Utu uyikilaku ne baudi munange anyi?

TSHIKANDAKANDA kampanda tshia mu ditunga dia Pologne tshitu tshipatuka lumingu luonso tshiakamba ne: “Kuyikila ne batudi banange kudi kuenda kukepela bikole be.” (Polityka) Mu ditunga dia États-Unis, badi batshinka ne: balume ne bakaji badi mu mabaka batu bayikila bimpe anu tusunsa tusambombo ku dituku. Bamue bamanyi bapiluke ba malu a mabaka badi bela meji ne: tshia bibidi tshia mabaka onso adi afua anyi abulukangana ntshipeta tshia dibenga kuyikila.

Tudi mua kuamba tshinyi bua diyikidilangana dia baledi ne bana? Tshikandakanda tshitudi batele atshi tshidi tshileja ne: misangu mivule “kaditu diyukidilangana menemene to, kadi ditu anu diela dia nkonko patupu ne: Bishi kalasa? Balunda bebe badi bishi?” Tshikandakanda etshi tshidi tshijula lukonko elu: “Mmunyi muamanya bana betu mua kuikala ne malanda a buwetu?”

Bu mutu diyukidilangana dimpe kadiyi mua kudiluila nkayadi, nanku mmunyi mutudi mua kulengeja mushindu ututu tuyikila? Muyidi muena Kristo Yakobo udi utupesha mubelu eu wa mushinga: ‘Muntu yonso umvue biende lubilu, atukije kayi wanji kuakula, kakuatshi tshiji lubilu.’ (Yakobo 1:19) Eyowa, bua kuyikila mu mushindu udi ne dikuatshisha, tudi ne bua kuteleja ne ntema ne kubenga kukosa udi wakula ku dîyi anyi kudianjila kukosa tshilumbu. Epuka kudiulangana bualu kudi mua kukosesha muyiki bipepele. Kabidi, Yezu uvua wela nkonko ne mbabi, kabiyi bualu uvua musue kumanya malu, kadi bua muntu uvua umuteleja kupatulaye avuaye nawu ku muoyo ne bua kukoleshaye malanda ende ne muntu au.​—Nsumuinu 20:5; Matayo 16:13-17; 17:24-27.

Wewe mutumikile mêyi malenga adi mu Bible, neumanye mua kutuadija diyuki ne kuyukidilangana ne baudi munange. Abi bidi mua kutufikisha ku didia malanda mimpe atuikala mua kuanyisha bidimu bia bungi anyi mene mu matuku etu onso a muoyo.