Dijinga dia Adryana

ADRYANA, muana wa bakaji wa bidimu bisambombo wa mu tshimenga tshia Tulsa, mu Oklahoma (mu ditunga dia États-Unis) uvua ne dijinga kampanda. Dijinga edi divua difuanangane ne dia Davidi mufundi wa Misambu wakamba ne: ‘Ngakalomba Yehowa bualu bumuepele, mbuobu bundi nkebakeba: bua meme kushikama mu nzubu wa Yehowa matuku onso a muoyo wanyi, bua kumona buimpe bua Yehowa, ne bua kuelangana meji a malu a mu ntempelo wende.’​—Musambu 27:4.

Pavua Adryana ne ngondo isambombo, bakamupeta ne disama dia kansere ditu dikuata bitupa bia mu buongo didibu babikila ne: neuroblastome. Disama dia lufu edi diakamushiya mutekete mikolo yonso ibidi. Bua kumondapa, badoktere bakamupanda njila ne njila ne kumufundilabu manga akanuaye munda mua tshidimu tshijima.

Tatuende wa Adryana (kêna mu tshitendelelu tshimue ne Adryana ne mamuende to) wakayukila ne bena mu tshisumbu tshitu tshitangila majinga a bana badi ne masama a lufu bua kulomba bua muanende aye kuendakana mu lupangu lua manaya lumanyike bikole. Kumpala kua bena mu tshisumbu atshi kukumbajila Adryana dijinga diende adi, bakanji kumuebeja. Adryana wakaleja dianyisha bua muvuabu bamuangate ne mushinga, kadi wakabambila ne: uvua musue kuya kuendakana ku Betele, muaba udibu balombuela midimu ya buloba bujima ya Bantemu ba Yehowa ku New York. Pakamanya Adryana bualu buvua tatuende muye kulomba, wakasambila Yehowa bua amupeshe mpunga wa kuya kuendakana ku Betele. Nansha muvua bena mu tshisumbu etshi badiambila ne: Betele kavua mua kuikala muaba udibu bakidila bana bimpe, bakitaba bua kukumbaja dijinga dia Adryana pakitaba tatuende bualu ebu.

Adryana wakaya kuendakana ku Betele wa ku New York bua musangu wa kumpala, bakaya kumufilaku kudi yayende ne mulunda wende. Adryana wakamba ne: “Yehowa mmuandamune dilomba dianyi. Mvua mumanye ne: uvua ne bua kumpesha mushindu wa kuya kuendakana ku Betele. Ngamonyi mudibu benza mikanda ne bibejibeji ne Bible. Mmuaba muimpe kupita lupangu lua manaya.”

Adryana ‘wakamona buimpe bua Yehowa’ ne kulejaye dianyisha bua midimu idi yenzeka muaba eu udi muikale mpuila-mambu wa midimu ya bantu ba Yehowa lelu. Wewe mulue pebe kuendakana ku Batele netukuakidile ne disanka. Pa kumbusha tshilombuelu tshinene tshia midimu ya Bantemu ba Yehowa tshidi ku New York, kudi kabidi Betele ya Bantemu mu matunga makuabu.