne muaba mu Bukalenge bua Nzambi to. (Yesh. 11:6; 65:25) Nunku bantu bonso badi basue bua Nzambi abanyishe, badi ne bua kulekela ngikadilu ya buena ya nyama eyi ne kulua bantu ba tshijila.

Mukanda wa Nzambi udi utubela ne: ‘Difika dia munda ne tshiji ne lukuna ne diyoyo ne dipendangana ne lukinu luonso biumushibue kunudi.’ (Ef. 4:31) Badi batuambila mu Kolosai 3:8 ne: ‘Nudiumushile malu aa onso: lukuna, tshiji, lukinu, bipendu, mêyi a bundu mukana muenu.’ Miaku ‘bipendu’ ne ‘dipendangana’ idibu batele mu mvese ibidi eyi idi ileja kuamba muntu mêyi mabi adi mua kumunyangila lumu anyi kumupuekesha milongo.

Lelu eu, ngakuilu wa tshikisu ne bipendu bidi too ne mu mêku. Mulume ne mukaji badi bapendangana, bapepejangana, bapenda too ne bana babu balela. Bena Kristo kabena ne bua kuikala ne ngakuilu wa mushindu eu mu mêku abu to.​—1 Kol. 5:11.

Kuikala bantu ba ‘tshijila mu ditshina dia Nzambi’ ndiakalenga!

Kuenzela Yehowa Nzambi wa tshijila mudimu ndiakalenga dinene be! (Yosh. 24:19) Yehowa mmutupeshe nsombelu muimpe wa dikema bu wa mu mparadizu. Kutungunuka ne kuikala bantu ba tshijila ku mêsu kua Yehowa ke bualu bua mushinga mukole.

Mu katupa kakese emu, Nzambi neakumbaje dilaya diende dia kuvuija buloba mparadizu. (Yesh. 35:1, 2, 5-7) Bantu badi bindile mparadizu eu ne muoyo mujima ne batungunuka ne kuikala ne nsombelu udi usankisha Nzambi ke babuelamu. (Yesh. 65:17, 21) Nunku mu mishindu yonso, tutungunukayi ne kutendelela Nzambi mudiye musue ne tulame malanda mimpe atudi badie nende.

[Mêyi adi kuinshi]

[Tshimfuanyi mu dibeji 26]

Ntshinyi tshivua bena Yuda ne bua kuenza bua kuendelabu mu ‘njila wa tshijila’?

[Tshimfuanyi mu dibeji 27]

Kutangila bindidimbi bia bantu butaka kudi kunyanga malanda etu ne Yehowa

[Tshimfuanyi mu dibeji 28]

‘Lukuna ne diyoyo ne dipendangana ne lukinu luonso biumushibue kunudi’