Tuikale tuenza malu anu bua lelu anyi?

ALBERT EINSTEIN, muena sianse munene wakamba mêyi kampanda atu bantu bamba bikole. Wakamba ne: “Tshitu ngela meji bua malu enzeka malaba to. Malaba ne lelu bidi diatshimue.” Bantu ba bungi batu bela meji mushindu wa muomumue. Batu bamba ne: “Bua tshinyi kuditatshisha bua malaba?” Batu bamba kabidi ne: “Londa tshidi ku muinu, kulondi tshidi ku mâyi.” “Tshidi ku muinu ntshidi kudia.” “Kueledi makelela meji.”

Lungenyi elu ki ndupiadupia to. Bantu bavua balonda Epikuleo (muena nkindi wa kale) bavua bavua bamba ne: “Diaku, nuaku, ondoloka. Bintu bikuabu bionso ebi bidi tshianana.” Bamue bantu ba mu tshikondo tshia Paulo bavua ne lungenyi lua muomumue elu. Bavua bamba ne: “Tudie bietu, tunue bietu, bualu bua makelela tufuafua.” (1 Kolinto 15:32) Bavua bela meji ne: kakuena muoyo mukuabu pa kumbusha utudi nawu eu to. Ke bualu kayi bavua bamba ne: tudi ne bua kuenza bionso bitudi mua kuenza patudi ne muoyo.

Bua bantu ba bungi, kuenza bionso bitudi mua kuenza patudi ne muoyo kakuena kumvuija anu kuditua mu dikeba dia masanka to. Ntatu idi bantu ba bungi nayi lelu idi ibasaka bua kuluangana mvita mikole bua kushala ne muoyo. Bua tshinyi badi ne bua kuditatshisha bua matuku adi kumpala padi malu enda anyanguka anu kunyanguka?

Tudi mua kulongolola malu bua matuku adi kumpala anyi?

Nansha bantu badi bimpe kabatu bamona mushinga wa kulongolola malu bua matuku atshilualua to. Batu badiebeja ne: “Bua tshinyi kuditatshisha?” Bamue batu bamba ne: bantu batu balongolola malu a kuenza kabatu ne bua nsongo butubu bapeta to. Nansha Yobo uvua munyingalale bikole pavuaye mumone malu avuaye mulongolole bua dîku diende, ‘alua tshianana.’​—Yobo 17:11; Muambi 9:11.

Mufundi wa tusala Robert Burns uvua mufuanyikije ntatu yetu ne ya kapuku kavuaye munyangile buina pavuaye udima. Ke kapuku kuditua lubilu. Mufundi eu wakamba ne: ‘Misangu ya bungi katutu ne tshia kuenza padi malu atudi katuyi mua kukandika atukuata ne anyangakaja malu onso atuvua balongolole bimpe menemene.’

 Nanku, mbibi bua kulongolola malu bua matuku atshilualua anyi? Bidi bimueneka ne: padi bantu kabayi badilongolola bimpe, badi mua kujimija bintu bia bungi padi mvunda mikole anyi bikumina bienzeka. Tshilejilu, nansha muvua muntu kayi mua kuimanyika mvunda mukole uvuabu babikile ne: Katrina to, kadi bu bantu badilongolole bimpe, bavua mua kukepesha bungi bua bintu bivua binyanguke ne bantu bavua bafue.

Udi wela meji kayi? Mbimpe kuenza malu anu bua lelu ne kubenga kuelela makelela meji anyi? Tangila malu adi tshiena-bualu tshidi tshilonda tshiamba.

[Bimfuanyi mu dibeji 3]

“Diaku, nuaku, ondoloka. Bintu bikuabu bionso ebi bidi tshianana”

[Tshimfuanyi mu dibeji 4]

Bu bantu badilongole, bavua mua kukepesha bungi bua bintu bivua tshipepele tshia Katrina tshinyange anyi?

[Mêyi a dianyisha]

U.S. Coast Guard Digital