“Dikuatshisha dianyi didi difuma kudi Yehowa”

Dimanya dia Nzambi didi dikolesha mêku

“TSHIMANU tshia Berlin.” Ke muvua mulume mukuabu ne mukajende ba mu ditunga dia Argentine babikile tshimanu tshivuabu bibake bua kukosolola nzubu wabu mu bitupa bibidi! Bavua ne bilumbu bivua kabiyi bijika ne bavua bakinangane bikole.

Bia dibungama, nsombelu eu kêna anu kudi bena dibaka aba nkayabu to. Mêku a bungi mmuule tente ne bimvundu, dipanga lulamatu ne dikokangana dikole. Muanda eu udi unyingalaja, bualu Nzambi nkayende ke utu muenze dîku. (Genese 1:27, 28; 2:23, 24) Dîku ndipa dia kudi Nzambi ne mmuaba muimpe mutambe wa kulejangana dinanga. (Luta 1:9) Padi bena mu dîku bakumbaja malu adi Nzambi ubalomba, badi banemeka Yehowa ne badi kabidi basankishangana. *

Bu muvua Nzambi muenze dîku, tudi ne bua kulekela meji ende alombola ngumvuilu wetu wa mushindu udi malu ne bua kuenda mu mêku. Dîyi Diende didi ne mibelu mimpe bua kuambuluisha mêku, nangananga padi bilumbu bijuka. Tshilejilu Bible udi wamba bua balume ne: ‘Balume badi ne bua kusua bakaji babu mene bu mudibu basue mibidi yabu.’ Padi mulume ukumbaja tshidibu bamulomba etshi, bidi bienza mukaji disanka bua ‘kunemeka bayende.’​—Efeso 5:25-29, 33.

Mupostolo Paulo wakafunda bua malanda adi pankatshi pa baledi ne bana babu ne: ‘Batatu, kanufuishi bana benu balela tshiji, nubadiundishe bimpe ne dibela ne didimuija bia Mukalenge.’ (Efeso 6:4) Muanda eu udi ulela nsombelu wa disanka mu dîku, udi ufikisha bana ku ditumikila baledi babu bipepele.​—Efeso 6:1.

Malu aa adi aleja mushinga udi nawu mibelu ya meji ya mu Bible mu dîku. Bantu ba bungi badi bapeta disanka ku nzubu padibu batumikila mêyi a Nzambi. Angata tshilejilu tshia mulume ne mukajende ba mu ditunga dia Argentine batudi batele ku ntuadijilu. Kunyima kua bobu bamane kulonga Bible ne Bantemu ba Yehowa mu ngondo isatu, bakatuadija kutumikila mibelu ya meji idimu mu dibaka diabu. Bakenza muabu muonso bua kuyukidilangana bimpe, kuditeka pa muaba wa mukuabu ne kufuilangana luse. (Nsumuinu 15:22; 1 Petelo 3:7; 4:8) Bakalonga mua kukanda tshiji tshiabu ne kulomba diambuluisha kudi Nzambi pavua malu kaayi enda bimpe mu dîku diabu. (Kolosai 3:19) Matuku makese tshianana, “Tshimanu tshia Berlin” kupukatshi!

Nzambi udi ukolesha dîku

Dimanya ne ditumikila mikenji ya Nzambi didi mua kukolesha dîku bua kutantamenadi ntatu. Ebi bidi ne mushinga, bualu bakavua bamanyishe ne: dîku divua ne bua kupeta ntatu mikole mu matuku etu aa. Paulo wakadianjila kuakula bua dinyanguka dia bikadilu mu bantu. Wakamba ne: mu ‘matuku a ku nshikidilu’ bantu bavua ne bua kupanga lulamatu, kabayi ne ‘dinanga dia bana babu,’ ne kabayi batumikila baledi babu, nansha munkatshi mua bantu ‘badi ne tshimuenekelu tshia buimpe bua Nzambi.’​—2 Timote 3:1-5.

Kujinga kusankisha Nzambi kudi mua kutuambuluisha bua kuepuka bikadilu ebi bibi bidi binyanga dîku. Bena mu mêku a bungi mbamona  ne: diambuluisha dia mu nyuma didi mua kubakuatshisha bua kutantamena ntatu mishilashilangane idibu batuilangana nayi. Bikala bena mu dîku basue kulama malanda mimpe ne Nzambi, tshia kumpala badi ne bua kutumikila mikenji ya mu Bible ne kujingulula ne: ‘bikala Yehowa kayi wasa nzubu, badi bamuasa badi bakuata mudimu eu patupu.’ (Musambu 127:1) Disanka didi divula mu dîku padi benamu bateka Nzambi pa muaba wa kumpala.​—Efeso 3:14, 15.

Dennis wa mu ditunga dia Hawaii wakajingulula muvua bualu ebu bulelela. Nansha muvuaye udiangata bu muena Kristo, bipendu ne mvita bivua nsombelu wende wa dituku dionso. Kunyima kua yeye mumane kuenza busalayi, wakalua muena lonji ne muena lukinu lukole. Udi uvuluka wamba ne: “Mvua nduangana mvita dîba dionso. Tshivua nditatshisha bua malu avua angenzekela, ne tshivua ntshina lufu to. Mvua anu mutungunuke ne ngakuilu wa busenji ne diluangana mvita. Mukajanyi uvua Ntemu wa Yehowa wakandomba bua kulonga mukanda wa Nzambi.”

Dennis uvua ubenga tshivua mukajende umuambila. Kadi ngikadilu milenga ya mukajende muena Kristo yakatuyisha tshikadilu tshiende tshibi. Dinga dituku Dennis kubuela mu tshisangilu kampanda tshia bena Kristo ne mukajende ne bana bende. Pashishe, Dennis kutuadija kulonga Bible ne kulubuluka bimpe mu nyuma. Kulekelaye tshibidilu tshia dinua makanya tshikavuaye muenze natshi bidimu 28 bijima ne kubengaye mangumba a balunda bavua bamusaka bua kupinganyina malu onso mabi avuaye mulekele. Dennis udi wela Yehowa tuasakidila wamba ne: “Nsombelu wa mu dîku dianyi wakalengela. Tudi tuya mu bisangilu ne mu buambi pamue ne dîku dianyi. Bana banyi babidi kabatshivua bantshina kabidi to, bualu mvua mulonge mua kukanda tshiji tshianyi ne mulekele bipendu. Tuvua tuyukila nabu bimpe malu a mu Bible. Bu meme tshiyi mulonge Bible, tshivua mua kuikalaku lelu wa ndaya to, bualu mvua muena malu makole be!”

Bena mu mêku badi mua kupeta disanka padibu baditatshisha bua kuenza disua dia Yehowa. Malu akadi menzeke adi aleja ne: nsombelu udi mutambe buimpe mu dîku padiku muntu nansha umue udi utumikila mikenji ya mu Bible kupita padimu mutupu. Kukolesha mêku a bena Kristo mmudimu mukole udi ulomba meji ne dîba. Kadi bena mu mêku aa mbamanye ne: Yehowa neabeneshe mudimu eu udibu benza. Badi mua kuambulula mêyi aa a mufundi wa Misambu: “Dikuatshisha dianyi didi difuma kudi Yehowa.”​—Musambu 121:2.

[Mêyi adi kuinshi]

[Lungenyi lunene lua mu dibeji 9]

Nzambi ‘ngudi tshiota tshionso tshia mu diulu ne tshia pa buloba tshidika dîna diende.’​—EFESO 3:15

[Kazubu mu dibeji 8]

YEHOWA UDI WANGATA DÎKU NE MUSHINGA WA BUNGI

‘Nzambi wakabasankisha, wakabambila ne: Nulelangane, nukumbane ba bungi, nuuje buloba tente.’​—Genese 1:28.

‘Disanka didi kudi muntu yonso udi unemeka Yehowa. Mukajebe neikale bu muonji wa tumuma udi ukuama bimpe munda mua nzubu muebe.’​—Musambu 128:1, 3.