Nkonko ya babadi

Yezu uvua musue kuamba tshinyi pavuaye muambe ne: mupika wa lulamatu uvua ne bua kuikala ‘mudimuke’?

Yezu wakela lukonko elu: ‘Mmupika kayi udi ulamata mfumu wende, udi ne meji [anyi wa budimu, NW]? Mfumu wende wakamuteka pa mutu pa bantu biende bualu bua kubapa biakudia palua dituku diabi?’ (Matayo 24:45) ‘Mupika’ udi ufila ‘biakudia’ bia mu nyuma eu ntshisumbu tshia bena Kristo bela manyi a mu nyuma. Bua tshinyi Yezu wakamubikila ne: mupika wa meji anyi wa budimu? *

Malongesha a Yezu nkayende adi mua kutufikisha ku diumvua bimpe tshivuaye usua kumvuija pakakulaye bua mupika ‘wa budimu.’ Tshilejilu, pavua Yezu muakule bua ‘mupika wa lulamatu ne wa budimu,’ uvua ufumina ku diakulua bua lusumuinu lua mishikankunde dikumi ivua mindile difika dia mubaki anyi mulume. Mishikankunde eyi idi ituvuluija muvua bena Kristo bela manyi a nyuma kumpala kua 1914 bindile ne muoyo mujima difika dia bayabu munene Kristo Yezu. Mishikankunde itanu kayivua ne mafuta makumbane a kuela mu miendu yabu pavua mulume mufike to, ke kupangilayi mushindu wa kubuela mu dibanji dia dibaka. Kadi batanu bakuabu bavua ne meji anyi badimuke. Bavua balame mafuta a kuela mu miendu yabu, kubambuluishawu bua kutungunuka anu ne kufila butoke pavua mubaki mufike, ke kubanyishilabu bua kubuela mu dibanji dia dibaka.​—Matayo 25:10-12.

Pavua Yezu mulue mu Bukalenge buende mu 1914, bena Kristo bela manyi ba bungi bavua batekemene bua kuya kudiye mu diulu musangu umue. Kadi paku kutshivua mudimu wa bungi wa kuenza pa buloba, ne bamue kabavua badilongolole bua kuwenza to. Anu bu mishikankunde mipote, kabavua badikoleshe mu nyuma kumpala kua dîba to, nanku kabavua badiakaje bua kutungunuka ne kufila butoke nansha. Nansha nanku, kuvua ba bungi bakavua badimuke ne bashindame mu nyuma, bavua benza malu ne meji ne badianjila kumona kule. Pakamanyabu ne: kumpala kutshivua bia bungi bia kuenza, bakaditua diakamue mu diwenza ne disanka dionso. Pakenzabu nanku, bakaleja muvuabu ne ‘lulamatu ne budimu.’

Mona kabidi mushindu uvua Yezu muakule bua ‘muena meji’ anyi muena budimu mu Matayo 7:24. Yezu wakamba ne: ‘Muntu yonso udi mumvue mêyi anyi aa ne utu uatumikila neikale bu muena meji [anyi mudimuke], wakibaka nzubu wende pa mutu pa dibue.’ Muntu mudimuke udi wibaka nzubu mushindame bimpe panshi, mumanye ne: mpepele ne mvula ya bipupu idi mua kuditutaku. Kadi muntu mutshimbakane udi washila yeye nzubu mu lusenga, umujimija padiye upuka. Nanku, muyidi mudimuke wa Yezu ngudi udianjila kumona bubi bua kulonda meji a bantu. Dijingulula diende dia mianda didi dimufikisaha ku dishindamija ditabuja diende ne bienzedi biende ne malongesha ende pa malu avua Yezu mulongeshe. ‘Mupika wa lulamatu ne wa budimu’ udi wenza pende bia muomumue.

Tumonabi kabidi mudibu bakudimune katshiambilu ka ‘udi ne meji’ anyi mudimuke mu Mifundu ya mu tshiena Ebelu mu nkudimuinu mivule. Tshilejilu, Palô wakasungula Yosefe bua kutangila bilaminu bia biakudia mu Ejipitu. Yehowa ke uvua mulongolole bua bienzeke nanku bua kupeteshaye bantu bende biakudia. Bavua basungule Yosefe bua tshinyi? Palô wakamuambila ne: “Kakuena muntu udi mua kukutamba budimu ne lungenyi.” (Genese 41:33-39; 45:5) Bible udi wamba kabidi nanku bua Abigayila ne: uvua “muena meji” anyi mudimuke. Wakapesha Davidi muela manyi wa Yehowa ne bantu bende biakudia. (1 Samuele 25:3, 11, 18) Bavua mua kuamba ne: Yosefe ne Abigayila bavua bantu badimuke bualu bavua bafike ku dijingulula disua dia Nzambi ne ku dienza malu bu badianjile kumona kule ne kusunguluja kua malu.

Nunku pavua Yezu mubikile mupika wa lulamatu bu mupika mudimuke, uvua uleja ne: bantu bavua mua kuimanyina mupika eu bavua ne bua kuikala ne busunguluji, badianjila kumuena malu kule, ne bamanye mua kujingulula mianda bilenga, bualu ditabuja diabu, bienzedi biabu ne malongesha abu mbishindamene mu Dîyi dia Nzambi dia bulelela.

[Mêyi adi kuinshi]