Bantu badi bakeba balombodi bimpe

“Umbuka! Buetu tuetu kuebe kuajiki. Ndi ngamba mu dîna dia Nzambi ne: ndaku!”​—Mêyi a Oliver Cromwell matela kudi Leopold Amery, tshipuita-munua-mfuanka wa mu ditunga dia Grande-Bretagne.

Kukavua ngondo muanda mukulu ivua Mvita Mibidi ya Buloba bujima itua ipela, mibutule bantu bikole ne kabidi mikolele bukalenge bua Grande-Bretagne ne matunga avua madisange nabu. Bua Leopold Amery pamue ne bakuabu ba mu mbulamatadi au, bivua bikengela kushintulula balombodi. Nunku, mu dia 7 a ngondo muitanu 1940 mu tshisangilu tshia batshipuita-munua-mfuanka, muena-muabu Amery wakambila Kavula-mbedi Neville Chamberlain mêyi adi kulu eku. Panyima pa matuku asatu, Kavula-mbedi Chamberlain wakashiya nkuasa ne Winston Churchill kumupinganaye.

BANTU badi dijinga ne mulombodi, kadi kakuena nansha umue udi mua kukumbana to. Nansha mu dîku, bidi bikengela bua tatu ikale mukumbane bua kulombola bua ne: mukajende ne bana bende bikale ne disanka. Kadi anji elaku meji bua tshidibu mua kulomba mulombodi wa ditunga dijima anyi mulombodi wa bukua-matunga! Nunku kabiena bikemesha bua mudibi bikole bua kupeta balombodi bimpe to.

Ke bua tshinyi kukadi bidimu binunu ne binunu bikadibu bateke bantu mu nkuasa, bashintulule bakokeshi, bakulule bamfumu ku bukole, bapeshe bantu mianzu, belelangane tukanda, bashipe bamfumu ne bashintulule mishindu ya dilombola misangu bungi kabuyi kubala. Bakalenge, bakavula-mbedi, bangovena, bamfumu ba matunga, ba-ministre ne batshikokesha nkaya mbapete bukokeshi ne babujimije kabidi anu mu mupodi wa dîsu. Padi malu ashintuluka nunku, nansha bamfumu ba bukole batu batonkoka pabu. (Tangila mu kazubu ka: “Badi babanyenga bukokeshi mu mupodi wa dîsu,” mu dibeji 5.) Nansha nanku, balombodi bakumbane badi balala matuku a bungi kabena bamueka to.

“Tuitabe mulombodi yonso udiku au” anyi tuenze tshinyi?

Nunku, kabiena bikemesha bua mudi bantu ba bungi bashala kabatshiyi ne ditekemena dia kupeta mulombodi muimpe to. Mu amue matunga, tshikondo tshia masungula ke tshitu bantu baleja patoke mudibu kabayi batshiuka malu a tshididi anyi kabatshiyi baatekemene. Geoff Hill, kamona-kamba mukuabu wa mu Afrike udi wamba ne: “Bantu ba bungi kabatshiena batshiuka malu a tshididi anyi bakadi babenga [kuelelangana tukanda], bualu badi badimona kabayi ne bukole bua kujikija dikenga dia mu nsombelu wabu. . . . Mu Afrike, padi bantu kabayi  belelangana tukanda, abi kabiena bileja ne: mbanyishe bumfumu budiku to. Kadi misangu mivule, mmushindu udi bantu badi badimona kabayi ne muntu udi ubateleja balomba diabu diambuluisha.” Bia muomumue, kamona-kamba kampanda wa mu États-Unis wakamba pa bidi bitangila masungula akavua pa kuenzeka ne: “Mvua musue bua se: muntu udi mukumbane tshishiki aleje pende mpala.” Udi usakidila ne: “Kakuena muntu wa nunku to. Kenaku nansha umue to. Nunku tuitabe mulombodi yonso udiku au.”

Bushuwa, bantu badi anu ne bua “kuitaba” balombodi nansha bobu babi anyi kudiku tshikuabu tshia kuenza? Bu mudi bantu badi balombola kabayi bafike ku dikumbaja majinga a badibu bakokesha, ebi bidi bijadika ne: katuakupetaku mulombodi muimpe anyi? Tòo. Mulombodi mukumbane tshishiki udiku. Tshiena-bualu tshidi tshilonda netshiakule bua mulombodi muakane wa bukua-bantu eu ne mushindu wikala mudimu wende ne dikuatshisha bua bantu miliyo ne miliyo ba mishindu ne mishindu, ne wewe kabidi.

[Bimfuanyi mu dibeji 3]

Kulu ku dia bakaji: Neville Chamberlain

Kulu ku dia balume: Leopold Amery

Kuinshi: Winston Churchill

[Mêyi a dianyisha]

Chamberlain: Foto mukuata kudi Jimmy Sime/​Central Press/​Getty Images; Amery: Foto mukuata kudi Kurt Hutton/​Picture Post/​Getty Images; Churchill: The Trustees of the Imperial War Museum (MH 26392)